Wan Buk Blong Stadi Baebol We i Defren Long Ol Narawan

Long Jenuware 2021, Hed Kampani i talemaot wan niufala buk blong stadi Baebol, nem blong hem !Enjoem Laef Olwe!a ?Nius ya i mekem wanem long yu? Matthew blong Kanada, i talem se: “!Mi glad tumas! Mo taem mi harem ol tok mo wajem ol video blong eksplenem from wanem oli wokem buk ya mo olsem wanem oli traem yusum fastaem, mi mi glad moa. Mi no save wet blong luk mo yusum buk ya.”

!Enjoem Laef Olwe! i soemaot wan niufala rod blong mekem Baebol stadi. Be i no hemia nomo we i mekem buk ya i defren long ol narawan. Yu filim se pepa tu i defren. Blong kasem save moa long saed ya, i gud yumi tokbaot olsem wanem mifala i wokem buk ya.

Wan Niufala Buk We Yumi Filim Se i Defren

Pepa i tik moa. ?From wanem? I gat bitim 600 naesfala pija long buk ya !Enjoem Laef Olwe!, hemia ten taem moa long namba blong ol pija long buk ya Tijim Wanem. Mo tu, i gat moa spes long niufala buk we i no gat raeting o pija long hem. Be tufala samting ya i mekem se i gat wan problem: Taem pepa i tintin, yu save luk ol pija long baksaed blong pej, tru long pepa. Blong blokem samting ya, ol brata long Intenasnal Printing Dipatmen (IPD) long Wallkill, New York, U.S.A., oli traem fo defren kaen pepa we mifala i stap yusum blong printim ol buk. Raeting Komiti Blong Hed Kampani i lukluk wanwan long olgeta, mo i jusum pepa we i tik moa. Praes blong pepa ya i 16 pesen antap long praes blong pepa we mifala i yusum long bighaf blong ol narafala buk. Be pepa we i tik moa i mekem se ol Baebol studen oli save ridim evri pej blong !Enjoem Laef Olwe! we oli no luk ol pija long baksaed blong pej.

Kava blong buk ya tu i defren. Bambae yu filim se kava blong niufala buk ya tu i defren long kava blong ol narafala buk blong yumi, from we mifala i yusum wan defren samting blong kavremap mo protektem. Kava blong ol narafala buk i saen, be kava blong niufala buk ya i no saen, mo from samting ya pija we i stap long hem i kamaot klia moa. Mo tu, samting we mifala i putum long kava i protektem buk, mekem se i no kam nogud kwiktaem from we yumi yusum plante. Be praes i faef taem moa i bitim samting we mifala i yusum long ol narafala buk. Taswe plante branj ofis oli wok tugeta blong faenem hemia we i no sas tumas.

?From wanem mifala i yusum ol samting we oli sas moa? Wan brata we i wok long IPD i eksplenem se: “Bambae yumi yusum buk ya plante, mo yumi wantem se i stap gud mo i luk naes oltaem.” Eduardo, we i wok long Ofis Blong Printim Ol Buk long Brasil, i talem se: “Mifala i glad tumas blong luk se oganaesesen blong Jehova i yusum ol gudfala samting blong mekem buk ya i naes, i save stap longtaem, mo yumi glad blong holem long han blong yumi, be long semtaem, oli yusum ol presen mane long waes fasin.”

Printim Ol Buk Long Taem Blong COVID-19 Pandemik

Long Maj 2021, mifala i stat blong printim !Enjoem Laef Olwe! Hemia i no isi from we long taem ya i gat COVID-19 pandemik. From we ol Betel oli lokdaon, mifala i no save dipen long ol brata mo sista afsaed blong oli kam givhan, mo mifala i no save invaetem ol niufala brata blong oli kam stap long Betel. From samting ya, i no gat naf wokman long sam ples blong printim buk, mo mifala i klosem sam long ol ples ya from ol rul we gavman i putum long saed blong pandemik.

?Olsem wanem mifala i winim trabol ya? Taem ol ples blong printim buk oli save wok, sam brata mo sista blong ol narafala dipatmen long Betel, oli kam givhan blong printim ol buk. Joel we i wok long IPD, i talem se: “From we oli rere blong lego ol narafala wok blong olgeta mo oli glad blong lanem niufala wok ya, i posibol blong mifala i printim ol buk ya.”

Nating se i no isi, be mifala i printim finis plante milian kopi blong !Enjoem Laef Olwe! Blong wokem olgeta, mifala i nidim plante defren samting olsem ol plet blong masin blong printim, spesel samting blong putum long kava, pepa, ink, mo glu. Long faef manis nomo, mifala i spenem bitim 259 milian vatu long ol samting ya. Blong sevem mane, mifala i lukaot gud blong no printim tumas buk, mifala i printim nomo namba we ol kongregesen oli nidim.

“Buk Ya i Naes Tumas”

?Wanem tingting blong ol tija mo studen long niufala buk ya? Paul, wan brata long Ostrelia, i talem se: “Mi laekem tumas blong yusum buk ya !Enjoem Laef Olwe!, i mekem mi mi glad tumas blong lidim ol Baebol stadi. Evri pej i luk naes mo i isi blong ridim, mo i pulum studen blong i joen fulwan long stadi. Oli joenem ol klia save wetem ol kwestin we oli kasem hat blong man, ol video, ol pija, ol jat, mo nekis step we studen i save tekem. Buk ya i naes tumas, mo i mekem se mi wantem kamgud moa blong tijim ol man.”

Wan Baebol studen long Yunaeted Stet i talem se: “Mi laekem tumas niufala buk ya. Ol pija oli halpem mi blong kasem save long ol bigfala poen. Ol video oli tajem hat blong mi mo pulum mi blong tekem aksen.” Studen ya i stadi tu taem evri wik, mo i stap joen long ol miting blong kongregesen.

Mifala i mas printim yet plante milian kopi blong buk ya long plante lanwis. !Hed Kampani i agri se bambae mifala i printim buk ya long 710 lanwis, hemia 340 moa long buk ya Tijim Wanem!

?Mane blong printim ol buk ya i kam wea? Hemia ol presen mane blong sapotem wok blong yumi long fulwol, we plante oli givim tru long donate.jw.org. Mifala i talem tangkiu tumas long gladhat blong yufala blong givim presen mane, we i halpem mifala blong wokem ol buk blong stadi Baebol wetem olgeta we oli wantem save Jehova mo “enjoem laef olwe.”—Ol Sam 22:26.