Haremgud Long Taem Blong Trabol
OL NIUS tede oli no mekem man i haremgud nating. Wan man i raetem se: “Ol samting we i stap hapen long wol i nogud we i nogud, mekem se plante taem, mifala i no save sipos mifala i wantem luk ol nius long televisin long sikis klok no nogat.” Wol i fulap long wo, ol fasin we oli mekem man i fraet, fasin safa, fasin blong brekem loa, mo ol sik—ol rabis samting ya oli save karem hadtaem i kam long laef blong yumi, no maet oli karem hadtaem ya i kam long yumi finis.
Baebol i talem finis we ol samting ya oli mas hapen. Taem Jisas i stap tokbaot taem blong yumi, hem i talem se bambae i gat bigfala faet, ol strong sik, kakae i sot, mo graon i seksek bigwan. (Luk 21:10, 11) Long sem fasin, aposol Pol i tokbaot wan taem we “laef long wol ya bambae i kam strong tumas,” long taem ya ol man bambae oli raf, oli laekem mane tumas, mo oli no laekem samting we i stret. Pol i talem se hemia ol ‘lasdei.’—2 Timoti 3:1-5.
Taswe, ol samting we nius i talemaot se oli stap hapen long wol, i sem mak lelebet wetem ol samting we Baebol i talemaot finis. Be nating se ol nius mo mesej blong Baebol oli talemaot sem trabol, i gat wan samting we Baebol i save givim be nius i no save givim. Yes, Tok blong God i givim save long yumi se from wanem wol i fulap long ol nogud samting, mo hem i talemaot tu, wanem fiuja blong yumi.
Tingting Blong God Long Ol Fasin Nogud
Baebol i eksplenem wanem tingting blong God long ol rabis samting we i stap hapen naoia. I tru se God i save longtaem finis wanem trabol we bambae i mas kamaot long taem blong yumi, be i no min se hem i agri long ol trabol ya, mo hem i no save letem samting ya i stap blong olwe. Aposol Jon i raetem se: “God i stamba blong fasin ya blong lavem man.” (1 Jon 4:8) Jeova i rili kea long ol man, mo hem i no laekem nating ol fasin nogud. I stret we yumi lukluk i go long God blong haremgud, from we hem i gud, i gat sore, i gat paoa, mo i wantem tu, blong finisim ol nogud samting long wol ya. Man blong raetem Sam i talem se: “[King ya we God i stanemap finis long heven] bambae i stap sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta. Hem bambae i gat sore long ol puaman, mo long olgeta we oli no strong, mo i stap sevem laef blong olgeta we oli sot long ol samting. Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta. Long fes blong hem, laef blong ol man olsem bambae i gud tumas.”—Ol Sam 72:12-14.
?Yu yu sore long ol man we oli stap safa? Ating yes, yu sore long olgeta. Fasin blong haremsave filing blong narafala, hemia wan fasin we Jeova i putum long yumi from we hem i wokem yumi blong yumi tekem fasin olsem hem. (Jenesis 1:26, 27) Taswe, yumi sua we Jeova i kasem save filing blong ol man we oli stap safa. Jisas i savegud Jeova from we hem i klosap long God, mo hem i tijim yumi se Jeova i intres tumas long yumi, i gat lav mo i gat sore long yumi.—Matiu 10:29, 31.
Ol samting we God i wokem finis oli pruvum se God i kea long ol man. Jisas i talem se God “i stap letem san blong hem i saen long ol gudfala man, mo long ol man nogud long sem mak nomo.” (Matiu 5:45) Pol i talem long ol man long taon blong Listra se: “[God] i stap soemaot fasin blong hem long ol gudfala wok we hem i stap mekem. Hem i stap mekem ren i foldaon, mo i stap mekem ol garen oli gat kakae long stret taem blong olgeta. Hem i stap givim kakae long yufala, mo hem i stap mekem yufala i harem gud.”—Ol Wok 14:17.
?Hu i Stamba Blong Fasin Nogud?
I gud tu blong makem tok ya we Pol i talem long ol man Listra se: “Bifo, [God] i letem olgeta man long evri ples oli folem ol rod blong olgeta nomo.” Taswe, plante taem ol man nomo oli stap pulum trabol i kam long olgeta bakegen. God i no gat fol from ol trabol ya.—Ol Wok 14:16.
?From wanem Jeova i letem ol samting nogud oli hapen? ?Bambae hem i stretem ol trabol? Yumi save faenem ansa long ol kwestin ya long Tok blong God nomo. ?From wanem? From we ansa long ol kwestin ya i joen wetem wan narafala spirit man, mo i joen wetem wan kwestin we spirit man ya i stanemap long ples blong ol spirit man.
[Tok blong pija long pej 4]
Ol man oli haremsave filing blong narafala. ?Yu ting se God i no kasem save filing blong ol man we oli stap safa?
[Foto Credit Lines long pej 2]
COVER: Tank: UN PHOTO 158181/J. Isaac; earthquake: San Hong R-C Picture Company
[Foto Credit Lines long pej 3]
Upper: left, Croatia: UN PHOTO 15908/S. Whitehouse; Starving child: UN PHOTO 146150 BY O. MONSEN