Traehad Blong Kasem Hat Blong Man

I TRU, yumi mas givim witnes long ol man. Be yumi mas traehad blong kasem hat blong olgeta tu. Plante taem Baebol i yusum tok ya ‘hat’ blong minim samting we man i no save luk long wan narafala man, no samting we i haed, olsem: man i harem olsem wanem, man i tingbaot wanem, from wanem hem i tingting long samting ya, mo ol tingting ya oli mekem wanem long ol fasin blong hem. Hat ya nao we Baebol i talem se sid blong trutok i foldaon long hem. (Mat. 13:19, NW) Mo tu, fasin blong obei long God i mas kamaot long hat.—Prov. 3:1, NW; Rom 6:17, NW.

Sipos yu wantem se tijing we yu givim long man i kasem hat blong hem, yu mas traehad blong mekem ol samting ya: (1) Yu mas luksave wanem samting i gat paoa finis long hat blong hem. (2) Yu mas givhan long hem blong i gat ol gudfala fasin, olsem lav mo fasin blong ona gud long God mo fraet blong mekem Hem i harem nogud. (3) Yu mas pulum hem blong i skelem ol tingting we oli pusum hem blong mekem samting, nao hem i save stretem ol tingting ya mo mekem Jehova i glad tumas.

Yu Traem Luksave. I gat plante risen from wanem sam man oli no bilif yet long trutok. Taem yu mekem Baebol stadi long wan man, maet yu mas givhan long hem blong i winim nogud tingting we hem i gat agensem sam narafala. Maet yu tokbaot sam tru save we i save jenisim rong tingting we hem i gat. Sipos no, maet yu givim sam pruf nomo. Yu save tingbaot se: ‘?Man ya i save se hem i nidim save blong God olsem ol narafala man? ?Hem i bilif long wanem samting finis? ?Wanem samting we hem i no bilif long hem? ?From wanem hem i gat tingting olsem? ?I gat sam nogud fasin long hat blong hem, we oli save blokem hem blong i no wantem mekem ol wok we hem i mas mekem taem hem i kasem save long trutok? ?Hem i nidim help blong winim ol fasin ya?’

I no isi oltaem blong faenemaot from wanem man i gat bilif olsem. Ol Proveb 20:5 i talem se: “Ol tingting blong man i olsem wota long wel, we i godaon we i godaon, be man we i save luksave ol had samting, hem i save faenemaot ol tingting olsem.” Man we i luksave ol had samting, hem i naf blong luksave samting we i no klia. Hem i lukluk gud ol samting long saed blong wan man, mo i wantem tumas blong givhan long man ya.

I no ol toktok blong man nomo we i mekem se yu kasem save long tingting blong hem. Taem yu toktok long man we yu mekem Baebol stadi long hem, maet yu luk se fes blong hem i kam nogud no voes blong hem i jenis. Sipos yu yu wan papa no wan mama, nao yu luk se fasin blong pikinini blong yu i jenis, bambae yu save se wan niufala samting i gat paoa long hem. Yu no mas ting nating long ol saen ya. Oli soemaot sam smol samting we oli stap long hat blong hem.

I gud yu askem sam kwestin we yu tingting gud long olgeta fastaem. Oli save givhan long yu blong faenemaot wanem i stap long hat blong man. Maet yu askem se: “?Wanem tingting blong yu long . . . ?” “?Wanem i mekem yu yu bilif se . . . ?” “?Bambae yu yu mekem wanem sipos . . . ?” Be yu no mas askem tumas kwestin wantaem. Bifo we yu askem wan kwestin, maet yu askem se: “?Mi save askem wan kwestin long yu?” Yu mas tingbaot se yu no save faenemaot hareap wanem i stap long hat blong man, yu mas tektaem. Klosap oltaem i tekem longtaem lelebet blong man i trastem yumi. Long taem ya nao, bambae hem i rere blong talemaot wanem i stap long hat blong hem. Be yu mas lukaot gud. I nogud man i harem se yu yu stap go insaed long prapa bisnes blong hem.—1 Pita 4:15.

Mo tu, yu mas naf blong luksave ol samting we i had, taem yu wantem ansa long tok blong wan man. Yu mas tingbaot se yu yu wantem kasem save long tingting blong man ya. Hemia bambae i givhan long yu blong yu save wanem samting long Baebol we i save pulum hem blong tekem aksen. Yu mas blokem tingting ya blong wantem stretem ol rong tingting blong hem. I moa gud yu traem luksave from wanem hem i talem ol toktok olsem. Nao bambae yu save wanem ansa blong givim. Long taem olsem, man bambae i harem se yu kasem save long hem, nao i tinghevi moa long ol tok blong yu.—Prov. 16:23.

Nating se yu stap toktok long plante man wantaem, be ol tok blong yu i save pulum ol man ya wanwan blong oli tekem aksen. Yu mas lukluk ol man we yu stap toktok long olgeta, yu mas wajem fes blong olgeta. Mo yu mas askem ol kwestin we oli no nid blong ansarem, be oli save tingting nomo long olgeta. Sipos yu mekem olsem, ating bambae yu kasem save se ol man oli harem olsem wanem long samting we yu stap talem. Sipos yu save gud ol man we yu stap toktok long olgeta, yu mas mekem oli save se yu stap tingbaot olgeta mo ol samting long laef blong olgeta. Taem yu eksplenem Tok blong God long kongregesen, yu mas tingbaot wanem tingting we grup ya i gat.—Gal. 6:18, NW.

Yu Mekem Man i Harem Gud Long Trutok. Taem yu kasem save smol long samting we man i bilif long hem, samting we hem i no bilif long hem, mo from wanem hem i bilif olsem, yu traem yusum ol save ya blong givhan long hem. Taem Jisas i laef bakegen, hem ‘i stap talemaot ol tok blong Baebol’ blong eksplenem ol samting we oli jes hapen. Long rod ya, hem i kasem hat blong ol disaepol blong hem. (Luk 24:32) Yu tu yu mas traehad blong joenem ol samting we man i ridim long Tok blong God wetem samting we i hapen long laef blong hem, mo samting we hem i wantem tumas. Taem hem i luksave klia se “!Hemia nao TRUTOK!” long taem ya nao yu kasem gud hat blong hem.

Yu mas mekem man we yu tijim hem i kasem save gud, se Jehova i gat fasin we i gud tumas, hem i lavem ol man, hem i givhan long man long gladhat blong hem, mo olgeta rod blong hem oli stret gud. Sipos yu mekem olsem, yu givhan long man ya blong i lavem God. Yu mas spenem taem blong tokbaot ol gudfala fasin we God i luk long hem. Taem yu mekem olsem, hem i luk se i gat rod blong hem wan i save fren wetem God. Yu save tokbaot ol vas olsem Ol Sam 139:1-3, Luk 21:1-4, mo Jon 6:44. Mo tu, yu save givhan long hem blong i luksave se Jehova i lavem tumas ol gudfala man we oli holemstrong long hem. (Rom 8:38, 39) Yu save eksplenem se Jehova i no stap lukluk ol mastik blong yumi nomo, be hem i luk olgeta samting we yumi mekem. Hem i luk we yumi strong long tru wosip, mo we yumi lavem nem blong hem. (2 Kron. 19:2, 3; Hib. 6:10) Hem i tingbaot ol smosmol fasin blong yumi tu, mo bambae hem i mekem wan bigfala merikel blong givim laef bakegen long olgeta we oli stap “long beregraon.” (Jon 5:28, 29; Luk 12:6, 7) God i mekem yumi ol man, blong yumi tekem fasin blong hem. Taswe, taem yu tokbaot fasin blong hem, plante taem ol tok ya i kasem hat blong man.—Jen. 1:27.

Mo tu, yu save kasem hat blong man sipos yu givhan long hem blong i gat sem tingting olsem Jehova i gat long ol man. Sipos God blong yumi i kaen mo i tingbaot man, hem i mas gat sem fasin ya long yumi evriwan, nating se yumi kamaot long wanem kaen laef, kantri, no yumi gat wanem kala blong skin. (Wok 10:34, 35) Taem wan man i kasem save long samting ya, bambae hem i luk se ol tok blong Baebol i givim wan strong risen blong sakemaot fasin blong no laekem narafala, mo ol tingting agensem narafala we oli stap long hat blong hem. Nao bambae hem i naf blong gat pis wetem ol narafala, taem hem i stap lanem blong mekem samting we God i wantem.

Yu mas givhan long man blong i ona gud long God long hat blong hem, mo i fraet blong mekem God i harem nogud. (Sam 111:10; Rev. 14:6, 7) Taem man i ona long God no i fraet long God wetem fulhat blong hem, hem i kasem paoa blong mekem plante samting we hem i no naf blong mekem long prapa paoa blong hem. Sipos yu tokbaot ol bigbigfala wok blong Jehova we oli mekem yu yu sapraes, mo bigfala lav mo kaen fasin blong hem, yu save givhan long ol narafala blong oli lanem gudfala fasin ya blong fraet blong mekem samting we God i no glad long hem.—Sam 66:5; Jer. 32:40.

Ol man oli mas kasem save se ol samting we oli mekem mo ol fasin blong olgeta oli impoten long Jehova. Sipos yumi folem ol tok blong Jehova, yumi save mekem hem i harem gud, sipos yumi no folem, yumi save mekem hem i harem nogud. (Sam 78:40-42) Yu mas eksplenem long ol man se ol samting we oli mekem mo ol fasin blong olgeta, i save givim ansa long ol nogud tok we Setan i sakem blong spolem nem blong God.—Prov. 27:11.

Ol man oli mas luksave se sipos oli folem ol tok blong God, samting ya i save mekem i gud long olgeta. (Aes. 48:17) Yu save tokbaot ol trabol we man i kasem long bodi mo tingting blong hem, taem hem i no wantem folem ol waes tok blong God, nating se i blong smoltaem nomo. Yu save eksplenem se taem yumi mekem sin, yumi seraot long God, ale yumi no moa stret blong tijim narafala long trutok, mo tu, nogud samting ya we yumi mekem i spolem narafala. (1 Tes. 4:6) Yu save givhan long ol man blong oli tinghae long ol blesing we oli kasem finis taem oli folem ol loa blong God. Yu save givhan long olgeta blong oli glad moa blong folem ol stret rod blong Jehova, from we fasin ya i blokem olgeta blong oli no kasem plante trabol. Taem wan man i luksave se i waes blong folem ol loa blong God, bambae hem i no laekem nating ol rabis fasin. (Sam 119:104) Man ya bambae i no ting se i wan bigfala baden blong obei long God. Be bambae hem i luk se sipos hem i obei long God, hemia wan rod blong soemaot se hem i lavem Jehova mo i ona long Hem.

Yu Givhan Long Man Blong i Jekem Gud Hem. Sipos man i wantem fren moa wetem God, hem i mas haremsave wanem i stap long hat blong hem. Yu save eksplenem long hem olsem wanem Baebol i save halpem hem blong mekem samting ya.

Yu mas givhan long ol man blong oli kasem save se Baebol i no wan buk blong ol loa, ol advaes, ol stori blong bifo, mo ol profet tok nomo. Hem i tokbaot ol tingting blong God tu. Jemes 1:22-25 i talem se Tok blong God i olsem wan glas we man i yusum blong lukluk fes blong hem. Ol tingting mo aksen blong yumi taem yumi ridim Tok blong God mo taem yumi lanem olsem wanem Jehova i mekem ol tingting blong hem oli kamtru, oli soemaot wanem i stap long hat blong yumi. Yes, Tok blong God i soemaot wanem we God i luk taem hem ‘i skelem olgeta samting long hat blong yumi.’ (Prov. 17:3, NW) Yu mas pulum ol man blong oli tingbaot samting ya, mo blong oli tingting gud long ol tok blong Baebol we God i mekem se i stap gud kasem taem blong yumi. Mo tu, oli mas tingbaot wanem samting we oli mas mekem long laef blong olgeta, blong God i glad moa long olgeta. Yu save givhan long olgeta blong oli tingbaot se Jehova i save ‘ol tingting blong olgeta, mo ol samting we oli wantem’ long hat blong olgeta. Ale taem oli ridim Baebol, oli save faenemaot tingting blong Jehova long ol samting ya. Nao oli save wok gud wetem God blong mekem ol jenis we oli mas mekem.—Hib. 4:12; Rom 15:4.

Samfala we yumi stadi wetem olgeta, oli wantem mekem ol samting we oli lanem i wok long laef blong olgeta. Be oli wari long tingting blong ol narafala man. Mo tu, maet oli stap traehad blong winim sam rabis fasin. Sipos no, maet oli stap mekem eskius nomo, from we oli wantem mekem wok blong God be oli wantem holem sam rabis fasin blong wol ya tu. Yu mas mekem oli luksave se i denja blong gat tu tingting. (1 King 18:21) Yu pulum olgeta blong oli prea long God se i lukluk gud mo i klinim hat mo tingting blong olgeta.—Sam 26:2; 139:23, 24.

Yu tokbaot se Jehova i kasem save taem oli traehad blong winim wan nogud fasin, mo se Baebol i tokbaot samting we i hapen long taem olsem. (Rom 7:22, 23) Yu givhan long olgeta blong oli lukaot gud se ol samting nogud we hat blong sinman i wantem, oli no winim olgeta.—Prov. 3:5, 6; 28:26; Jer. 17:9, 10.

Yu pulum ol man wanwan blong oli skelem tingting we i stap pusum olgeta blong mekem samting. Oltaem i gud oli tingbaot ol kwestin ya: ‘?From wanem mi mi wantem mekem samting ya? ?Sipos mi mekem olsem, bambae Jehova i luk se mi mi tinghae long ol samting we hem i mekem long mi?’ Yu mas traehad blong mekem bilif blong ol man i kam strong moa, se i no gat wan samting we i gud moa i bitim we Jehova i glad long olgeta.

Yu givhan long ol man we yu toktok long olgeta blong oli kasem save se oli mas mekem olsem wanem blong wosipim Jehova wetem ‘olgeta hat blong olgeta.’ (Luk 10:27) Hemia i min se olgeta samting long hat blong olgeta, olgeta samting we oli wantem, mo tingting we i pusum olgeta blong mekem samting, oli mas laenap wetem ol samting we Jehova i glad long olgeta. Taswe, yu tijim olgeta se i no naf blong jekemap ol samting we oli mekem nomo. Be oli mas jekemap se oli harem olsem wanem long saed blong ol samting we God i wantem se oli mekem. Mo tu, oli mas jekemap tingting we i stap pusum olgeta blong mekem wok blong hem. (Sam 37:4) Taem ol man we yu mekem stadi long olgeta oli luksave samting we oli mas traehad blong kam gud moa long hem, yu pulum olgeta blong oli prea long Jehova se: ‘Plis yu mekem we mi bambae mi wantem tumas blong mekem ol wok blong yu nomo.’—Sam 86:11.

Taem man we yu mekem stadi long hem i fren gud wetem Jehova, bambae hem i obei from we hem i gat bilif, i no from we yu yu pulum hem blong obei. Hem nomo bambae i “traehad blong faenemaot ol fasin we Masta blong yumi i glad long hem.” (Efes. 5:10; Fil. 2:12) Taem man i obei wetem fulhat blong hem olsem, Jehova i glad we i glad.—Prov. 23:15.

Yu no mas fogetem se Jehova nao i stap skelem hat mo tingting blong man, mo hem nao i pulum man i kam long hem. (Prov. 21:2; Jon 6:44) Yumi stap wok wetem God nomo. (1 Kor. 3:9) I olsem we ‘God i stap yusum yumi blong singaot ol man.’ (2 Kor. 5:20; Wok 16:14) Jehova i no stap fosem ol man blong oli bilif long trutok. Be olsem Baebol i talem, maet hem i mekem man i luksave se samting we yumi talem, hemia ansa blong ol kwestin blong hem, no ansa blong ol prea blong hem. Yu mas tingbaot samting ya taem yu gat janis blong tijim narafala, mo yu mas askem long Jehova blong i lidim yu mo i halpem yu.—1 Kron. 29:18, 19; Efes. 1:16-18.