Pulum Man Blong i Ridim Vas Long Baebol

YUMI wantem pulum tingting blong ol man i go long Tok blong God, Baebol. Ol tok we yumi talemaot i kamaot long tabu buk ya. Yumi wantem we ol man oli luksave se samting we yumi stap talem i no kamaot long tingting blong yumi, be i kamaot long God nomo. Ol man oli mas lanem blong trastem ol tok blong Baebol.

Long Wok Blong Prij. Taem yu stap mekemrere blong go prij, oltaem yu mas jusum wan vas, no maet yu jusum moa long wan vas, blong serem wetem ol man we oli glad blong lesin. Nating se yu gat plan blong mekem wan sot storian nomo blong givimaot wan buk long ol man, be plante taem i gud yu ridim wan vas blong Baebol we i stret long poen we yu tokbaot. Baebol i gat moa paoa blong pulum ol man we oli gat fasin olsem sipsip, i bitim enikaen tok we yu save talem. Sipos yu no save ridim wan vas stret long Baebol, yu save talem nomo ol tok blong vas ya. Long taem blong Jisas, i no gat plante kopi blong ol hanraet blong Baebol. Be Jisas mo ol aposol blong hem oli yusum ol tok blong Baebol oltaem. Yumi tu, yumi mas traehad blong lanem plante vas baehat, mo yumi yusum olgeta long taem we i stret blong yusum long wok blong prij. Olsem nao, long taem we yumi no save ridim vas stret long Baebol, yumi save talem ol tok blong hem nomo.

Sipos yu gat janis blong ridim wan vas stret long Baebol, yu mas soem Baebol long man blong haos, blong hem i save folem ol wod we yu ridim. Maet hem i glad moa long ol tok blong Baebol sipos hem i save ridim long prapa Baebol blong hem.

Be yu mas tingbaot se samfala we oli tanem Baebol i go long ol defren lanwis, oli jenisim sam tok blong hem. Maet tok we oli yusum i no gat sem mining stret long tok we i stap long ol olfala hanraet. Long plante Baebol tede, oli tekemaot prapa nem blong God, oli jenisim tok we ol olfala hanraet oli yusum blong eksplenem se ol dedman oli stap olsem wanem, mo oli haedem stamba tingting we Baebol i talem se God bambae i mekem i kamtru long wol ya. Sipos yu wantem soemaot long wan man se oli bin jenisim ol samting ya, maet yu mas skelem sam vas long ol defren Baebol no long sam olfala Baebol long lanwis blong yu. Long plante poen, yu save yusum buk ya Reasoning From the Scriptures. Hem i talem ol vas we oli kamaot long ol defren Baebol, mo i skelem ol impoten tok long ol vas ya. Man we i laekem trutok bambae i glad blong kasem stret save long ol vas ya.

Long Ol Miting Blong Kongregesen. Long ol miting blong kongregesen, i gud yu pulum ol man blong oli ridim ol vas long Baebol blong olgeta. Hemia i mekem i gud long olgeta long plante fasin. Hem i givhan long olgeta blong oli putum tingting blong olgeta i stap gud long samting we miting i tokbaot. Taem ol man oli lukluk ol tok blong Baebol stret long ae blong olgeta, hemia i givim paoa long tijing we brata i stap givimaot. Mo tu, olgeta we oli jes stat blong kam long miting, bambae oli luksave se Baebol nomo i stamba blong ol tijing blong yumi.

Plante taem olgeta we oli stap lesin oli glad blong folem ol vas long Baebol blong olgeta, sipos yu yu pulum olgeta blong oli mekem olsem. Nambawan rod blong mekem samting ya, i blong askem stret long olgeta blong oli ridim ol vas long Baebol blong olgeta.

Sipos yu givim wan tok, yu nao yu mas jusum ol vas we yu wantem se oli stap gud long tingting blong ol man, ale yu askem long olgeta blong oli folem ol vas ya long Baebol blong olgeta. I moa gud yu ridim ol vas we oli soemaot gud ol bigfala poen long tok blong yu. Sipos i gat taem, yu save ademap sam moa vas bakegen blong sapotem ol poen ya.

I no naf blong talem nomo nem blong buk, wetem japta mo vas. Mo i no naf tu blong askem nomo long ol man blong oli jekem wan vas. Sipos yu ridim wan vas, nao yu hareap blong go long narafala vas bifo we ol man oli faenem, bambae oli no moa wantem folem ol vas long Baebol blong olgeta. Yu mas lukluk ol man. Taem yu luk se bighaf blong olgeta oli faenem vas ya finis, ale yu save ridim.

Smoltaem bifo we yu yusum wan vas, i gud yu talemaot vas ya, blong mekem se ol man oli gat taem blong faenem. Olsemia, bambae yu no nid blong wet longtaem blong ol man oli faenem vas ya. I tru, maet yu mas tekemaot sam save we yu no gat taem blong tokbaot. Be hemia i nating nomo, from we ol man bambae oli harem gud moa long tok blong yu.