Mi Tingbaot Jehova Long Olgeta Desisen Blong Mi

Mi mi bon long 19 Mei 1940, long taon blong Amioûn, long Lebanon. Sam yia biaen, famle blong mi i muv i go long taon blong Tripoli. Mi gruap long wan hapi famle we i save Jehova God mo i lavem hem. Mifala faef long famle, i gat tri gel mo tu boe mo mi mi lasbon. Impoten samting long laef blong papa mama blong mi, hemia blong stadi Baebol, go long ol miting, mo halpem ol narafala blong oli save God, be i no wok blong winim mane.

I gat sam tabu Kristin long kongregesen blong mifala. Wan long olgeta hemia Michel Aboud, we hem nao i stap lidim buk stadi blong kongregesen. Hem i bin lanem trutok long New York, mo i stat blong prij long Lebanon long 1921. Mi stap tingbaot olsem wanem hem i gat tingting daon, mo i givhan long tu yangfala we oli graduet long Gilead Skul, hemia Anne mo Gwen Beavor. Mifala i kam ol gudfala fren. Mo plante yia biaen, mi glad tumas blong mitim Anne bakegen long Yunaeted Stet. Samtaem biaen mi luk Gwen, we hem i maredem Wilfred Gooch mo tufala i wok long branj ofis long London, Inglan.

WOK BLONG PRIJ LONG LEBANON

Taem mi yangfala, i gat smol Witnes nomo long Lebanon. Be mifala i wok strong blong serem ol trutok blong Baebol long ol narafala, nating se ol lida blong jos oli agensem mifala. Mi tingbaot yet sam samting we i bin hapen long mifala.

Wan dei, mi mo sista blong mi Sana i stap prij long wan apatmen mo wan pris i kam stret long mitufala. Ating wan man i bin kolem hem. Pris ya i tok strong long sista blong mi, hem i kam kros, mo i pusum hem i foldaon long step mo i kasem kil. Mo long taem ya, wan man i kolem ol polis blong oli kam givhan long Sana. Ol polis oli kam mo oli tekem pris ya i go long polis stesen, mo oli faenemaot se hem i holem wan masket. Bos blong ol polis i askem long hem se: “?Yu yu wan wanem? ?Wan lida blong skul o wan man blong mekem faet?”

Wan narafala samting we mi tingbaot gud, hemia taem kongregesen blong mifala i rentem wan bas blong go prij long wan eria farawe long taon. Mifala i gat wan gudfala taem go kasem we wan pris i harem samting we mifala i stap mekem, mo i singaot sam grup blong ol man blong oli kam atakem mifala. Oli tok nogud long mifala, oli stonem mifala mo papa blong mi i kasem sam kil. Mi tingbaot we mi luk blad i kavremap fes blong hem. Mama i tekem hem, tufala i gobak long bas mo mifala evriwan i folem tufala. Nating se i olsem, mi no save fogetem taem ya we mama i stap klinim fes blong papa mo i se: “Jehova, plis yu fogivim ol man ya. Oli no save wanem oli stap mekem.”

Wan narafala taem bakegen, hemia taem mifala i go visitim ol famle blong mifala long ples blong mifala. Taem mifala i go long haos blong abu man, mifala i luk wan lida blong skul we i wan bisop. Bisop ya i save se perens blong mi oli Witnes blong Jehova. Nating se mi gat sikis yia nomo, be hem i traem blong mekem mi sem. Hem i singaot mi mo i talem se: “Yu ya, ?from wanem yu no baptaes?” Mi talem long hem se mi mi wan pikinini yet, mi nidim blong savegud Baebol blong mi save gat strong bilif, biaen mi save baptaes. Be hem i no laekem ansa blong mi mo i talem long abu man se mi mi no gat respek.

Ol nogud ekspiriens olsem oli no plante. From we ol man Lebanon oli ol man we oli kaen mo oli welkamem gud man. Taswe mifala i naf blong tokbaot Baebol long plante man mo stadi wetem olgeta.

FAMLE I DISAED BLONG MUV I GO LONG NARAFALA KANTRI

Taem mi stap skul yet, wan yangfala brata blong Veneswela i kam visitim Lebanon. Hem i stap kam long ol miting long kongregesen blong mifala, mo i stat blong frenem sista blong mi Wafa. Samtaem biaen tufala i mared mo tufala i go laef long Veneswela. Wafa i raetem sam leta long papa, mo i askem sipos ful famle i save muv i go long Veneswela. Hem i mekem olsem from we hem i misim mifala tumas. !Ale mifala i muv i go!

Mifala i go long Veneswela long 1953, mo mifala i laef long Caracas, klosap long pales blong presiden. Mi mi wan smol boe long taem ya, mo mi laekem blong luk presiden taem i pas long sas trak blong hem. Be perens blong mi i faenem i had lelebet from lanwis, kalja, kakae mo weta i defren. Taem oli stat blong lan long niufala jenis ya, wan nogud samting i hapen.

WAN NOGUD SAMTING I HAPEN

Papa blong mi i stat blong harem se hem i sik. Hemia i narakaen from we papa blong mifala i wan strong man mo i helti. Mifala i neva tingbaot wan taem we hem i bin sik. Be naoia hem i gat kansa, mo oli katem hem. Sori tumas, wan wik afta, hem i ded.

I had blong diskraebem harem nogud we mifala i gat long taem ya. Long taem ya, mi mi gat 13 yia nomo. Mifala i neva ekspektem se papa blong mifala bambae i ded, mo mifala i harem olsem se bambae mifala i neva hapi bakegen. I tekem sam taem lelebet blong mama i akseptem se hasban blong hem i no moa stap. Mifala i luksave se mifala i mas gohed, mo Jehova i halpem mifala blong stanap strong. Taem mi gat 16 yia, mi graduet long sekendri skul long Caracas, mo mi wantem tumas blong sapotem famle blong mi.

Samtaem biaen, sista blong mi Sana i maredem Rubén Araujo, we i bin graduet long Gilead Skul mo i bin muv i kambak long Veneswela. Be afta tufala i jus blong muv i go long New York. Famle blong mi i talem se mi mas stadi long wan yunivesiti, ale mi go long New York mo mi stap wetem sista blong mi mo hasban blong hem. Tufala i bin givhan long mi bigwan blong kam klosap moa long Jehova. Mo tu, i gat sam brata we oli bigman long saed blong spirit we oli joen wetem mifala long Brooklyn Spanis kongregesen. Mi glad tumas blong save Milton Henschel mo Frederick Franz, we tufala tugeta i wok long Brooklyn Betel.

Taem klosap mi finisim faswan yia blong mi long yunivesiti, mi stat blong tingbaot se bambae mi mekem wanem long laef blong mi. Mi bin ridim mo tingting long wan atikol we i kamaot long wan Wajtaoa we i tokbaot sam Kristin we oli kasem sam mak long wok blong Jehova. Mi luk se ol paenia mo ol Betelaet long kongregesen blong mifala oli glad tumas, mo mi tu mi wantem kam olsem olgeta. Be mi mi no baptaes yet. Ale mi luksave se mi mas givim laef blong mi i go long Jehova. Mi mekem olsem mo mi tekem baptaes long 30 Maj 1957.

OL IMPOTEN DESISEN

Afta we mi baptaes, mi stat blong tingbaot blong kam wan paenia. Mi rili wantem blong kam wan paenia, be mi luksave se bambae i no isi. Mi no sua sipos mi naf blong mekem wok blong paenia, mo long semtaem skul long yunivesiti. Mi mo famle blong mi i raetem plante leta long saed blong desisen blong mi blong stopem skul, gobak long Veneswela, mo kam wan paenia.

Mi gobak long Caracas long Jun 1957. Be mi luk se laef blong famle i had we i had. Oli nidim wan memba blong famle blong i sapotem olgeta. ?Olsem wanem mi save givhan? Mi mi kasem wan wok long bang, be yet mi rili wantem paenia. Hemia nao risen we i mekem se mi kambak. Mi gat strong tingting blong mekem tugeta wok ya. Blong sam yia mi wok fultaem long bang mo semtaem mi mekem wok blong paenia. !Long laef blong mi, mi neva bin bisi olsem mo kasem wan glad olsem!

Samting we i mekem mi glad tu, hemia taem mi mitim Sylvia we biaen mitufala i mared. Hem i wan naesfala sista blong Jemani we i rili lavem Jehova. Hem mo famle blong hem oli muv i kam long Veneswela. Biaen, mitufala i gat tu pikinini, wan boe, Michel (Mike), mo wan gel, Samira. Mo tu, mi stat blong lukaot long mama blong mi we i kam laef wetem mifala. Nating se mi no moa paenia, from mi mas lukaot long nid blong famle, be mi gohed blong wok strong long wok blong prij. Mi mo Sylvia i mekem wok blong haftaem paenia enitaem we mitufala i spel.

WAN NARAFALA IMPOTEN DESISEN

Samting we mi tokbaot long stat blong stori ya, i hapen taem ol pikinini oli stap go long skul yet. Blong talem stret, mi mi gat wan gudfala laef mo ol fren long wok oli respektem mi. Be yet, mi wantem se ol narafala oli luk mi olsem wan man blong wok blong Jehova. Mi gohed blong tingbaot samting we mi save mekem blong ol man oli luk mi olsem wan man blong Jehova. So mi mo waef blong mi i tokbaot olsem wanem blong yusumgud mane blong mifala. Sipos mi finis wok long bang, bambae oli pem yia blong mi, mo hemia i wan bigfala mane. Mo from we mifala i no gat kaon, mifala i luksave se sipos mifala i mekem laef blong mifala i kam simpol, bambae mifala i gat naf mane we i save holemtaet mifala blong plante yia.

I no isi blong mekem wan desisen olsem, be waef blong mi mo mama blong mi tufala tugeta i sapotem mi fulwan. So naoia bambae mi mekem wok blong paenia bakegen. !Mi mi glad we mi glad tumas! Taem mi rere blong mekem wok blong paenia, mifala i kasem wan nius we mifala i no ekspektem.

!WAN SAPRAES!

Wan dei, dokta i talemaot se Sylvia i gat bel. !Mifala i sapraes tumas! Mifala i glad tumas, be mi stap tingbaot desisen we mi mekem blong paenia. ?Olsem wanem? ?Bambae mi save gohed blong mekem wok blong paenia? So mifala i traehad blong gat stret tingting, mo luk fowod blong gat wan narafala memba blong famle. ?Be mi stap tingbaot yet se bambae mi kam wan paenia o no?

Mifala i tokbaot ol plan blong mifala bakegen, mo mifala i disaed se bambae mi mekem wok blong paenia. Boe blong mitufala Gabriel i bon long Eprel 1985. Mi risaen long bang, mo mi stat blong paenia bakegen long Jun 1985. Biaen, mi gat privilej ya blong kam wan memba blong Branj Komiti. Mi wok tu o tri dei long branj. Be from we branj i no stap long Caracas, mi mas travel samwe 80 kilometa blong go wok long branj.

MIFALA I MUV BAKEGEN

Branj ofis i stap long taon ya La Victoria, so famle i disaed blong muv i go long La Victoria we i klosap moa long Betel. Hemia i wan bigfala jenis blong mifala evriwan. Mi mi laekem tumas famle blong mi mo mi glad long olgeta, from we oli rere blong sapotem mi. Sista blong mi Baha, i glad blong lukaot long mama blong mifala. Mike i mared, be Samira mo Gabriel i stil stap long haos. Taem mifala i muv i go long La Victoria, oli lego ol fren blong olgeta long Caracas. Mo tu, Sylvia i mas lan blong laef long wan smol taon we i no gat plante samting. Mo mifala evriwan i mas lan blong laef long wan smol haos. Yes, mifala i mas mekem plante jenis taem mifala i muvaot long Caracas blong kam long La Victoria.

Be afta, ol samting oli jenis bakegen. Gabriel i mared mo Samira i muvaot i go laef hem wan. Biaen, mi mo Sylvia i joenem Betel famle long 2007, hemia wan privilej we mitufala i enjoem kam kasem tede. Fasbon boe blong mitufala Mike, i wan elda mo hem i mekem wok blong paenia wetem waef blong hem, Monica. Gabriel tu i wan elda, mo hem wetem waef blong hem, Ambra, tufala i stap prij long Itali. Samira, i mekem wok blong paenia mo i wok olsem wan rimot volontia long Betel.

MI GLAD LONG OL DESISEN WE MI MEKEM

Yes, mi mi mekem plante bigfala desisen long laef blong mi. Be mi no rigret nating. Mi mi glad long ol desisen blong mi. Mi mi glad long evri samting we mi naf blong mekem long wok blong Jehova. Long ol yia we i pas, mi luksave se i impoten blong gat wan strong frensip wetem Jehova. Nating sipos desisen blong yu i smol o i bigwan, be Jehova i save givim pis ya we i “bigwan tumas i bitim olgeta save blong yumi.” (Fil. 4:6, 7) Mi mo Sylvia i laekem tumas wok we mitufala i mekem long Betel, mo mitufala i haremsave we Jehova i blesem ol desisen blong mitufala, from we oltaem mitufala i putum hem fasples long laef blong mitufala.