?I Stret Blong Trastem Baebol No Nogat?

Inglis man ya William Shakespeare, we i raetem toktok blong plante plei we ol man oli aktem, i talem se: “Yu no mas trastem ol plang we oli roten.” Tru ya, bifo we yu purumbut long ol plang long wan bot, yu mas sua se oli no roten.

OL TOK ya blong Shakespeare oli soemaot filing blong waes King Solomon blong Isrel bifo. Tri taosen yia i pas, Solomon i raetem se: “Man we i no gat hed, hem i save bilif long evri samting, be man we i gat hed, hem i stap lukluk gud long rod we bambae i folem.” (Ol Proveb 14:15) Yes, sipos wan man i bilif long evri samting, mo i mekem ol desisen blong hem oli stanap long ol krangke advaes mo giaman tijing, man ya i no gat hed. Sipos yumi trastem samting we i giaman, yumi save kasem bigfala trabol, olsem we yumi stanap long ol plang we oli roten. Maet yu stap tingting se: ‘?I gat wan ples blong faenem ol save we yumi sua se yumi save trastem, mo we bambae i lidimgud yumi?’

Plante milian man long olgeta ples blong wol oli trastemgud wan olfala buk we nem blong hem Baebol. Oli lukluk i go long buk ya blong i soemaot rod we oli mas wokbaot long hem. Oli tekem ol desisen blong olgeta folem ol advaes long buk ya mo oli mekem ol fasin mo aksen blong olgeta oli laenap wetem ol tijing blong hem. ?Olsem wanem? ?Ol man ya oli stap purumbut long ol plang we oli roten? Ansa blong kwestin ya i dipen long ansa blong wan narafala kwestin, hemia: ?I gat plante samting we i pruvum se yumi save trastem Baebol? Spesel Wekap! ya i tokbaot ol samting we oli pruvum se Baebol i tru.

Mifala i no raetem spesel Wekap! ya blong fosem yu blong folem bilif mo tingting blong wan jos, nogat. Ol save ya i blong soemaot nomo ol samting we oli pruvum long plante milian man finis se i stret we oli trastem Baebol. I gud yu ridim ol haf we oli kam biaen, mo afta, yu save tekem prapa desisen blong yu se: ?I stret blong trastem Baebol no nogat?

I impoten we yu tingting gud long ol save ya we yu ridim. Tingbaot: Sipos i tru se yu save trastem Baebol olsem tok blong God we i save lidimgud yu, ol save blong Baebol i save mekem i gud long yu wan bakegen mo long olgeta we yu lavem olgeta. Taswe i impoten we yu tingting gud long samting we Baebol i talem.

Be fastaem, tingbaot sam nambawan samting long saed blong Baebol. Ating i no gat man we i save agensem trutok ya se Baebol i wan buk we i defren long ol narafala buk.