Ripot Long Wok Blong Kingdom
Woman Ya i Faenem Wan Risen Blong Laef
JISAS i talem se hem i save ol sipsip blong hem. (Jon 10:14) Sipos wan man i gat wan gudfala hat mo i laekem pis mo stret fasin, man ya bambae i kam long ol man blong Jisas. Wan man olsem bambae i faenem wan risen blong laef, olsem wan woman long Beljiom i mekem. Hemia store blong hem:
“Taem ol Wetnes blong Jeova oli kilkilim doa blong mi, tingting blong mi i foldaon bigwan mo mi stap tingting blong kilim mi mi ded nomo. Mi mi laekem samting we ol Wetnes oli bin talem long saed blong rod ya blong finisim ol trabol long wol be mi no laekem tingting ya se God i insaed long bisnes ya. Mi bin stop blong go long jyos eit yia bifo, from mi agensem fasin blong gat tu fes we mi luk long jyos. Be, wetem ol Wetnes, mi tingbaot trutok long samting we mi harem oli stap talem mo mi jes luksave samting ya, se, hem i no isi blong stap laef we i no gat God.
“Sore tumas, afta long sam visit, mi no moa toktok wetem ol Wetnes. Mi harem nogud tumas. Mi smok tu paket sigaret long wan dei mo tu mi stat blong yusum ol drag. Mi wantem toktok wetem bubuman blong mi we i ded finis, ale mi joen long wok blong ol rabis speret. !Mi fraet tumas taem mi stap mi wan long naet mo mi luk paoa blong rabis speret, olsem frut blong samting ya! Samting ya i tekem plante manis. Evri aftenun mi mi fraet tumas long tingting ya blong stap mi wan.
“Ale, wan dei mi mi goaot, mi folem rod we i defren long hemia we mi stap folem oltaem, mo mi kam kasem wan ples we oli stap mekem wan bigfala haos. Mi sapraes blong mi luk bigfala hif blong man long ples ya. Mi kam kolosap, mi luk se hemia ol Wetnes blong Jeova we oli stap bildim wan Haos Kingdom. Mi tingbaot ol visit ya we ol Wetnes oli bin mekem long haos blong mi, mo mi stap tingting se bambae i gud tumas sipos ol man long olgeta ples long wol oli stap olsem ol man ya oli mekem.
“Mi wantem tumas se ol Wetnes ya bambae oli kambak long haos blong mi, ale mi toktok long sam long olgeta we oli stap wok long haos ya. Mi prea long God, mo ten dei biaen man ya we i bin toktok long mi fastaem i kam long doa blong mi. Hem i talem se mitufala i gohed blong stadi long Baebol, mo mi glad blong agri. Stret long taem ya hem i askem mi blong kam long ol miting long Haos Kingdom. Mi mi agri. !Neva mi bin luk samting olsemia! Longtaem finis mi bin stap lukaot ol man we oli gat lav long olgeta mo oli glad. !Mo naoia mi faenem olgeta!
“Biaen mi go long olgeta miting. Kolosap tri wik biaen, mi stopem rabis fasin ya blong smok. Mi sakemaot ol buk long saed fasin blong talem fyuja from ol sta mo ol myusek blong mi we oli tokbaot Setan, mo mi haremsave se ol rabis speret oli no moa holemtaet mi. Mi mekem laef blong mi i folem stret ol rod blong Jeova we oli stap long Baebol, mo tri manis biaen mi stat blong talemaot gud nyus. Afta sikis manis mi tekem baptaes. Tu dei afta we mi tekem baptaes, mi statem wok blong haftaem paenia.
“Mi talem tangkyu long Jeova from ol gudgudfala samting we hem i bin mekem long mi. Naoia laef blong mi i gat wan risen. Yes, nem blong Jeova i olsem wan strong haos we mi resis blong go haed long hem nao hem i lukaot long mi. (Proveb 18:10) Mi harem olsem man blong raetem Ol Sam i harem taem hem i raetem Sam 84:10 se: ‘!Sipos mi stap wan dei nomo long haos blong yu, hemia i gud moa i winim we mi stap wan taosen dei long ol narafala ples! God blong mi, i nomata sipos mi stap long doa nomo blong haos blong yu, be hemia i moa gud, i winim we mi stap insaed olgeta long haos blong ol man nogud.’ ”
Woman ya we i gat tingting daon i faenem wan risen blong laef. Taswe eni man i save faenem Jeova sipos i lukaot Hem wetem wan gudfala hat.