Kalabus i No Blokem Mi Blong Fren Gud Wetem Jehova

Long 1966, mifala i muv i gobak long Yukren. Wan long ol faswan samting we mi tingbaot, hemia se taem mi gat fo yia, mi go visitim abu man blong mi long kalabus. Mi mo mama i tekem tren mo travel longwe stat long Kryvyi Rih, Yukren, blong go kasem kalabus ya we i stap long Mordovian long sentrol Rasia. Mifala i gat raet blong spenem tu aoa nomo wetem abu man blong mi, mo oltaem i mas gat wan gad we i stap. Nating se i olsem, oli letem mi blong mi save sidaon long leg blong abu man.

Mi Gohed Blong Trastem Jehova Taem Mi Stap Long Skul

Taem mi stap gruap long Yukren, i gat plante samting we i traem fasin blong mi blong trastem Jehova. Eksampol, taem wan pikinini i stat blong go long skul, hem i mas werem wan baj long yunifom blong hem. Sep blong baj ya i olsem sta mo i gat pija blong man ya Lenin,a taem hem i smol. Afta long sam yia, ol pikinini oli mas werem wan red kaliko i goraon long nek blong olgeta blong soemaot se oli sapotem ol tingting blong Lenin. Mi mi no wantem nating blong werem ol samting ya we oli joen wetem politik, from mi save se yumi mas wosipim Jehova nomo.

Perens blong mi i halpem mi blong mi wan mi tekem desisen blong wosipim Jehova. Oli mekem olsem, taem oli tekem taem blong eksplenem mo givhan long mi blong kasemsave from wanem yumi no mas joen long politik. Mo tu, oli leftemap tingting blong mi blong wok had long skul, from hemia i save leftemap nem blong Jehova.

Wan dei, wan man we i stap raetem nius long magasin ya Nauka i religiia (Sayens Mo Relijen) we i blong pulum ol man blong oli no trastem God o relijen, i kam long skul blong mifala. Ol tija oli putum mi mi sidaon long fored, taem man ya i stap givim tok blong hem. Mak blong man ya i blong pulum ol pikinini blong oli no bilif long God.

Afta we man ya i mekem tok blong hem, ol tija oli tekem mi mi go biaen long stej blong man ya i toktok long mi. Taem man ya i askem se mi stap go long wanem jej, mi no fraet blong ansa se: “Mi mi wan Witnes blong Jehova.” Nao hem i no talem eni samting, be i jes talem tangkiu nomo from we mi stap kwaet mo mi lesin long tok blong hem. !Hemia i mekem ol tija oli kros moa!

Famle Blong Mi i Gohed Blong Trastem Jehova

Famle blong mi i mas dipen bigwan long Jehova from we mifala i stap printim ol buk we i tokbaot Baebol long haos nomo, mo mifala i mas seremaot long ol man. Antap long hemia, papa blong mi i mekem wok blong eria elda long sentrol Yukren, blong visitim ol kongregesen mo ol grup.

Long Februari 1978, taem mi kambak long skul long aftenun, mi luk se evri samting insaed long haos blong mifala oli olbaot. Ol polis oli bin kam pas long haos mo oli tekemaot evri buk we oli tokbaot Baebol. Samting ya i hapen tu dei bifo we smol brata blong mi Pavlik i bon.

Nekis dei, taem mi mo smol brata blong mi Mykhailo i go long skul, ol tija oli stap lukluk mitufala from we oli ting se perens blong mitufala oli ol spae blong Amerika. Be biaen, oli luksave se hemia i no tru. !Sam pikinini long klas we bifo oli bin gat rong tingting, naoia oli kam ol Witnes blong Jehova!

Long 1981, ol polis oli kam long haos blong mifala bakegen. Nating se long taem ya mi no gat 18 yia yet, be oli talem se mi tu mi mas folem papa mo abu man i go long ofis blong loea blong gavman. Taem mifala i go, wan polis i traem mekem mi mi fraet mo i talem se bambae oli putum mi long kalabus. Long semtaem, i gat wan narafala man we i no werem yunifom blong polis i kam talem long mi se, mi save gat wan gudfala fiuja sipos mi halpem olgeta. Tufala polis ya i traem mekem olsem se wan i gudfala polis mo narawan i wan rabis polis. Ol polis ya oli gohed blong traem pulum mi blong halpem olgeta, nao oli tokbaot taem ya we papa, abu man, mo ol angkel blong mi oli bin go long kalabus. Be oli no save se samting we oli talem, i mekem mi sua moa se wetem help blong Jehova, bambae mi naf blong stanap strong long kalabus.—Filipae 4:13.

Mi Gohed Blong Trastem Jehova, Taem Mi Stap Long Kalabus

Taem mi gat 18 yia, mi kasem wan mesej blong mi joenem ami. Be from we mi no wantem joen long ami, oli putum mi long kalabus blong wet kasem taem we bambae mi pas long kot. Insaed long rum blong kalabus we mi go long hem, i gat samwe 85 man, mo i gat 34 bed nomo we mifala evriwan i mas serem. Mo mifala i gat raet blong swim wan taem nomo long wan wik.

Taem mi go insaed mo oli sarem doa blong rum blong kalabus ya, evri man we i stap insaed oli lukluk mi. Nao wantaem nomo, wan man we i sidaon long kona i askem from wanem oli putum mi long kalabus. Nating se mi fraet, be mi tingbaot stori blong Daniel long Baebol we ol laeon oli no kakae hem. Stori ya i halpem mi blong trastem Jehova fulwan mo stap kwaet.—Aesea 30:15; Daniel 6:21, 22.

Afta we mifala i kakae long sapa, wan prisena i stat blong askem plante kwestin long saed blong bilif blong mi. Sloslo i no moa gat noes from we ol narafala prisena tu oli stat blong lesin long storian blong mitufala. Mi spenem fo o faef aoa olsem blong tokbaot bilif blong mi long olgeta. !Mi mi glad tumas se Jehova i halpem mi long taem ya!

Bifo we mi pas long kot, mi askem strong blong Jehova i givim waes long mi mo mekem mi no fraet blong difendem bilif blong mi. Long kot, loea i traem blong pruvum se tok ya we mi talem se mi bilif long God, i jes wan eskius blong mi no joen long ami. Mi traem bes blong mi blong pruvum se sipos mi joen long ami, bambae mi mekem Man ya we i gat bigfala paoa long ful yunives i no glad long mi. Nating se i olsem, long 1982, kot i mekem desisen se mi gilti mo bambae mi spenem tu yia long kalabus blong mekem ol strong wok.

Mi mi glad tumas se i gat faef nara Witnes we oli stap long kalabus ya wetem mi. Nating se mifala i save toktok sam minit nomo, be mifala yusum gud ol smol taem ya blong tokbaot wan vas blong Baebol. I no gat wan long mifala we i gat Baebol, be plante taem ol famle mo ol fren oli raetem ol vas blong Baebol insaed long ol leta we oli sanem i kam long mifala. Mo samtaem, mifala i faenem sam vas blong Baebol tu insaed long ol buk we oli stap long kalabus.

Mi Gohed Blong Trastem Jehova Taem i Gat Wan Emejensi

Long 1983, taem mi stap insaed long garaj blong prisen, wan masin blong muvum ol hevi samting i mestem wan hip blong ol aean i foldaon, we hevi blong olgeta i samwe tu metrik tan. Ol aean ya oli bangem mi, nao mi foldaon long graon, mo oli smasem lef leg blong mi.

Mi prea long Jehova blong i givim paoa long mi from we bodi blong mi i soa bitim mak. Woman we i nes blong prisen, i talem se mi mas singaot bigwan mo tok swea blong mi no harem nogud tumas. Be mi no mekem olsem, mi sing nomo long ol singsing blong Kingdom.

Blong go kasem hospital, mifala i mas tekem wan trak, wan spid bot, mo biaen wan ambulans. Hemia i tekem sikis aoa, mo long taem ya mi lusum plante blad. Mi mi sua se bambae mi pas long operesen, taswe mi prea blong Jehova i givim waes long ol dokta mo blong oli respektem bilif blong mi long saed blong blad. Taem mi eksplenem bilif blong mi long dokta, hem i no wantem lesin, be mi plis long hem blong i respektem desisen blong mi. Mo mi talem se mi rere blong kasem blem, sipos i gat problem i kamaot from we mi no tekem blad. Mo mi glad tumas taem hem i agri blong no yusum blad. Nating se i olsem, oli mas katemaot lef leg blong mi.

Afta long operesen, mi mi slak bitim mak. Blong sam wik, ol dokta oli no sua se bambae mi laef o mi ded. Be wan aftenun, wan nes i talem se sipos mi wantem kam gud, mi mas kakae ol kakae we oli gud moa i bitim kakae blong prisen, mo hem i talem se ol nes bambae oli kipim ol kakae ya long wan aebokis we i stap klosap. Evri dei, mi mas kakae wan spun blong hani, wan eg, mo smol bata. Perens blong mi i mekem rod blong mi save kasem ol samting ya, afta we oli harem nius blong aksiden ya. Be ofisa we i wok long ples blong ol pasel, i akseptem ol samting ya wan taem nomo.

Han blong Jehova i no sot. (Aesea 59:1) Afta we ol nes oli jenisim bandej blong mi, oli stap serem kakae blong olgeta wetem mi. Mo tu, oli stokem sam gudfala kakae bakegen long aesbokis. Hemia i mekem mi tingbaot stori blong wido ya long Baebol, we jag blong oel blong hem i no save finis.—1 King 17:14-16.

Sloslo, helt blong mi i stap kam gud moa. Mi bin kasem 107 leta we i kam long ol famle mo ol fren blong mi, hemia i leftemap tingting blong mi bigwan, mo mi raet i gobak long olgeta evriwan. !Mo tu, mi kasem wan pasel we i kam long ol brata blong mi we oli stap long wan narafala prisen!

!Mi no bin swim blong tu manis, be naoia mi save swim bakegen! Mo mi wantem tumas blong gobak long prisen blong joen wetem ol brata blong mi bakegen.

Bifo we mi aot long hospital, wan long ol dokta we i stap rerem ol pepa blong mi i singaot mi mi go long ofis blong hem, mo i askem plante kwestin long saed blong bilif blong mi. Afta we mitufala i storian, hem i talem se hem i hop se bambae mi gohed blong holemstrong long bilif blong mi. !Mi mi sapraes blong harem wan man we i werem yunifom blong ami i toktok olsem!

Long Eprel 1984, mi pas long fored blong ol haeman blong kalabus mo oli askem se bambae mi joen long ami o nogat. Nao mi talem se mi mi gat wan leg nomo mo mi stap wokbaot wetem stik, kwestin blong olgeta i no stret. Ale oli askem wan nara kwestin: “?Bambae yu mekem wanem sipos yu gat tu leg?” Mi talem se bambae mi no save joenem ami, mo se mi gat strong tingting blong stap tru long God blong mi. Nao oli talem long mi se bambae oli meksua se mi stap long prisen kasem we mi flatem ol yia blong mi. Be oli letem mi mi aot eli nomo, nating se i gat tu manis mo 12 dei i stap yet.

Mi Gohed Blong Trastem Jehova Afta We Mi Aot Long Prisen

Wan yia afta we mi aot long prisen, mi gat wan giaman leg. Evri moning, mi spenem wan aoa blong putum giaman leg ya. Taem ples i kolkol, i no isi blong werem giaman leg ya mo i had blong lef leg blong mi i stap wom from we blad i no ron gud. Taem mi gat 19 yia, mi no moa save ron, be mi stap pijarem taem ya we bambae mi save ron bakegen long niufala wol.—Aesea 35:6.

I had blong mi faenem wan wok, from we plante bos oli no wantem tekem wan man we i handikap. Nating se leg blong mi i nogud, mi neva mekem wan wok we mi sidaon nomo fuldei. Mi bin wok smol taem olsem wan mekanik, blong fiksim ol trak. Mo biaen, mi wok long konstraksen.

Long 1986, mi maredem wan gudfala sista we nem blong hem Svitlana. Tufala abu blong Svitlana oli ol Witnes, sem mak olsem tufala abu blong mi. Oltaem Svitlana i stap talem se hem i glad tumas se taem mitufala i stat blong fren, mitufala i agri se oltaem bambae mitufala i putum Jehova i stap fasples long mared blong mitufala.

Mitufala i gat tu pikinini, hemia Olia mo Volodia. Tufala i lanem sam samting long saed blong konstraksen, taem oli halpem mi blong riperem olfala haos blong mifala. Taem tufala i kam bigwan moa, tufala i glad blong givhan long ol konstraksen projek blong Haos Kingdom. Mo tu, tufala i stat blong mekem wok blong fultaem paenia. Naoia Olia i mekem wok blong Jehova fultaem long konstraksen, mo Volodia i wan elda.

Oltaem Svitlana i sapotem mi, mo hemia i givhan blong mi save mekem gud ol wok blong mi long kongregesen. Long ol yia 1990, plante kongregesen long Yukren oli gat bitim 200 pablisa mo wan o tu elda nomo. Mo wan taem long wan manis long wiken, mi stap tekem ol buk mo magasin i go long ol kongregesen we oli stap long sentrol Yukren.

Mi Gohed Blong Trastem Jehova Long Ol Yia We i Jes Pas

Long 2022, mi mo Svitlana i tekem desisen blong lego ples blong mitufala long Kryvyi Rih. Mo naoia, mitufala i stap givhan long wan kongregesen long Ostria.

Stat taem mi smol, mi lanem plante samting long eksampol blong ol famle blong mi we oli Witnes. Olgeta oli glad nomo long wanem samting we oli gat, nating se oli fesem plante hadtaem. Baebol i save givhan long yumi blong kasemsave moa long Krieta blong yumi, mo i halpem yumi blong kam klosap moa long hem. (Jemes 4:8) Frensip we yumi gat wetem Jehova, hemia nao samting we i mekem se laef blong yumi i gat mining. Mi mi glad tumas se nomata wanem hadtaem we mi kasem, be mi naf blong givim ona i go long Jehova, stret olsem we hem i mas kasem.