Baebol Blong Berleburg
PIETISM i nem blong wan skul we i kamaot long Luteran Jos blong Jemani long ol yia 1600 mo 1700. Sam long ol memba blong skul ya, ol man oli bin jikim olgeta mo oli kilim olgeta tu oli ded from bilif blong olgeta. Plante taosen man blong skul ya we oli stadi long Baebol, oli go haed long Berleburg, hemia 150 kilometa long not blong Frankfurt, klosap long Main Reva long Jemani. Wan hae man blong ples ya nem blong hem Casimir von Wittgenstein Berleburg, i givim raet blong oli save stap long ples ya. Man ya i gat bigfala respek long skul. Ale, ol prija mo ol man blong stadi long Baebol we oli kam stap long Berleburg, oli wokem wan niufala translesen blong Baebol, we tede oli kolem Baebol blong Berleburg. ?Olsem wanem long translesen ya?
Wan long ol man ya we i go haed long Berleburg hemia Johann Haug. Hem i mas aot long ples blong hem, long Strasbourg, from we ol man blong stadi long ol tijing blong jos long ples ya, oli stap jajem hem wetem rong tingting. Johann Haug i wan man we i skul gud mo hem i gat gudhed blong lanem narafala lanwis. Hem i talem long ol fren blong hem, tingting blong hem “blong tanem fulwan Baebol long fasin we i klingud, blong stretem translesen blong Luther, blong mekem se mining blong hem i stret long Tok blong God mo i laenapgud wetem bigfala tingting biaen [long tok ya blong God].” (The History of the Berleburg Bible) Mak blong hem hemia blong mekem wan Baebol we i gat ol futnot we i eksplenem ol nara tok, mo hem i wantem tu se eni man i save ridim mo kasem save long hem. Johann Haug i askem sapot blong ol nara man we oli stap stadi long Baebol long ol nara ples long Yurop. Hem i mekem wok ya blong 20 yia. Oli stat blong prentem Baebol blong Berleburg long yia 1726. From we Baebol ya i gat ol futnot blong hem, oli mas prentem eit buk blong hem.
Baebol blong Berleburg i gat sam gudfala poen insaed. Eksampol, Eksodas 6:2, 3 i talem se: “Afta, God i toktok long Moses mo i talem long hem se: !Mi mi MASTA! Mo mi mi kamtru long Ebraham mo long Aesak mo long Jekob olsem wan God we i gat olgeta paoa: be tru long nem blong mi JEOVA, mi mi no soemaot mi long trifala.” Long futnot oli eksplenem se: “Nem ya JEOVA . . . , nem ya we i tabu mo we ol man oli mas talemaot.” Prapa nem blong God, Jeova, i stap tu long futnot blong Eksodas 3:15 mo Eksodas 34:6.
Baebol blong Berleburg i wan long ol olfala Baebol blong Jemani we i gat nem blong Jeova i stap long hem nating se hem i long vas, no long futnot. Wan long ol Baebol we i kamaot long taem blong yumi mo we i givim bigfala ona long prapa nem blong God hemia New World Translation of the Holy Scriptures, we ol Witnes blong Jeova oli wokem.