Noa Mo Bigfala Wota We i Ron—Hem i Wan Tru Stori, i No Wan Kastom Stori

?YU YU wantem tumas blong laef long wan wol we i moagud, wan wol we ol man oli stap tugeta long pis, we i no gat wo, i no gat man i brekem loa, mo man i no mekem i strong tumas long narafala? Sipos yes, wan samting we i hapen longtaem bifo i save leftemap tingting blong yu bigwan. Maet yu save gud stori ya finis. Hem i stori blong Noa, wan gudfala man we i wokem wan bigfala sip blong sevem hem wetem famle blong hem long bigfala wota we i ron i kavremap fulwol. Bigfala wota ya i spolem ol rabis man long taem ya.

Bighaf blong ol man oli save stori ya. Samting we i hapen long taem blong Noa i stap long Baebol long Jenesis japta 6 kasem 9. Oli raetemdaon stori ya bakegen long buk ya we oli kolem Koran, mo ol man long ol defdefren ples long wol oli gat ol kastom stori long saed blong taem ya. ?Be olsem wanem? ?Bigfala wota ya we i ron, hem i rili wan tru stori, no hem i jes wan parabol we oli yusum blong traem pulum ol man blong mekem samting we i stret? Plante handred yia finis, ol man blong stadi long ol tijing blong jos mo ol saentis oli raorao long kwestin ya. Be ansa i klia nomo long Tok blong God, Baebol—hem i wan tru stori, i no wan kastom stori. Tingbaot:

Long Jenesis, yumi faenemaot stret yia, manis, mo dei we bigfala wota i stat blong ron. Buk ya i talem stret dei mo hil we bigfala sip ya i fas long hem, mo stret taem we wota i kam drae olgeta. Baebol i talem klia tu ol smosmol save long saed blong bigfala sip ya. Hem i eksplenem se sip ya i olsem wanem insaed, saes blong hem, mo wanem we Noa i yusum blong wokem sip ya. Be ol kastom stori oli no talemaot ol samting oli kliagud olsem, oli defren olgeta.

Long tu ples we Baebol i talemaot laen blong ol man, nem blong Noa i stap. Samting ya i soemaot se Noa i wan trufala man. (1 Kronikel 1:4; Luk 3:36) Esra mo Luk nao i raetemdaon tufala laen ya. Tufala i bin traehad blong faenemaot plante save long saed ya. Luk i talemaot ol man long laen blong Jisas Kraes i gobak kasem Noa.

Aesea mo Esikel we tufala i profet, wetem tufala aposol blong Kraes, Pol mo Pita, oli bin tokbaot Noa mo taem ya we bigfala wota i ron.—Aesea 54:9; Esikel 14:14, 20; Hibrus 11:7; 1 Pita 3:19, 20; 2 Pita 2:5.

Jisas Kraes i tokbaot bigfala wota ya we i ron, i talem se: “Long taem ya we mi, mi Pikinini blong Man mi kamtru, bambae i olsem taem blong Noa bifo, we ol man oli no rere. Long taem ya, ol man oli stap kakae, mo oli stap dring, mo oli stap mekem mared, go kasem taem we Noa i go insaed long bigfala sip blong hem, nao wota i ron bigwan, i tekemaot olgeta oli lus.” (Luk 17:26, 27) Sipos bigfala wota i no bin ron, toktok ya blong Jisas long saed blong ‘taem we Pikinini blong Man i kamtru’ i blong nating nomo.

Aposol Pita i talem wan profet tok se bambae i gat ol man we “oli laf” long wanem we Baebol i talem. Hem i raetem se: “Oli no wantem tingbaot [“no luksave trutok ya,” NW] we . . . [God] i spolem wol ya we i stap [long taem blong Noa] bifo, long wota ya we i ron bigwan.” ?Olsem wanem? ?I stret we yumi no luksave “trutok ya”? !I no stret nating! Pita i gohed, i se: “Skae mo graon we i stap naoia, . . . tufala i stap wet blong bambae faea i kasem tufala. Tok ya bambae i stap holem tufala, gogo i kasem bigfala Dei ya we God bambae i jajem ol man we oli no obei long hem, nao bambae oli lus.”—2 Pita 3:3-7.

I gat taem i stap kam we bambae God i spolem ol rabis man bakegen, mo bambae i gat sam man bakegen we oli sef tu. Sipos yumi folem eksampol blong Noa long laef blong yumi, maet yumi save stap wetem ol stret man ya we God bambae i sevem olgeta, blong oli kasem laef long wan wol we i moagud.