Toktok Kaen Mo Soemaot Ol Defren Fasin Long Voes Blong Yu

LONG laef blong yumi, i impoten blong soemaot se yumi harem olsem wanem. Taem yumi mekem olsem, yumi soemaot wanem i stap long hat blong yumi, yumi soemaot se yumi wanem kaen man, mo tu, yumi soemaot tingting we yumi gat long wan samting mo long ol man. Plante man we oli fesem ol nogud samting long laef blong olgeta, oli no soemaot se oli harem olsem wanem, oli haedem nomo. Mo long sam kantri, i no fasin blong ol manples blong soemaot se oli harem olsem wanem. Be Jehova i pulum yumi blong yumi wokem ol gudfala fasin mo tingting, mo blong yumi soemaot olgeta.—Rom 12:10; 1 Tes. 2:7, 8.

Taem yu toktok, yu talemaot tingting blong yu. Be sipos yu no soemaot stret se yu harem olsem wanem long ol tingting ya we yu stap talemaot, man we i lesin i save ting se yu stap giaman. Sipos voes blong yu i soemaot ol fasin we oli laenap wetem ol tok we yu talem, ol man bambae oli harem gud moa blong lesin long tok blong yu. Bambae ol tok blong yu i gat moa mining, mo bambae i tajem hat blong olgeta we oli lesin.

Yu Toktok Kaen. Kaen fasin i joen wetem ol gudfala tingting we yu gat long wan man. Taswe, taem yu tokbaot ol gudgudfala fasin blong Jehova mo yu presem Jehova from we hem i gud tumas, voes blong yu i mas soemaot se yu lavem hem. (Aes. 63:7-9) Mo taem yu storian wetem ol man, ol tok blong yu i mas soemaot se yu laekem olgeta.

Yumi save tingbaot man ya we i gat leprosi, we i plis long Jisas blong i tekemaot sik blong hem. ?Yu ting se voes blong Jisas i olsem wanem taem hem i talem long man ya se: “Yes, mi mi wantem. !Yu klin!”? (Mak 1:40, 41) Yumi save tingbaot woman ya we sik blong ol woman i stap long hem oltaem blong 12 yia. Hem i kam biaen long Jisas mo i tajem en blong klos blong hem. Jisas i haremsave se wan man i tajem hem, mo woman ya i luk se hem i no save haed. Ale hem i kam long Jisas we i seksek tumas, i nildaon long fored blong hem, i talemaot long fes blong ol man from wanem hem i tajem klos blong Jisas, mo i talem tu se sik blong hem i finis. ?Yu ting se Jisas i toktok olsem wanem taem hem i talem long woman ya se: “Dota blong mi, bilif blong yu i mekem yu yu gud bakegen. Yu go, yu no moa wari bakegen”? (Luk 8:42b-48) Kaen fasin we Jisas i soemaot long ol man ya, i mekem se tede yumi harem gud yet blong ridim ol stori ya.

Taem yu mekem olsem Jisas we i sore long ol man mo i wantem tumas blong halpem olgeta, toktok blong yu bambae i soemaot samting ya. Kaen fasin ya i mas tru, i min se hem i mas kamaot long hat blong yu, mo i no mas bitim mak. Taem yu toktok kaen, tok blong yu i save gat paoa long fasin we man i mekem. Bighaf blong ol save we yu tokbaot long wok blong prij, i stret blong talem wetem kaen fasin mo sore. Samting ya i tru moa taem yu wantem we man i kasem save long wan tijing, no taem yu leftemap tingting blong man, no yu givim advaes, no yu sore long man.

Taem yu harem se yu laekem ol man, i gud yu soemaot samting ya long fes blong yu. Sipos yu toktok kaen, bambae yu pulum ol man oli kam long yu, olsem wan faea i pulum ol man oli kam klosap long hem taem ples i kolkol. Sipos fes blong yu i no soemaot se yu laekem ol man, maet oli ting se yu no kea long olgeta. Man i no save putum kaen fasin olsem we i putum wan giaman fes—fasin ya i mas kamaot long hat.

Voes blong yu i save soemaot se yu lavem ol man. Sipos voes blong yu i strong tumas no i raf, ating bambae i had blong yu toktok kaen. Be sipos yu traehad, sloslo bambae yu yu naf blong mekem olsem. Yu mas tingbaot se taem yu toktok kwik mo yu katkatem ol tok blong yu, bambae ol man oli save harem se yu no toktok kaen. I gud yu traem lanem blong pulum ol tok blong yu lelebet. Hemia i save givhan long yu blong yu toktok kaen.

Samting we i moa impoten, hemia samting we yu tingting long hem. Sipos yu stap tingbaot ol man we yu toktok long olgeta, mo yu wantem tumas blong givim ol save we i halpem olgeta, toktok blong yu bambae i soemaot samting ya.

I gud tumas we ol tok blong yu i laef, be yu mas toktok kaen tu. I no naf blong pulum man blong i bilif se samting we yu talem i tru, be yu mas tajem hat blong hem tu, nao man ya bambae i wantem mekem samting we yu talem.

Sam Narafala Fasin We Yu Save Soemaot. Taem tingting blong wan man i trabol, narafala i luksave se man ya i wari, i fraet, mo i harem nogud. Wan fasin we i mas bigwan long laef blong yumi, hemia glad, mo yumi mas soemaot glad ya oltaem long toktok blong yumi. Be i gat sam fasin we yumi no mas soemaot long ol toktok blong yumi. Hemia ol fasin we oli no stret long ol Kristin. (Efes. 4:31, 32; Fil. 4:4) Ol tok we yu jusum, mo voes blong yu, paoa we yu putum long toktok blong yu, fes blong yu, mo fasin blong muvum han mo bodi, olgeta samting ya oli save soemaot ol defdefren fasin.

Baebol i tokbaot ol defren fasin blong man we oli soemaot se hem i harem gud no i harem nogud. Samtaem Baebol i tokbaot wan samting we i hapen no toktok blong man, mo ol tok ya i soemaot se ol man ya oli harem olsem wanem. Taem yu ridim Baebol long bigfala voes, i gud yu soemaot ol fasin ya long voes blong yu. Long rod ya, save we yu ridim bambae i gat moa paoa long yu mo long man we i lesin. Sipos yu wantem soemaot ol fasin ya long voes blong yu, yu mas mekem olsem we yu nao man ya we stori i stap tokbaot. Be yu no mas soemaot ol fasin ya bitim mak mo mekem sinema. Yu mas rid long fasin we i mekem stori ya i laef long tingting blong ol man we oli lesin.

Yu Soemaot Fasin We i Laenap Wetem Samting We Yu Tokbaot. Samting we yu stap tokbaot bambae i givhan long yu blong yu save sipos i stret blong toktok kaen, no sipos yu mas soemaot wan narafala fasin long voes blong yu. Hemia i sem samting we yu mas mekem sipos yu wantem toktok wetem glad.

Yu traem openem Baebol blong yu long Matiu 11:28-30, mo yu tingbaot wanem we ol vas ya oli talem. Biaen, yu ridim ol strong tok we Jisas i talem long ol tija blong Loa mo ol Farisi long Matiu japta 23. ?Yu ting se Jisas i talem ol strong tok ya wetem voes we i slak? Nogat. Yumi save se hem i mas tok strong mo voes blong hem i mas gat paoa.

Jenesis japta 44 i tokbaot Juda we i plis long Josef blong i no holemtaet smol brata blong hem Benjamin. ?Yu mas toktok olsem wanem taem yu ridim ol stori olsem? Yu traem tingbaot se ol man long vas 13 oli harem olsem wanem. Long vas 16 yu traem tingbaot se Juda i harem olsem wanem, taem hem i talem from wanem trabol ya i kamaot. Mo yu tingbaot wanem we Josef i mekem, olsem Jenesis 45:1 i tokbaot.

Yes, nomata se yu stap rid no yu stap toktok, yu mas tingting fastaem long ol wod mo ol tingting we yu wantem talem. Be sipos yu tingting tu long wanem fasin we i stret blong soemaot folem ol samting we yu tokbaot, bambae yu kasem hat blong ol man.