?Yu Yu Rere Blong Wok?
1 Wan bigfala samting i hapen long 778 B.K.T. Long wan vison, profet Aesea i luk “Hae God we i Masta blong yumi i stap sidaon long bigfala jea blong hem long wan ples we i hae we i hae, i blong ona.” Nao, Aesea i harem we ol seraf oli stap talemaot glori blong Jeova, se: “!Hae God, hem i tabu, we i tabu, we i tabu!” !Hemia i rili wan nambawan samting blong luk! Long vison ya, Jeova i askem wan impoten kwestin se: “?Bambae mi mi sanem hu? ?Hu bambae i go talemaot tok blong mifala?” Jeova i no eksplenem se wok ya i olsem wanem no se man i save kasem wanem frut from wok ya. Nating se i olsem, Aesea i no tektaem, hem i ansa se: “!Mi ya, mi save go! !Yu sanem mi!”—Aes. 6:1, 3, 8.
2 Ol man blong Jeova oli rere oltaem blong mekem wanem we hem i askem olgeta blong mekem. (Sam 110:3) Mo naoia, wan tok i stap goaot blong singaotem olgeta we oli rere blong mekem moa wok. ?Yu yu rere blong ansa olsem Aesea?
3 I nidim tumas ol brata blong wok long Betel. Olgeta ya oli mas wantem blong putum Kingdom long fasples. Oli mas rere blong mekem wanem we God i askem long olgeta blong mekem blong sapotem wok blong prij long fulwol. (Mat. 6:33) Yes, wok long Betel i givim janis long wan man blong mekem wok blong Jeova wetem ful laef blong hem. ?Hem i save mekem samting ya olsem wanem?
4 Wok Long Betel: Tingbaot olgeta wok we oli mas mekem evri dei long Betel long Normandie, Niu Kaledonia. Ol brata mo sista long Betel ya oli gat janis blong wok wetem slef we i stret mo waes, mo Hed Kampani, we oli wokem ol buk long saed blong Baebol blong yumi yusum long wok blong prij mo blong stadi wanwan. (Mat. 24:45) Mo tu, Betel ya i lidim wok blong tanem ol buk i go long 3 lanwis ya: Bislama, Lifu mo Walis. I gat plante samting blong mekem blong lukaot long ol wok we i stap gohed long ol 28 kongregesen blong trifala kantri ya, Niu Kaledonia, Vanuatu, mo Walis. I gat wok tu blong givhan long Rijenol Bilding Komiti we i stap lukaot long wok blong fiksimap ol olfala Haos Kingdom mo bildim ol niuwan. I nidim volontia we oli wantem mekem ol wok blong sanem buk i go long ol kongregesen, klinim ples, mekem evri samting i wok gud, rerem kakae, pem ol samting, lukaot long ol kaon, mo plante narafala wok blong Betel bakegen.
5 Yes, i klia se i gat bigfala wok blong mekem. Be, ol wok ya oli mekem man i haremgud tumas long saed blong spirit. Yes, yumi stap yusum paoa blong yumi blong givhan long wok blong prij mo tijim ol man. Samting ya i givim bigfala glad long yumi. Wok blong Betel i givhan long yumi blong savegud moa ogenaesesen blong Jeova. Samting ya i mekem yumi tingbaot toktok blong man blong raetem Ol Sam, we i bin leftemap tingting blong ol man Isrel blong save moa long saed blong stamba ples we i lidim ol tiokratik wok long taem blong olgeta.—Sam 48:12, 13.
6 Blesing From Wok Long Betel: ?Olgeta we oli stap wok long Betel oli gat wanem filing long saed blong wok we oli stap mekem? Makemgud ol tok ya we ol olfala mo ol yangfala memba blong Betel famle oli talem. Wan sista we i bin wok long Betel blong tri yia finis i talem se: “Laef long Betel i mekem se mi frengud moa wetem Jeova. Moa we mi stap long ples ya, moa we mi lanem ol wok we oli stap gohed long Betel, ale ol samting ya oli tijim mi moa long saed blong ol fasin blong Jeova. Wok long Betel i openem ae blong mi blong luk se Jeova i stap yusum ol defren kaen man. Mo yu no nid blong kam stretgud olgeta blong go wok long Betel.”
7 Wan yangfala brata i talem se: “Mi rimemba tingting we mi bin gat se, ‘I naes tumas blong go insaed long niufala wol mo talem long ol man we oli bin holem strong long bilif bifo, se mi bin spenem ful laef blong mi long Betel, i bitim we mi mekem wan wok blong winim mane.’ ”
8 Wan brata i tingtingbak long trening we hem i kasem long Betel, nao i talem se: “Wan long ol bigfala blesing we mi kasem hemia we mi lanem moa long saed blong mi wan, mi luksave wanem ol fasin we mi nidim blong wok long hem, mo biaen mi wokem ol fasin ya. Mi filim se naoia mi kam moa gud blong mekem wok blong Jeova. Mi luk se mi gat longfala tingting moa i winim fastaem, mi save bos moa long tingting blong mi, mo mi naf moa blong soem lav.”
9 Wan sista i tokbaot ol blesing we hem i kasem i se: “Ol program long saed blong spirit long ples ya oli tijim mi plante long saed blong Jeova mo olsem wanem mi save gat tingting, filing, mo fasin olsem hem. Mo from we trening ya i stap gohed oltaem, mi kasem blesing oltaem.”
10 Wan brata we i bin spenem 59 yia long fultaem wok, mo 43 long ol yia ya hem i spenem long Betel, i talem se: “Maet samfala oli ting se Betel i olsem wan haos blong pris, be tingting ya i no tru. Laef blong mifala i folem wan program, taswe mifala i mekem plante samting. . . . Evri dei mi haremgud long wanem we mi mekem. ?From wanem? From we taem mi mekem wok blong Jeova long ful laef blong mi, mi save se mi stap mekem samting we ‘i stret nomo blong yumi mekem.’ ”—Luk 17:10.
11 Wan narafala brata we i bin wok long Betel blong 62 yia i talem se: “Mi bilif strong se, bifo we wol ya i kam wan Paradaes, Betel i beswan ples long wol naoia. Mi mi neva sore from disisen we mi bin tekem blong mekem fultaem wok. Mi glad tumas blong stap olsem wan Witnes mo blong joen long ogenaesesen blong Jeova long wol ya, we i stap gru. Wetem help blong Jeova, mi gat strong tingting blong stap long Betel mo yusum ful laef blong mi blong mekem intres blong Kingdom i goaot moa.”
12 Hemia sam nomo long plante blesing we yu save kasem sipos yu go laef long Betel. Be olsem ol narafala wok long saed blong spirit, fastaem yu mas kasem sam mak. ?Wanem sam long ol mak we ol memba blong Betel famle oli mas kasem?
13 Ol Mak We Wan Memba Blong Betel i Mas Kasem: Olgeta we oli wantem go wok long Betel oli mas folem ol stamba rul we oli stap long bokis. Be antap long hemia, i impoten tumas we oli rere blong wok had, mo oli no man we “oli laekem moa ol pleplei.” (2 Tim. 3:4, NW; 1 Kor. 13:11) Ol memba blong Betel famle oli mas ol man mo woman we oli strong long saed blong spirit. Oli gat gudfala fasin blong stadi mo oli trenem paoa blong tingting blong olgeta blong luksave “wanem fasin i gud mo wanem fasin i nogud.” (Hib. 5:14) Ol man mo woman ya oli soemaot finis long laef blong olgeta bifo we oli kam long Betel, se oli bigman long saed blong spirit. Oli soemaot samting ya long stael blong klos mo hea blong olgeta, mo long miusik wetem pleplei we oli jusum. Ol memba blong Betel we oli wok wetem fulhat blong olgeta, oli rere blong mekem eni wok we i nidim blong mekem. Olgeta we oli yangfala oli kasem ol wok we oli strong, olsem prentem ol buk, putum ol buk long bokis mo sanem i go long narafala ples, fiksimap ol samting long haos, lukaot mo klinim haos, wasem klos, mo rerem kakae. (Prov. 20:29) Wok long Betel i defren olgeta long ol wok blong wol. Hem i mekem man i haremgud from we hem i wan tabu wok we i givim ona long nem blong Jeova.—Kol. 3:23.
14 Fastaem, taem oli singaot wan blong i go wok long Betel, oli askem hem blong stap wan yia. Samting ya i givim janis long hem blong kasem trening long wok we i karem gudfala frut. Long faswan yia ya, maet bambae hem i wantem mekem Betel i kam hom blong hem. Lav long Jeova nao i pusum ol memba blong Betel famle blong putum wok blong Kingdom fastaem long ol samting we olgeta nomo i wantem. Jeova i glad tumas long samting ya.—Mat. 16:24.
15 Ol Nid Naoia: I nidim moa ol brata we oli no mared, blong mekem ol defren wok long Betel. Ol fultaem paenia nao oli save wok long Betel from we oli stap finis long fultaem wok, be hemia i no wan rul. Samtaem, ol sista we oli no mared mo ol hasban wetem waef blong olgeta, we yia blong olgeta i stap bitwin 19 mo 35, oli save kam long Betel blong givhan long wan wok we maet oli gat gudhan blong mekem. Be mifala i leftemap tingting tu blong ol brata mo sista we yia blong olgeta i bitim 35 finis blong wok long Betel sipos oli gat sam spesel save mo trening long wan wok we Betel i nidim man blong mekem. Eksampol, maet samfala oli gat stefeket blong mekem ol kaon, kukum kakae, putum elektrik, mo sam narafala wok bakegen. Be hemia i no min se oli mas skul blong kasem wan stefeket long yunivesiti jes blong kam long Betel. Olgeta we oli langud finis blong mekem wan wok, maet bifo we oli kam long trutok, oli save eksplenem wok blong olgeta mo putum wetem fom we oli sanem i kam blong aplae long Betel.
16 Sipos yu aplae blong wok long Betel be oli no akseptem, yu no mas harem nogud. Maet yu wantem aplae evri yia. Sam brata we oli gat gudhan blong mekem sam wok, oli save kam long Betel blong givhan smoltaem. Maet oli aplae blong wok wan kasem fo wik, no tri manis long Betel. Sekretari blong kongregesen i gat ol fom blong olgeta we oli wantem kam wok smoltaem long Betel. Yufala i save odarem fom ya long Fom Blong Odarem Ol Buk.
17 I wan bigfala blesing blong joen wetem ol brata blong Kraes blong mekem spesel wok ya blong Jeova long Betel. Hed Kampani i tangkiu bigwan long evriwan we oli gat tingting blong sakrefaes, mo we oli rere blong wok blong givhan long ol brata sista long olgeta ples long wol.—Fil. 2:20-22; 2 Tim. 4:11.
18 Ol Yangfala—Rere Naoia Blong Wok Long Betel: Yu save stat rere blong wok long Betel taem yu no kasem 19 yia yet. ?Ol yangfala oli save mekem wanem blong rere blong wok long Betel? Jisas i talem se: “?Hu long yufala we i wantem wokem wan bigfala haos we i hae, be i no sidaon fastaem blong wokemaot praes blong olgeta samting blong hem?” (Luk 14:28) I impoten tumas blong plan mo reregud blong bildim wan haos. Long sem fasin, i impoten tumas we ol yangfala oli skelemgud olsem wanem oli stap bildimap fiuja blong olgeta long wok blong Jeova. Blong kasem ol mak ya long saed blong spirit, oli save putum fandesen taem oli yangfala nomo. Yu we yu wan yangfala: ?Yu yu stap putum fandesen blong yu olsem wanem? Sipos yu wantem wok long Betel, bambae yu kasem blesing sipos yu folem ol advaes ya biaen.
19 “Holem Tok Ya” Blong Mekem Wan Spesel Wok: Olsem we i stap long Matiu 19:12, Jisas i leftemap tingting blong ol disaepol blong hem blong “holem tok ya” blong no mared. ?From wanem? I no from samting we olgeta nomo i wantem, be “blong mekem ol wok blong God, we hem i King blong olgeta.” Long sem fasin, Pol i leftemap tingting ya blong ‘mekem wok blong Masta blong yumi, we i no gat narafala tingting i pulum yumi.’ (1 Kor. 7:32-35) Sore tumas, plante yangfala we oli no mared oli mestem janis ya blong wok long Betel from we oli mared kwik tumas. Yumi leftemap tingting blong ol yangfala brata sista blong yumi blong yusum paoa blong olgeta blong mekem fultaem wok from we oli no gat responsabiliti long famle. Nao biaen, taem oli mared, oli save kam ol gudfala hasban from we oli gat plante ekspiriens long laef mo long Kristin minista wok. Samfala we oli bin wok plante yia long Betel, oli mared mo oli bin gohed blong wok long Betel wetem waef blong olgeta. Sipos biaen, oli kasem sam spesel wok bakegen, olsem seket elda no misinari wok, bambae oli no save sore we oli bin stap long Betel.
20 No Letem Ol Samting Long Saed Blong Bodi Oli Pulum Yu: I gud we ol yangfala oli askem long olgeta wan se, ‘?Taem mi kamaot long hae skul, mak blong mi i blong wok from mane no blong mekem fultaem wok blong Jeova?’ I tru se sipos yu mekem wok blong Jeova fultaem, bambae yu mas lego plante samting long laef blong yu. Be bambae yu mas lego plante samting tu taem yu stap wok from mane. ?Taswe, i gud blong tingbaot se, weswan long tufala wok ya we i save givim blesing long yu blong longtaem? Jisas i givim ansa we i klia. Long Matiu 6:19-21, hem i talem se: “I nogud yufala i stap hivimap ol gudgudfala samting blong yufala long wol ya blong kam rijman. Long ples ya, ol kakros oli save kakae, mo rosta i save spolem ol samting, mo i gat ol man blong stil we oli save brekem haos, blong go insaed blong stil. Yufala i mas hivimap ol gudgudfala samting blong yufala long heven. Long ples ya, kakros i no save kakae, mo rosta i no save spolem ol samting, mo ol man blong stil oli no save brekem haos, blong go insaed blong stil. Mi mi talem olsem, from we long weples we ol gudgudfala samting blong yufala i stap long hem, be oltaem tingting blong yufala tu i stap long ples ya.” I gud we yumi mekem wok blong Jeova long ful laef blong yumi. Yumi no mas letem hat blong yumi i pulum yumi blong ronem wan wok long wol no ol samting long saed blong bodi. Yumi evriwan i mas luksave se i gat wan sas samting nomo we bambae yumi no sore sipos yumi traehad blong kasem. Samting ya hemia blong gat wan gudfala fasin fren wetem Jeova blong mekem hat blong hem i glad. (Prov. 27:11) Taem wan yangfala i putum Jeova fastaem long laef blong hem, hem i soem wanem samting nao we hem i putum se i sas moa long laef blong hem, mo hem i soem se Kingdom i impoten olsem wanem long hem. Rimemba, “blesing blong Jeova, hemia nao samting we i mekem man i rij. Mo hem i no givim soa wetem.” (Prov. 10:22, NW ) Ol yangfala oli gat nambawan janis blong soem se hat blong olgeta i stap wea taem oli givim wan gudfala samting i go long Jeova from olgeta samting we hem i givim. Wok long Betel i givim nambawan janis ya long ol yangfala we oli kasem ol mak blong Betel.
21 Olgeta We Oli Wok Long Betel Oli Mas Holem Ol Stret Fasin: Man blong raetem Ol Sam i askem se: “?Bambae mi save mekem laef blong mi i klin olsem wanem?” Hem i ansa se: “Mi mi mas obei long ol tok blong yu [Jeova].” (Sam 119:9) Samting ya i min se yumi stap longwe long ol doti fasin blong wol ya blong Setan. Ol nogud pija long Internet, fasin we i no stret blong man i mekem taem hem i kampani wetem wan woman no woman wetem man, ol pleplei mo miusik we oli doti, fasin blong drong, hemia sam long ol trap we Setan i stap yusum blong blokem ol yangfala blong no kasem ol mak long saed blong spirit. I nidim strong tingting blong agensem ol samting ya. Yangfala, sipos yu stap joen long ol samting ya, storian wetem ol elda long kongregesen blong yu mo winim ol samting ya bifo we yu aplae blong wok long Betel. Sipos yu wantem mekem wok blong Jeova fulwan, i impoten tumas blong gat wan tingting we i no stikim yu.—1 Tim. 1:5.
22 Lanem Blong Laef Wetem Ol Narafala: Blong gohedgud long wok blong Betel, i impoten blong lanem blong laef wetem narafala. Ol brata mo sista long Betel long Niu Kaledonia, oli kamaot long ol defdefren ples. I naes tumas blong luk samting ya long Betel, be long semtaem hem i wan traem. Sipos yu wantem go wok long Betel, i gud blong askem long yu wan se: ‘?Mi mi save kros kwik taem narafala i no agri wetem tingting blong mi? ?Ol narafala oli faenem i isi blong fren wetem mi?’ Sipos yu nidim blong kam moagud yet long saed ya, i gud blong stat wok long hem naoia. Sipos yu mekem olsem, bambae yu faenem i moa isi blong laef mo wok wanples wetem ol memba blong Betel famle.
23 I gud we yu wokhad blong kam bigman long saed blong spirit mo wokem wan gudfala fasin fren wetem Jeova. Folem wan gudfala program blong stadi, mo ridim Baebol evri dei. Wok strong blong talemaot gud nius. Taem yu mekem ol samting ya oli wok long laef blong yu, yu soemaot se yu stap gohed moa long saed blong spirit. (1 Tim. 4:15) I gat nambawan fiuja blong olgeta we oli stap rere naoia blong mekem fultaem wok.
24 Ol Papa Mama, Trenem Ol Pikinini Blong Yufala: ?Ol papa mama oli save mekem wanem blong leftemap tingting blong pikinini blong olgeta blong joen long fultaem wok? Jisas i talem se: “Man we i stap lan, hem i no hae moa long tija blong hem.” (Luk 6:40) Wan pikinini i save lanem plante nambawan samting long fasin blong tija blong hem. Ol Kristin papa mama oli mas tingbaot samting ya, taem oli stap wok had blong trenem ol pikinini blong olgeta “blong mekem ol fasin we God i wantem.” (1 Tim. 4:7) Plante taem, ol pikinini oli folem tingting we papa mama i soem long ol samting long saed blong spirit. Taswe, i gud we ol papa mama oli askem long olgeta wan se: ‘?Mi rili tinghae long ol wok blong Betel we oli mekem wosip blong Jeova i goaot moa? ?Mi agri se Jeova i stap blesem ol wok long Betel? ?Mi rili bilif se wok blong Jeova nao i beswan wok we pikinini blong mi i save jusum blong mekem long ful laef blong hem?’ Sipos yumi rili gat tangkiu long wok we i stap gohed long Betel, samting ya bambae i givhan long ol pikinini blong yumi blong olgeta tu oli save gat tangkiu olsem.
25 Elkana mo Hana, tufala i gat bigfala tangkiu long trufala wosip. Tufala i soem nambawan eksampol long ol papa mama tede. Long Isrel bifo, ol man nomo oli “mas kam mekem wosip long God” long haos tapolen tri taem long wan yia. Nating se i olsem, “evri yia,” Elkana i tekem famle blong hem mo oli wokbaot 30 kilometa long leg nomo blong mekem sakrefaes long stamba ples blong wosip blong Jeova. (Eks. 23:17; 1 Saml. 1:3, 4, 9, 19; 2:19) Yes, hed blong famle ya i tingbaot ol samting long saed blong spirit mo hem i wantem se famle blong hem tu i gat sem tingting olsem.
26 Hana i gat sem tingting olsem hasban blong hem long saed blong trufala wosip. Hem i luksave se hem tu i mas joen blong givhan long wok blong trufala wosip long haos tapolen. Hem i promes se sipos Jeova i givim wan boe long hem, bambae hem i givhan long boe ya blong wok long haos tapolen. (1 Saml. 1:11) Loa blong Moses i talem se wan hasban i gat raet blong blokem promes blong waef blong hem sipos i luk se promes ya i no stret. (Nam. 30:6-8) Be, i klia se Elkana i agri long promes blong Hana, mo hemia i soem se Elkana tu i sapotem trufala wosip.—1 Saml. 1:22, 23.
27 ?Samuel i mekem wanem taem hem i luk we papa mama blong hem tufala i gat fasin tangkiu mo gudfala tingting long saed blong ol wok blong God? Taem Samuel i yangfala yet, hem i wantem mekem ol wok we God i givim long hem blong mekem mo hem i fasgud long ol wok ya. Mo tu, hem i kasem trening blong mekem moa long wok blong God. Hem i laekem ol wok ya tumas. Afta we Samuel i stat wok long haos tapolen, Elkana mo Hana i gohed blong soem intres long wok we hem i mekem. Tufala i stap kam visitim Samuel blong leftemap tingting blong hem mo givhan long hem blong hem i save gohed blong mekem wok ya fultaem.—1 Saml. 2:18, 19.
28 !Elkana mo Hana, tufala i rili soem wan nambawan eksampol long ol Kristin papa mama tede! Ol pikinini blong yumi bambae oli wantem tumas, long hat blong olgeta, blong mekem wok blong halpem ol narafala sipos oli harem we yumi tokbaot ol wok blong Betel olsem wan blesing, mo sipos oli luk we yumi rere blong lego plante samting we yumi nomo i wantem, blong mekem wok blong Kingdom i gohed moa. Plante papa mama oli stap givim ol gudfala tingting olsemia long pikinini blong olgeta. Wan smol gel we i gat seven yia, i raetem se: “Taem mi kam bigwan, mi wantem wok long Betel, mo i gat sam samting we mi mi laekem blong bambae mi mekem long ples ya. (1) Mi laekem blong taepem ol Wajtaoa mo Wekap!, (2) mi laekem wokem ol pija blong Wajtaoa, (3) mi save benem ol klos. Nomata weswan long trifala wok ya we yufala i nidim mi blong mekem, be bambae mi mekem.” I naes tumas blong luk se sam long ol pikinini blong yumi oli stat finis blong wokem gudfala tingting ya blong wantem wok.
29 Ol yangfala, yufala i mas rimemba se “wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.” (1 Jon 2:17) Gohed blong traem kasem ol wok long saed blong spirit, olsem wok long Betel. Ol papa mama, yufala i mas folem eksampol blong ol man mo woman blong bilif, we long taem bifo, oli bin leftemap tingting blong ol pikinini blong olgeta blong fasgud long God. (2 Pita 3:11) Mo i gud yumi evriwan i wok tugeta blong halpem ol yangfala brata mo sista blong yumi blong mekem wok blong Bigman ya we i Wokem yumi, go kasem mak ya we oli naf blong mekem. Hemia nao ‘bambae i givhan long yu long laef ya long wol, mo bakegen, long laef ya we bambae i kamtru biaen.’—1 Tim. 4:8; Pri. 12:1.
[Bokis blong pija long pej 4]
Sam Rul Blong Tingbaot Sipos Yu Wantem Wok Long Betel
● Yu mas baptaes bitim wan yia finis
● Yu mas bigman long saed blong spirit we i lavem tumas Jeova mo ogenaesesen blong hem
● Yu mas strong long saed blong spirit, yu mas naf blong bos long tingting mo filing blong yu, mo yu mas gat gud helt
● Yu mas gat sitisensip no pemit blong stap long Niu Kaledonia
● I gud blong save rid, raet, mo toktok Franis