Kwestin We i Had Moa Long Ol Narafala Kwestin

“?FROM WANEM?” Tok ya i smol nomo. Be fulap trabol mo soasore we i mekem man i harem nogud tumas i joen wetem kwestin ya. Taem i gat wan disasta no wan narafala trabol we i tekemaot laef blong sam man, plante oli askem kwestin ya “?From wanem?” Hariken i flatemgud wan ples, ale fulap man i ded. Graon i seksek bigwan, i brebrekem ol haos oli kam ol pis ston nomo. Wok blong ol teroris i jenisim wan gudfala dei we man i haremgud long hem i kam wan rabis dei we i fulap long fraet mo raf fasin. Wan aksiden i givim kil no tekemaot laef blong wan famle no fren blong yumi.

Sore tumas, plante we oli ded oli ol gudfala man nomo no oli man we oli no naf blong ronwe long ol trabol ya. Long ol yia we oli jes pas, i gat plante tumas disasta olsem. Taswe, plante man oli stap krae long God se: “?From wanem?” Ridim tok blong sam long olgeta.

◼ “?God, from wanem yu mekem samting ya long mifala? ?Mifala i mekem wanem long yu?” Niuspepa blong Reuters i talemaot tok ya blong wan olfala woman long India. Hem i askem kwestin ya afta we taetel wef i flatem vilej blong hem.

◼ “?God i stap wea? ?Sipos God i gat olgeta paoa, from wanem hem i letem samting ya i hapen?” Tok ya i stap long wan niuspepa long Texas, Yunaeted Stet, afta we wan man i tekem masket, i sutum samfala oli ded taem oli stap mekem wosip long wan jos. Sam narafala oli karekil.

◼ “?From wanem God i letem hem i ded?” Wan woman i askem kwestin ya taem wan fren blong hem i ded wetem kansa. Hasban blong fren ya i mas lukaot long faefala pikinini blong tufala.

I no olgeta ya nomo we oli ting se God i stamba blong ol trabol we i kasem olgeta. I no longtaem i pas, long Intenet oli askem ol man sipos oli ting se ol disasta olsem hariken oli kamaot long God. Klosap stret haf blong ol man we oli ansa oli talem ‘yes.’ ?From wanem plante man oli gat tingting ya?

Defdefren Tingting Blong Ol Skul

Plante taem, ol lida blong jos oli no givim wan gudfala ansa long ol man we oli askem kwestin ya “?From wanem?” Oli mekem tingting blong ol man i fasfas moa. Bambae yumi tokbaot trifala ansa we ol lida blong skul oli stap givim.

Faswan ansa, oli talem se God i mekem ol disasta oli kamaot blong panisim ol man we oli gowe long hem. Taem hariken Katrina i flatem taon ya New Orleans long Louisiana, Yunaeted Stet, sam lida blong jos oli talem se God i panisim taon ya. Oli talem se taon ya i fulap long kruked fasin, ol kasino, mo rabis fasin long saed blong seks. Blong traem pruvum ol toktok ya blong olgeta, oli yusum sam stori long Baebol. Oli tokbaot taem we God i bin spolem ol rabis man wetem wota mo faea. Be tok blong olgeta i no givim stret tingting long ol man long saed blong samting we Baebol i talem.​—Lukluk bokis ya “?Wok Blong God?”

Seken ansa we ol lida blong skul oli givim, oli talem se God i save from wanem hem i mekem ol trabol ya oli kasem ol man, be yumi no naf blong kasem save long tingting blong hem. Plante man oli no glad long ansa ya, oli se: ‘God i mekem i nogud long wan man, plante man oli harem nogud tumas from, mo oli plis long hem blong talem “?From wanem?” be hem i no save givim ansa long olgeta. Sipos God i gat lav, hem i no save mekem olsem.’ Tru ya, Baebol i talem se: “God i stamba blong fasin ya blong lavem man.”​—1 Jon 4:8.

Namba tri ansa we ol lida blong skul oli givim, oli talem se maet God i no gat olgeta paoa mo maet hem i no lavem yumi. Bakegen, ansa ya i mekem sam bigfala kwestin i stanap. God i “mekem olgeta samting,” hemia olgeta sta long bigfala skae antap, mo wol ya tu. ?Weswe hem i no naf blong blokem trabol we i mekem ol man oli safa long wan planet nomo, wol blong yumi? (Revelesen 4:11) God nao i putum fasin ya long yumi we yumi save lavem narafala, mo Baebol i talem tu se hem i stamba blong lav. ?Weswe hem i no save sore long man we i safa?​—Jenesis 1:27; 1 Jon 4:8.

Trifala ansa we yumi jes tokbaot, oli sam nomo long ol ansa we ol man oli givim long kwestin ya we i bin mekem tingting blong ol gudfala man i fasfas blong plante handred yia: ?From wanem God i letem man i safa? Long nekis pej, bambae yumi tokbaot samting we Baebol i tijim long saed blong impoten kwestin ya we i stap kamaot plante long laef blong yumi. Bambae yu yu luk we ol tok blong Baebol i klia, i stret, mo i tekemaot ol rong tingting we oli mekem hed blong plante man i fasfas. Mo tu, Baebol i leftemap tingting blong olgeta we oli bin lusum sam fren mo famle from ol trabol ya.

[Bokis/Foto blong pija long pej 4]

?Wok Blong God?

?Olsem wanem? ?Baebol i tijim se ol disasta olsem hariken mo graon i seksek oli kamaot long God? !Nogat! Baebol i soemaot se ol jajmen blong God oli defren olgeta long ol disasta ya. God i no mekem jajmen blong hem i kamtru long olgeta man. Hem i lukluk hat blong wanwan man, mo hem i spolem olgeta nomo we hem i luk se oli rabis. (Jenesis 18:​23-32) Mo tu, God i stap givim woning fastaem, blong ol stret man oli gat janis blong obei long woning ya mo stap sef.

Long saed blong ol disasta, plante taem i no gat woning, mo oli spolem ol gudfala man wetem ol man nogud tu. Ol man nomo oli mekem se ol disasta ya oli bigwan moa, taem oli spolem ol samting raonabaot long yumi we God i wokem, mo taem oli wokem ol haos long ol ples we graon i stap seksek, mo long ol ples we oli stap kasem bigfala ren mo rabis weta.

[Credit Line]

SENA VIDANAGAMA/AFP/Getty Images

[Foto blong pija long pej 4]

Ol lida blong skul oli talem ol defdefren ansa we oli mekem tingting i fasfas