Ol Bilding We Oli Givim Ona Long Bigfala Tija Blong Yumi

Jehova i laekem tumas blong tijim ol man blong hem. From samting ya, oganaesesen blong hem i statem sam skul blong trenem ol studen blong mekem wok we Jehova i givim. Wan long ol skul ya, hemia Skul Blong Kingdom Ivanjelis (SKI). Long ol yia we i jes pas, oganaesesen blong God i mekem program blong skul ya i kam gud moa, wetem ol bilding tu we oli mekem ol tiokratik skul ya long olgeta. Oli wantem se ol studen mo ol tija oli harem gud blong stap long ol ples ya, mo i isi blong oli lanem samting. ?Olsem wanem presen mane blong yu i givhan long saed ya?

Plante Moa Studen Oli Joen Long Ol Bilding We Oli Moagud

Plante yia finis, i gat ol tiokratik skul oli gohed long ol Haos Kingdom mo Haos Asembli. Taswe, ?from wanem oli jes bildim o wokem gud bakegen plante bilding we oli yusum nomo blong ol tiokratik skul? Tingbaot tri risen:

I nidim plante moa man blong prij. Christopher Mavor, we i wan helpa blong Sevis Komiti blong Hed Kampani, i talem se: “Plante branj ofis oli talem se i gat bigfala nid long saed blong wok blong prij. Wan long olgeta, hemia branj ofis blong Brasil, we i talem long 2019 se oli nidim 7,600 moa brata mo sista we oli tren long SKI, blong wok long ol teritori we branj ofis ya i lukaot long hem.” Branj ofis blong Yunaeted Stet tu i gat nid blong plante moa paenia we oli save trenem ol narafala blong prij long pablik ples long ol bigfala taon, prij long ol sip long haba, mo long ol prisen. Mo tu, i gat nid blong ol brata long Lokol Disaen/Konstraksen Dipatmen mo ol Komiti Blong Toktok Long Ol Dokta. Olgeta we oli tren long SKI oli save mekem ol wok ya.

Plante moa studen. Plante branj ofis oli no save akseptem ol studen we oli fulumap fom blong kam long skul ya. Tingbaot Brasil. Long wan yia, branj ofis long Brasil i kasem 2,500 fom blong ol brata mo sista we oli wantem kam long SKI. Be from we i no gat naf bilding blong mekem skul ya long hem, oli save akseptem 950 studen nomo.

Ol gudfala rum blong slip. Taem ol studen oli go long wan Haos Kingdom o Haos Asembli blong mekem skul ya, klosap oltaem oli slip long haos blong ol brata mo sista raonabaot. Hemia i wok gud long ol kantri we i no gat plante klas evri yia. Be sipos i gat plante klas, maet ol pablisa raonabaot oli no naf blong givim ples blong slip long ol studen blong plante manis evri yia. Taswe,ol brata oli stap wokem ol rum blong slip klosap long klasrum, we oli stret long nid blong ol studen.

Praes blong wokem wan bilding we i gat klasrum, ol rum blong slip, mo ol narafala ples we ol tija mo 30 studen oli nidim, i save kasem plante milian vatu. Praes i dipen long ples we oli bildim mo sam narafala samting bakegen.

Ol Ples We Oli Jusum Mo Plan Blong Bilding

Klosap oltaem oli jusum wan ples we i kwaet, i afsaed long bigfala taon, be i klosap long pablik transpot. Oli jusum moa ol ples we i gat plante pablisa, olsem nao ol pablisa oli save givhan blong lukaot long ol bilding ya mo mekem ol skul oli ron gud.

Insaed long ol bilding ya i gat ol laebri, ol rum blong stadi, ol kompiuta, ol printa, mo sam narafala masin. Plante taem i gat wan rum we ol studen mo ol tija oli save joen wanples blong kakae. Mo tu, i gat ples blong mekem eksasaes mo spel.

Ol brata oli tingting gud long plan blong klasrum. Troy, we i wok long Dipatment Blong Disaen/Konstraksen Blong Fulwol long Warwick, New York, i talem se: “Mifala i askem help long Tiokratik Skul Dipatmen blong mekem wan plan we i isi blong ol studen oli lanem samting. Ol brata long dipatmen ya oli givim advaes long saes mo plan blong klasrum, wetem ol windo blong letem laet i kam insaed, odio, mo ol video masin.” Long saed blong ol samting blong odio, wan tija blong SKI long Hangari we nem blong hem Zoltan, i talem se: “Long stat, mifala i no gat ol maekrofon, mekem se oltaem mifala i mas talem long ol studen blong oli toktok laod. Be naoia, i no moa gat problem ya from i gat maekrofon long evri desk.”

“Jehova Nao i Invaetem Mifala”

?Wanem tingting blong ol tija mo studen long ol niufala bilding blong mekem skul long olgeta? Angela we i go long SKI long Palm Coast, Florida, Yunaeted Stet, i talem se: “Ples i kwaet mo i gat pis. Plan blong evri samting olsem klasrum mo rum blong slip i nambawan, mekem se mifala i save putum tingting i stap fulwan long kos mo stadi.” Csaba, we i wan tija long Hangari, i laekem tumas blong kakae wanples wetem ol studen, from we long taem ya, “plante studen oli tokbaot laef blong olgeta mo ol samting we i hapen long olgeta. Long rod ya, mifala i save gud ol studen, mo mifala i save tijim olgeta long fasin we i stret long nid blong olgeta.”

Ol studen mo tija oli luk se ol niufala bilding oli wan blesing we i kam long “Bigfala Tija” blong yumi, Jehova. (Aesea 30:20, 21) Wan sista long Filipin we i bin go long SKI long wan bilding we oli wokem gud bakegen, i talem se: “Evri samting raonabaot long mifala long skul ya i mekem mifala i harem se mifala i spesel, mifala i no ol studen nomo, be Jehova nao i singaot mifala i kam. Hem i wantem se mifala i harem gud taem mifala i stadi dip long Tok blong hem.”

Ol presen mane blong yufala, we plante taem yufala i givim tru long donate.jw.org, i mekem se i posibol blong bildim, wokem gud bakegen, mo fiksimap ol bilding blong mekem skul ya long hem. Tangkiu tumas long ol presen mane we yufala i givim wetem gladhat.