Taem Bigfala Hil i Traem Kasem Solwota

MAN BLONG WEKAP! LONG VENESWELA I RAETEM STORI YA

BIGFALA taon blong Veneswela, hemia Caracas. I gat wan bigfala hil we i seraotem taon ya long solwota, hil ya i hae olsem 2,000 mita, mo nem blong hem El Ávila. Long saed i go long not, i gat fulap man oli stap long wan smol graon we i folem solwota i go. bigfala epot blong Veneswela i stap long ples ya tu. Ol turis long epot ya we oli wantem go long Caracas, oli mas pastru long wan bigfala tanel we oli katem long hil ya.

Las yia long Disemba, bigbigfala ren i foldaon long El Ávila, gogo graon i fulap long wota nomo. I luk olsem we ol saed blong hil ya oli bosta, from se plante taosen kubik mita blong wota i stap folfoldaon long ol saed blong hem, olsem wan kaskad. Wan man i talem se i luk olsem we hil ya i stap traem kasem solwota. Bigfala kaskad ya wetem sofmad, ol ston, mo ol wud, i kavremap olgeta haos, ol rabis haos wetem ol flas haos tu. Wota ya i wasemaot ol bed, aesbokis, televisin, mo plante man tu. Wan olfala man i bin tingting se hemia en blong wol ya.

Sam taem i pas, ale, ren ya i stop, mo wota i stat godaon. Maet 50,000 man oli ded mo 400,000 man oli lusum haos blong olgeta. I klia from wanem oli bin talem se “Veneswela i neva luk wan bigfala trabol olsem bifo.”

Klosap Oli Lus

Long Disemba 15, Juan Carlos Lorenzo wetem papa blong hem, tufala i stap fas long medel blong tu reva we wota blong tufala ya i stap kam antap bigwan. Tufala i kamaot long trak mo tufala i go haed long wan haos wetem 35 narafala man mo woman. Be, i no longtaem, wota i ron i kam insaed mo i kam antap kwiktaem. Olgeta evriwan oli klaem i go antap long ruf blong haos ya. Ol bigbigfala ston mo wud oli stap kilkilim haos ya afsaed. I no longtaem, ol stonwol blong stori haos ya oli folfoldaon, nao ol bigfala pos mo ruf nomo oli stap. Haos ya i stap seksek from ol samting we i stap kilkilim saed blong hem.

Nao oli luk wan helikopta i stap kam, be hem i no save sidaon long ruf blong haos ya from se ruf i no strong nating. Ale hem i gobak. Taem Juan Carlos mo papa blong hem i luk samting ya, tufala i ting se bambae tufala i mas ded nao. Ale tufala i krae, mo tufala i talem tata long tufala. Be tufala i sek we tu helikopta bakegen oli kamtru, nao sloslou, tufala paelot ya we tufala i savegud wok blong paelot, oli pulum ol wanwan man long ruf ya oli go antap mo putum olgeta long sefples. Taem tufala helikopta ya i tanraon blong gobak, haos ya i foldaon evriwan, mo bigfala wota we i ron strong i karem ol samting i go. !Ol man long ruf oli jes gat taem blong kamaot nomo!

Ol smol plen, ol trak, mo ol sip we oli stap yusum blong karem ol soldia blong ami, oli karemaot plante taosen man oli go long sef ples. Ol man long ol bot oli sakem ol longlongfala rop oli go long fulap man mo woman we oli stap traem blong ronwe long wota ya, nao olgeta ya oli holem ol rop ya blong pastru long bigfala wota blong kasem ol bot. Sam long olgeta ya oli karem ol pikinini long solda blong olgeta. Samfala oli karem sam smosmol samting blong olgeta, be plante oli kam wetem klos we oli havem nomo.

Wok Blong Givhan

Long hed ofis blong ol Witnes blong Jeova long Veneswela, oli kasem nius blong bigfala trabol ya. Ale, wantaem nomo, oli stat hivimap ol samting we oli nidim blong givhan long ol man. Be, ol rod oli no nogud mo ol wud mo doti i stap blokem olgeta. Afta we sam dei i pas, oli klinim wan smol haf blong bigfala rod, blong ol wokman nomo oli save pas long hem. Nao oli letem ol trak blong ol Witnes oli pas, we oli karem meresin wetem ol man we oli savegud wok blong givhan long ol trabol olsem. Wan haeman i talem biaen se: “Gavman i savegud se ol Witnes blong Jeova oli stap wetem ol faswan man we oli kam blong givhan, mo oli save se ol Witnes oli karemaot plante man long trabol ples ya.”

Ol Witnes oli jusum sam man blong oli go lukaot olgeta we oli nidim help. Oli mekem plan tu blong sam trak oli karem ol man we oli aot long haos blong olgeta, oli go long Caracas. Plante oli kasem ples ya we oli no moa gat wan samting blong olgeta. Samfala wokman oli go stap long sam ples long taon blong givimaot kakae, klos, mo meresin long ol man we oli nidim. Be klosap evriwan oli no nidim kakae mo klos nomo. Oli nidim wan ples blong slip tu. Ol Kristin brata oli glad blong tekem plante oli go stap long haos blong olgeta.

Longtaem afta we trabol ya i kamaot, haos blong samfala i fulap yet long ol fren mo famle. Joel mo Elsa, we tufala i Witnes long Puerto Cabello, oli stap long wan smol renhaos nomo. Wan manis afta long bigfala ren ya, i gat 16 man mo woman oli stap yet wetem tufala. Plante man oli lusum haos blong olgeta wetem wok blong olgeta tu. Ples we oli bin wok long hem i no moa gat.

Fastaem, ol naesfala ples blong ol turis klosap long solwota, oli fulap long ol man. Be, sore tumas, naoia oli nogud olgeta. Sam trak, sofmad i berem haf blong olgeta, sam narafala trak oli flat agensem ol stonwol, sam oli raon long ol pos, sam oli fas long ol doa mo windo. Ol sofmad long rod we i kam strong finis, i mekem se long sam ples, rod i kam antap 3 mita. Wan man we i wokbaot long rod i save lukluk i go insaed long stori haos mo long sam ples, hem i hae olsem ruf blong ol haos.

Samfala long Veneswela oli talem se trabol ya i tijim olgeta long wan bigfala samting, hemia blong no tingting tumas long ol sas samting. (Luk 12:29-31) Plante oli kasem save long advaes blong Jisas Kraes se: “I nogud yufala i stap hivimap ol gudgudfala samting blong yufala long wol ya blong kam rijman. Long ples ya, ol kakros oli save kakae, mo rosta i save spolem ol samting, mo i gat ol man blong stil we oli save brekem haos, blong go insaed blong stil. Yufala i mas hivimap ol gudgudfala samting blong yufala long heven. Long ples ya, kakros i no save kakae, mo rosta i no save spolem ol samting, mo ol man blong stil oli no save brekem haos, blong go insaed blong stil. Mi mi talem olsem, from we long weples we ol gudgudfala samting blong yufala i stap long hem, be oltaem tingting blong yufala tu i stap long ples ya.”—Matiu 6:19-21.

[Map/Foto blong pija long pej 17]

(Lukluk niuspepa)

VENESWELA

Trabol ples ya

Caracas

COLOMBIA

[Tok blong pija long pej 17]

Rubén Serrano wetem haf haos blong hem we i stap

[Tok blong pija long pej 19]

1. Long Caracas, ol wokman we oli no kasem pei, oli hivimap ol samting blong givhan long ol man we oli kasem trabol

2, 3. Olgeta long kongregesen blong Maiquetía, oli karemaot sofmad we i dip olsem tu mita long Haos Kingdom blong olgeta

4. Ol Witnes ya oli lusum haos blong olgeta, nao oli givhan blong bildim niufala haos blong olgeta mo blong ol narafala

5. Wan long ol niufala haos we klosap i finis, long San Sebastián de los Reyes