Ol Las Dei—?Wanem Bambae i Hapen Afta?

SAMFALA oli fraet blong tingbaot “ol las dei.” (2 Timoti 3:1, NW) Taem oli tingbaot olgeta, oli tingbaot nomo ol trabol we i strong tumas. ?Ale, from wanem plante man long ol yia we oli pas oli wantem tumas blong luk ol las dei? From we ol las dei oli soemaot se ol gudfala taem oli klosap.

Masta Isaac Newton i bilif strong se taem blong en bambae i makem stat blong wan niufala taem blong pis mo plante samting long wol, aninit long rul blong Kingdom blong God blong wan taosen yia. Hem i talem se long taem ya nao, tufala profet tok ya, Maeka 4:3 mo Aesea 2:4, bambae oli kamtru: “Ol man bambae oli hamarem ol naef blong faet blong olgeta, gogo oli kam aean blong digim graon. Mo ol spia blong olgeta, bambae oli wokem olgeta oli kam huknaef blong katem gru blong ol grep blong olgeta. Nao olbaot long wol, ol man bambae oli no moa save girap blong go kilim ol narafala man, neva bambae oli save mekemrere bakegen blong go mekem faet.”

Jisas i pulum ol man blong hem blong oli gat wan gudfala tingting long saed blong taem blong en. Afta we hem i tokbaot ol hadtaem, wari, mo fraet we bambae i kamaot long taem blong bigfala trabol, hem i se: “Taem ol samting ya oli stat kamtru, yufala i mas stanap stret, yufala i leftemap hed blong yufala, from we bambae i no longtaem, mi bambae mi kam blong sevem yufala, mi mekem yufala i fri.” (Luk 21:28) ?Fri long wanem samting?

Promes Blong God

Faet, trabol long ol wanwan kantri, stil, fasin blong kilim man, mo hanggri, oli sam nomo long ol trabol we oli kasem ol man tede, mo oli mekem se plante milian man oli fraet mo wari. ?Wan long ol trabol ya i kasem yu finis? Ale, makem ol promes ya blong God:

“Bambae i no longtaem, ol man nogud oli lus. . . . Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—Ol Sam 37:10, 11.

“Ol man blong mi oli mas stap gud long wan gudfala ples we oli save haremgud long pis mo long ol haos blong olgeta we i no gat wan man i save kam spolem olgeta, mo oli save stap long ol kwaet ples blong spel.”—Aesea 32:18.

“[Jeova] i stap mekem ol faet i finis long olgeta ples long wol. Hem i stap brekem ol bonara, i stap spolem ol spia, mo i stap bonem ol sil long faea.”—Ol Sam 46:9.

“Olgeta man bambae oli stap gud, mo oli gat pis olwe. Bambae oli save stap gud long ol plantesen blong grep blong olgeta, mo oli save sidaon aninit long ol figtri blong olgeta. Bambae i no moa gat man blong mekem olgeta oli fraet.”—Maeka 4:4.

“Yu mekem we bambae i gat plante kakae long ples ya, we bambae ol hil oli fulap gud long hem.”—Ol Sam 72:16.

“Man we i stap lesin long mi, bambae hem i stap gud oltaem long laef blong hem. Hem bambae i save we i no gat wan samting nating we i save mekem hem i fraet.”—Ol Proveb 1:33.

Nomata we yumi stap naoia long wan ples we i gud mo yumi gat plante samting, be yumi stap kasem ol sik yet mo yumi stap ded tu. Be long niufala wol we God bambae i mekem, sik mo ded bambae oli finis. Taswe, bambae yumi save luk bakegen ol famle mo fren blong yumi we oli ded finis. Makem ol promes ya:

“Bambae i no moa gat man olbaot long kantri ya we i save talem se hem i sik.”—Aesea 33:24.

“[God] bambae i ravemaot wota blong ae blong olgeta. Nao bambae i no moa gat man i ded, mo bambae man i no moa krae from man we i ded. Bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Revelesen 21:4.

“Laswan blong ol enemi ya we God bambae i winim olgeta, hemia ded.”—1 Korin 15:26.

“I gat taem i stap kam we ol dedman bambae oli harem voes blong [Jisas], nao bambae oli aot long beregraon blong olgeta.”—Jon 5:28, 29.

Long gudfala tok we aposol Pita i raetem, hem i ademap olgeta promes ya, i se: “God i promes finis blong putum niufala skae mo niufala wol, we stret fasin nomo bambae i stap long hem. Mo yumi stap wet long ol samting ya blong oli kamtru.” (2 Pita 3:13) Blong gat stret fasin nomo long wol, ol man we oli mekem nogud fasin oli mas lus. Ol neson tu we oli stap faet mo kilim man i ded blong kasem samting we oli wantem, oli mas lus. Olgeta gavman blong wol bambae oli finis, mo Kingdom blong God we Kraes i king blong hem, bambae i rul. Long saed blong rul blong Jisas, Baebol i promes se: “Taem we hem i stap rul, oltaem paoa blong hem bambae i stap kam bigwan moa, mo ples we hem bambae i rul long hem, oltaem bambae i stap kwaet. Bambae hem i wan man we i kamaot biaen long King Deved, mo bambae hem i rul long ples blong king ya. Paoa blong hem bambae i stanap long ol fasin blong hem we i stret olgeta, mo long stret fasin blong hem blong jajem man, mo bambae hem i stap rul oltaem nomo, i stat naoia, gogo i no save finis. Hae God. Yu yu gat olgeta paoa, mo yu yu mekem tingting blong yu i strong finis, blong mekem olgeta samting ya i kamtru.”—Aesea 9:7.

Ol promes ya oli save kamtru long yu tu, from we Baebol i talem se: “God . . . i wantem sevem olgeta man, mo i wantem we olgeta man bambae oli save trutok blong hem.” (1 Timoti 2:4) Yu no mas wet. Yu mas lanem ol save ya we bambae i lidim yu blong kasem laef we i no save finis. (Jon 17:3) Faswan samting blong mekem, yu mas raet i go long olgeta we oli wokem magasin ya, mo askem olgeta blong sanem wan man blong mekem Baebol stadi long yu we yu no pem.

[Tok blong pija long pej 9]

Yu save putum tingting blong yu i stap strong long laef we i no save finis long Paradaes long wol, wetem pis mo gudfala helt