I Nidim Help Blong Yu
1 “Tangkiu from bigfala wok we yufala i stap mekem blong mifala evriwan. Yufala i rili stap givhan long mifala.” Tok ya i soemaot bigfala tangkiu we yumi gat long ol Kristin elda mo ol man blong givhan. Naoia we ogenaesesen blong God i stap kam bigwan moa oltaem, yumi nidim plante moa man we oli bigman finis long saed blong spirit, blong oli wok long ol kongregesen raon long wol we namba blong olgeta i klosap 100,000. Sipos yu yu wan brata we yu baptaes finis, i nidim help blong yu tu.
2 “Wantem Mekem”: ?Olsem wanem yu save wantem mekem moa wok long saed blong spirit? (1 Tim. 3:1) Fastaem, yu mas soemaot gudfala eksampol long olgeta haf blong laef blong yu. (1 Tim. 4:12; Taet. 2:6-8; 1 Pita 5:3) Yu mas joen fulwan long wok blong prij, mo halpem ol narafala blong oli mekem sem mak. (2 Tim. 4:5) Soemaot trufala intres long olgeta we oli gat sem bilif olsem yu, mo givhan long olgeta. (Rom 12:13) Yu mas stadi gud long Tok blong God, mo yu mas kamgud long fasin ya blong “tijim ol man.” (Taet. 1:9; 1 Tim. 4:13) Yu mas mekemgud ol wok we ol elda oli givim long yu. (1 Tim. 3:10) Sipos yu yu hed blong famle, yu mas ‘lukaot gud long famle blong yu.’—1 Tim. 3:4, 5, 12.
3 Blong wok olsem wan elda no wan man blong givhan, i nidim fasin ya blong wok had mo rere blong lego sam samting we yumi nomo i wantem. (1 Tim. 5:17) Taswe, taem yu wantem mekem wok ya, yu mas tingbaot se bambae yu mekem wok blong ol narafala wetem tingting daon. (Mat. 20:25-28; Jon 13:3-5, 12-17) Tingting dip long ol fasin blong Timoti, mo traehad blong folem long laef blong yu. (Fil. 2:20-22) Sem mak olsem Timoti, ol narafala oli mas lukluk se yu yu wan gudfala man from ol gudfala fasin blong yu. (Wok 16:1, 2) Taem yu stap wokem ol fasin long saed blong spirit we bambae yu nidim, mo taem yu stap folem ol advaes we ol narafala oli givim long yu blong yu kamgud moa, “bambae olgeta man oli save luk we yu stap gohed gud long laef blong yu mo long wok blong yu.”—1 Tim. 4:15.
4 Papa Mama, Trenem Ol Pikinini Blong Oli Givhan: Ol pikinini oli save lanem blong givhan taem oli smol yet. Trenem olgeta blong oli lesin gud long ol miting, blong oli prij, mo blong oli gat gudfala fasin long Haos Kingdom mo long skul. Tijim olgeta blong oli mekem wok blong ol narafala, olsem wok blong klinim Haos Kingdom, givhan long ol olfala, mo sam narafala wok olsem. Letem olgeta oli haremsave glad ya we yumi kasem taem yumi gat fasin blong givim. (Wok 20:35) Ol trening ya i save halpem olgeta blong bambae oli kam ol paenia, man blong givhan mo elda long fiuja.