Haf 4—Givhan Long Ol Baebol Stadi Blong Oli Gohed Gud
Trenem Studen Blong i Rerem Stadi Blong Hem
1 Taem wan studen i tekem taem blong ridim ol haf we bambae hem i stadi long hem, i makem ol ansa blong hem, mo i tingbaot olsem wanem blong yusum prapa tok blong hem blong ansa, studen olsem bambae i gohed gud long saed blong spirit. Taswe, afta we yu statem wan Baebol stadi, yu wetem studen blong yu, yutufala i mas mekem rere wan stadi tugeta blong soemaot long hem olsem wanem blong rere. Long bighaf blong ol studen, i gud blong mekem rere wan ful japta no wan ful stadi wetem olgeta.
2 Makem Ansa Mo Raetem Not: Eksplenem olsem wanem blong faenem ol stret ansa long ol kwestin long buk. Soemaot buk blong yu long studen, blong hem i luk olsem wanem yu yu putum laen aninit long ol stamba wod nomo no ol stamba tingting. Taem yutufala i stap mekem rere japta, maet bambae hem i wantem mekem olsem yu, hemia blong putum laen aninit long ol tok nomo we bambae oli halpem hem blong tingbaot ansa. (Luk 6:40) Biaen, askem long hem blong i ansa long prapa toktok blong hem. Fasin ya bambae i givhan long yu blong luk sipos studen ya i kasem save gud long stadi no nogat.
3 Wan impoten samting we studen i mas mekem taem hem i rere stadi blong hem, hemia se hem i mas jekem gud ol vas we oli no raetem fulwan long buk. (Wok 17:11) Halpem hem blong kasem save se ol wanwan vas we oli stap oli joen wetem ol wanwan poen long haf ya we yutufala i stap rerem. Soem long hem olsem wanem blong raetem ol smosmol not long saed blong pej long buk blong hem. Makemgud long tingting blong hem se Baebol nao i stamba blong ol save we hem i stap lanem. Leftemap tingting blong hem blong yusum ol vas long ol ansa blong hem taem yutufala i stadi.
4 Ol Bigfala Poen Mo Tingtingbak: Bifo we studen i stat blong mekem rere stadi blong hem, i gud sipos hem i kasem save long ol bigfala poen we bambae hem i stadi long hem. Soem long hem se hem i save kasem save long ol bigfala poen sipos hem i ridim nem blong japta, ol smol stamba tok, mo lukluk ol pija. Eksplenem long hem se bifo we hem i finis blong rere stadi blong hem, i gud sipos hem i tekem smol taem blong tingtingbak long ol bigfala poen long stadi, maet hem i save yusum bokis blong tingtingbak sipos i gat. Fasin ya bambae i givhan long hem blong holemtaet ol save ya.
5 Taem yumi trenem wan studen blong reregud stadi blong hem, hemia bambae i givhan long hem blong givim ol gudfala ansa long ol miting blong kongregesen. Bambae fasin ya i givhan long hem tu, afta we hem i finis blong stadi wetem yumi, from we hem i lanem finis fasin ya blong stadi oltaem.