Advaes i Go Long Elda We i Lukaot Long Tiokratik Skul

LONG evri kongregesen, oli givim wok ya blong lukaot long Tiokratik Skul long wan elda. Sipos yu yu gat wok ya, yu mas glad blong lukaot long skul ya. Yu mas wantem blong givhan long evriwan we oli joen long skul ya blong oli kam gud moa. Sipos yu mekem olsem, skul ya i save givhan gud long olgeta we oli joen long hem long ples blong yu.

Wan impoten haf blong wok blong yu i blong lidim Tiokratik Skul evri wik. Yu mas tingbaot se olgeta we oli stap long miting ya, hemia olgeta we oli givim ol tok mo olgeta tu we oli stap lesin long skul ya. Yu mas lidim skul ya long fasin we i givhan long evriwan long kongregesen. Yu mas talem ol gudfala tok we bambae i givhan long olgeta. Oli mas wantem blong folem ol rod long pej 5 kasem 8 blong buk ya, we i tokbaot ol samting we skul ya i mekem blong givhan long yumi.

Yu mas wantem tumas blong givhan long evriwan long skul ya, nomata sipos oli rid long fored blong kongregesen, oli mekem wan tok we i olsem pleplei, no oli givim tok we i go stret long kongregesen. Yu givhan long olgeta blong oli tingbaot tok blong olgeta olsem wan janis blong kam gud moa long wok blong Jehova, i no jes wan wok nomo we oli mas mekem. Bigfala samting we bambae i givhan long olgeta blong oli kam gud moa, hemia taem olgeta wanwan oli traehad wetem fulhat blong olgeta. Be i impoten tu we yu yu kaen long olgeta mo yu wantem tumas blong givhan long olgeta. Yu traem mekem olgeta oli kasem save olsem wanem poen we oli wok long hem i save givhan long olgeta. Mo yu eksplenem wanem samting we oli mas mekem blong folem advaes long poen ya. Taswe, yu mas lesin gud long evri tok, nao bambae yu yu naf blong givim gudfala advaes.

Yu mas statem mo finisim Tiokratik Skul long stret taem. Yu save givim gudfala eksampol long ol narafala, sipos yu no bitim taem we yu yu gat blong mekem smol toktok blong yu long en blong evri tok. Sipos wan tok i bitim taem, yu, no brata we i givhan long yu, i mas ringim wan smol bel, no yu mas mekem wan narafala samting blong soemaot se taem blong hem i finis. Nao hemia we i stap givim tok i mas finisim toktok we hem i stap talem, mo i mas kamdaon long stej. Sipos wan narafala haf blong program i bitim taem blong hem, yu mas sotem toktok blong yu. Taem miting i finis, yu save toktok wetem brata we i bitim taem blong hem.

Taem yu yu stap long miting, yu nao yu mas lidim Tiokratik Skul. Sipos wanwan taem yu no save stap, wan narafala elda we ol elda oli jusumaot, hem i mas lukaot long skul ya. Maet yu harem se yu nidim wan blong givhan long yu blong rerem program blong skul, mo blong raetem mo givimaot ol pepa blong tok, mo blong faenem wan we i save tekem ples blong narafala taem wan i no save mekem tok blong hem. Ale, ol elda oli save askem long wan man blong givhan blong i halpem yu long ol wok ya.

Olgeta We Oli Putum Nem Blong Joen Long Skul. I gud yu pulum ol pablisa blong oli putum nem blong olgeta blong joen long Tiokratik Skul. Olgeta we oli joen oltaem long ol miting oli save putum nem blong olgeta sipos oli agri wetem olgeta tijing blong Baebol, mo sipos oli stap mekem ol Kristin fasin long laef blong olgeta. Taem wan i wantem joen long skul, yu mas talem gudfala toktok long hem we i kamaot long hat blong yu, from gudfala tingting blong hem. Sipos hem i no wan pablisa yet, yu we yu lukaot long skul, yu mas tokbaot ol fasin mo bilif we hem i mas gat, blong hem i naf blong joen long skul ya. I gud sipos brata no sista we i mekem Baebol stadi long hem i stap long taem ya tu (sipos no, papa no mama blong hem we i wan Witnes). Ol fasin mo ol bilif we man i mas gat blong hem i save joen long skul, oli sem mak long olgeta we man i mas gat blong hem i save kam wan pablisa. Oli stap long buk ya Organized to Accomplish Our Ministry, long pej 97 kasem pej 99. Yu mas holem wan lis blong ol nem blong olgeta we oli stap long skul, mo yu no mas foget blong ademap nem blong ol niuwan.

Ol Poen We Man i Mas Wok Long Olgeta. Lis blong ol poen we man i mas wok long olgeta i stap long buk ya, long pej 79 kasem 81. Olsem ol kala oli soemaot, hemia we i mekem riding long fored blong kongregesen, i save wok long eniwan long ol poen stat long 1 kasem 17. Olgeta we oli mekem tok olsem pleplei, oli save wok long eniwan long ol poen, be i no poen 7, 52, mo 53. Olgeta we oli mekem wan tok i go long kongregesen, oli save wok long eniwan long ol poen, be i no poen 7, 18, mo 30.

Taem brata no sista i finis long wan poen nao elda we i lukaot long Tiokratik Skul i givim wan narafala poen blong hem i wok long hem, elda ya no brata we i givhan long hem i mas makem long buk blong brata no sista ya. Elda i mas tekem wan pensel, mo i mas raetem stret dei we hem i givim niufala poen ya, long spes we i stap klosap long poen ya, aninit long tok ya “Dei We Yu Statem.” Taem tok ya i finis, elda i mas toktok wetem brata no sista ya, blong askem sipos hem i mekem ol samting long haf ya “Trenem Yu Wan” we i joen wetem poen blong hem. Sipos hem i mekem finis, elda i save putum wan mak long smol bokis aninit long tok ya “Trenem Yu Wan.” Sipos elda i ting se i gud we hem i gohed blong wok long sem poen, i no nid blong makem wan samting long pepa ya. Hem i livim spes ya aninit long “Dei We Yu Finisim” i stap klin nomo. Elda i makem spes ya nomo taem hem i rere blong go long narafala poen. Mo tu, long buk blong sista we i mekem tok, long pej 82, long lefsaed, klosap long rod ya we hem i yusum blong storian long man, elda i mas makem stret dei. I gat naf spes klosap long ol poen mo klosap long ol defren rod blong storian long man, blong makem tu taem. Olgeta we oli joen long skul oli mas karem buk blong olgeta i kam long miting.

Yu mas talem wan poen nomo blong wok long hem. Klosap oltaem, i moa gud yu talem ol poen folfolem lis ya. Be sipos wan i gohed kwik long Tiokratik Skul, maet yu talem long hem blong i stadi long sam poen hem wan, mo blong i folem ol advaes we hem i lanem. Yu save wok wetem hem long ol poen ya we yu ting se bambae oli givhan moa long hem, blong i kam wan gudfala man blong toktok mo blong tijim ol narafala.

Nating se wan man no wan woman i joen plante yia finis long Tiokratik Skul, be sipos hem i stadi long evri poen mo i folem ol advaes, samting ya i save givhan bigwan long hem. Sipos yu luk se i gat wan spesel samting we wan brata no sista i mas wok long hem, maet yu jusum poen ya we hem i mas wok long hem i bitim we yu folem ol poen wanwan long lis ya.

Taem Yu Givim Advaes. Yu mas yusum ol eksampol long Baebol mo ol tingting blong Baebol. Olgeta we oli kasem advaes oli mas harem se advaes ya mo fasin blong yu blong givim, i stanap long ol tingting blong God long Baebol.

Yu no mas fogetem se yu yu stap “wok wetem” ol brata mo sista blong yu. (2 Kor. 1:24) Yu yu sem mak nomo long olgeta, yu tu yu mas traehad blong kam gud moa long fasin blong yu blong toktok mo blong tijim man. I gud yu wan yu stadi long buk ya Tiokratik Skul i Save Givhan Long Yu Long Wok Blong God, mo yu folem ol advaes long hem. I gud yu givim gudfala eksampol we i save pulum ol narafala blong oli mekem sem mak.

Long semtaem, yu mas traehad blong givhan long olgeta we oli joen long skul, blong oli kam gud long fasin blong rid, oli lanem blong toktok gud, mo oli kam ol gudfala tija. Taswe, yu mas traem givhan long olgeta long enikaen rod, blong oli kasem save gud long ol poen, from wanem ol poen ya oli impoten, mo rod blong kam gud moa long ol poen ya. Buk ya i folem wan plan we i save givhan long yu blong mekem samting ya. Be plante taem i no naf blong ridimaot nomo ol tok blong buk ya. Yu mas tokbaot bigfala tingting we i stap insaed long ol tok ya, mo wanem we oli mas mekem blong folem tingting ya.

Sipos brata no sista we i givim tok i mekem gudfala wok long wan poen, yu talem gudfala toktok long hem. Yu talem sot tok nomo long samting we i mekem se tok blong hem i gud, mo from wanem i impoten we hem i bin mekem samting ya. Sipos yu luk se i gud we hem i wok moa long wan poen, yu meksua se hem i kasem save from wanem hem i mas gohed blong wok long poen ya. Yu tokbaot wanem we hem i save mekem blong wok moa long hem. Yu toktok stret, be yu mas kaen tu.

Yu mas tingbaot se, plante man oli faenem i had blong stanap mo toktok long fored blong ol man. Sipos wan i harem se hem i no mekem gud tok blong hem, maet hem i ting se i moa gud hem i lego nomo. Yu mas folem fasin blong Jisas, we hem i no mekem i strong tumas long “ol man we oli no strong,” mo hem i no spolem “olgeta we oli no gat paoa.” (Mat. 12:20) Yu mas tingbaot se brata no sista we i givim tok i harem olsem wanem. Taem yu givim advaes long hem, yu tingbaot sipos hem i jes joen long skul no hem i wan pablisa longtaem finis. Sipos yu talem ol tok we i tru mo i kamaot long hat blong yu, yu save mekem olgeta long skul oli strong, nao bambae oli traehad blong mekem bes blong olgeta oltaem.

Yu mas gat respek long evriwan we yu givim advaes long olgeta. Rom 12:10 i talem se: “Oltaem yufala i mas rere blong ona long yufala.” !Tok ya i stret gud long elda we i givim advaes long Tiokratik Skul! Sipos brata no sista we i givim tok i olfala moa long yu, yu mas folem gud ol tok blong 1 Timoti 5:1, 2. Be nomata se man i olfala no i yangfala, sipos yu givim advaes long kaen fasin, plante taem hem i rere moa blong lesin mo folem advaes ya.—Prov. 25:11.

Taem yu givim advaes, oltaem yu mas givhan long hemia we i givim tok blong i tingbaot se hem i kasem trening ya from wanem. Hem i no mas wantem nomo se elda i talem gudfala toktok long hem, nao hem i go long nekis poen, nogat. I nogud hem i wantem kam wan man blong toktok gud mo wan gudfala tija from we hem i wantem we ol man oli leftemap hem. (Prov. 25:27) Fasin blong toktok i wan presen we Jehova i givim long yumi. Ale, yumi wantem yusum presen ya blong leftemap hem nomo, mo blong givhan long ol narafala blong oli save hem mo lavem hem. Yumi kasem trening blong yumi kam naf blong mekem gud wok ya we Matiu 24:14 mo Matiu 28:19, 20 i talem. Ol brata we oli baptaes finis, maet bambae oli kam naf blong givim ol pablik tok mo blong tijim kongregesen, olsem ol man blong ‘lukaot gud long ol sipsip blong God.’—1 Pita 5:2, 3.

Taem wan brata no sista i kasem wan tok long Tiokratik Skul, i gud yu askem long hem blong i ridim haf blong buk ya we i tokbaot poen we hem i mas wok long hem. Hem i mas mekem samting ya jes afta we hem i kasem pepa blong tok blong hem. Yu pulum hem blong i folem samting we hem i lanem, taem hem i mekemrere tok blong hem, mo long ol storian blong hem evri dei, mo taem hem i givim ansa long miting, mo long wok blong prij.

Taem Yu Givimaot Ol Tok. Yu givimaot ol tok tri wik, no moa long tri wik, bifo we oli mekem. I moa gud yu givim wan pepa long olgeta, blong talem wanem tok we oli mas mekem.

Ol tok blong tijim kongregesen, yu mas givim long ol elda, antap moa, long ol elda we oli save mekem gud olkaen tok olsem. Sipos no, yu save givim long man blong givhan we i tij gud.

Taem yu stap tingbaot wanem tok we bambae yu givim long ol brata mo wanem tok we bambae yu givim long ol sista, yu mas folem advaes we i stap long pepa we program blong Tiokratik Skul blong yia i stap long hem. Sipos i gat smol brata nomo be i gat plante sista, yu no mas givim olgeta tok long ol sista nao ol brata oli stap mekem riding nomo, be i gud yu givim janis long ol brata tu blong oli mekem sam tok.

Taem yu givimaot ol tok, yu mas tingbaot ol brata mo sista wanwan. Maet wan elda no wan man blong givhan i gat wan tok blong givim long Miting Blong Kingdom Wok. ?Yu ting se i gud yu givim wan tok long hem long Tiokratik Skul long sem naet ya? Maet hem i gat wan pablik tok blong givim. ?Yu ting se i gud blong givim wan tok long hem long skul long sem wik ya? ?Yu ting se i gud blong givim tok long wan sista, be long sem naet yu givim tok long wan pikinini blong hem, we sista ya i mas givhan long hem blong rerem? Wan yangfala no wan we i no baptaes yet, ?tok we yu wantem givim, i stret blong hem i mekem? Yu mas jekem tu se tok we yu givim i stret wetem poen we hem i wok long hem.

Long tok blong ol sista, klosap oltaem olgeta nomo bambae oli jusum wanem rod we oli yusum blong storian long man, folem ol advaes long pej 78 mo 82. Yu givim nem blong wan sista we bambae hem i lesin, be sipos sista we i givim tok i wantem we tu i lesin long hem, hem i save tekem narawan bakegen. Sipos wan sista i askem long yu blong yu givim wan blong lesin long hem we i stret long fasin we hem i wantem mekem tok blong hem long hem, yu mas traem blong mekem olsem.

Sam Narafala Rum. Sipos i gat bitim 50 we oli joen long Tiokratik Skul, maet yu mas tingbaot narafala rum we sam long olgeta oli save joen long hem blong mekem tok blong olgeta. Maet oli mekem Tok namba 1, 2, mo 3 long narafala rum ya, no maet oli mekem Tok namba 2 mo 3 nomo, i dipen long nid blong kongregesen.

Ol narafala rum wanwan, oli mas gat wan brata we i naf gud blong givim advaes. I moa gud we brata ya i wan elda. Sipos i no gat naf elda, wan man blong givhan we i naf i save mekem wok ya. Ol elda bambae oli mekem desisen se hu ol brata we oli mekem wok ya. Yu mas wok gud wetem ol brata ya, blong mekem se nomata wanem rum we brata no sista i go long hem nekis taem blong mekem tok blong hem, be bambae i kasem help we hem i nidim blong gohed moa long poen we hem i stap wok long hem.

Skul We i Tijim Man Blong Rid. Sipos ol elda oli luk se i gat sam long kongregesen we oli nidim help blong lanem blong rid long lanwis we oli yusum long kongregesen, yu save mekem wan skul olsem, we i joen wetem Tiokratik Skul. Maet skul ya i blong tijim olgeta blong rid, no i blong oli lanem blong rid gud.

I no nid blong mekem skul ya long semtaem we Tiokratik Skul i stap gohed. Maet i mas gat moa taem blong givim help we oli nidim. Ol elda bambae oli skelem ol samting ya, mo bambae oli talem stret taem blong mekem skul ya. Maet oli luk se i gud blong givim tijing ya long olgeta olsem wan grup, no maet oli ting se i moa gud blong givim long olgeta wanwan.

Wan we i naf blong mekem wok ya, i mas tijim olgeta. I moa gud oli givim wok ya long wan brata we i save rid gud mo we i save gud lanwis blong yufala. Sipos i no gat wan brata we i stret long wok ya, ol elda oli save askem long wan sista we i naf blong mekem, mo we i givim gudfala eksampol long kongregesen. Sista ya i mas kavremap hed blong hem taem hem i tijim olgeta.—1 Kor. 11:3-10; 1 Tim. 2:11, 12.

Smol buk ya Apply Yourself to Reading and Writing i stap long plante lanwis. Buk ya i blong tijim man blong rid mo raet. Tija i save yusum narafala buk blong tijim ol man tu, stret long mak we ol man ya oli kasem finis. Taem oli kam naf blong rid, i gud blong pulum olgeta blong joen long Tiokratik Skul.

Yu we yu lukaot long Tiokratik Skul, yu save givhan gud long kongregesen. Yu mas rere gud. Olsem Rom 12:6-8 i talem, yu mas lukaot gud long wok blong yu, olsem wan spesel presen we God i givim.