!Yu No Mas Kam Let!

NIUSPEPA ya USA Today i talem se: “Fasin ya blong kam let oltaem i wan bigfala fasin blong ol bos blong ol kampani.” Hem i gohed blong tokbaot wan stadi we oli mekem long 2,700 bos. Oli faenem se “sipos i gat 10 miting, ol bos ya bambae oli kam let long sikis miting.”

Ol bisnesman oli ting se man we i kam let oltaem hem i no gat gudfala fasin. Be i no hemia nomo. Wan stadi we oli mekem long 81,000 man we oli fulumap pepa blong askem wok, i soem se: “Bigfala samting we i mekem se ol kampani oli lusum mane, hemia ol aoa we ol wokman oli lusum from we oli kam let no from we oli mestem plante tumas dei blong wok.” I no ol big bisnes nomo we oli kasem trabol from ol man we oli kam let oltaem. Wan stadi blong ol hed tija long ol haeskul i soemaot se “bigfala samting we oli panisim ol studen from, mo we i stap hapen moa i bitim ol narafala samting, hemia se oli kam let.”

Taem God i wokem yumi, hem i wantem se yumi respektem taem. Hem i putum ‘san mo mun’ blong makemaot taem. (Jenesis 1⁠:​14-16) Tede, yumi gat ol hanwaj ale yumi save makemaot ol menet mo ol seken tu. Be, nating se yumi gat olkaen klok olsem, plante long yumi i let yet​—⁠long wok, long skul, mo long sam narafala impoten promes we yumi mekem.

?From wanem man i kam let oltaem? ?Yu ting se hem i no gat naf taem blong mekem evri samting? I tru se wok blong winim mane mo wok insaed long famle i tekem plante taem. Nating se i olsem, wan mama we i stap wok blong winim mane, nem blong hem Wanda Rosseland, i talem se: “Taem mi luksave se yumi evriwan i sem mak, yumi gat 24 aoa long wan dei, long taem ya nao mi no moa talem se mi no gat naf taem. Mi tingting dip long bisnes ya, mo mi luksave se yumi no let from we yumi no gat naf taem, nogat. Yumi let from we long laef blong yumi naoia i gat plante tumas samting blong blokem yumi mo blong pulum ae blong yumi.”

Tingbaot Reneea we i wan Witnes blong Jeova mo i mama blong faef pikinini. Hem i talem se: “Taem ol pikinini blong mi oli smosmol, i wan bigfala wok blong rerem olgeta wanwan blong oli go long skul no blong mifala i go long ol Kristin miting. Nating se i olsem, mifala i neva let. Be naoia we olgeta oli bigbigwan finis, oltaem mi mekem nogud fasin ya blong kam let.” ?Yu tu yu gat nogud fasin ya? !Sipos yes, yu save jenisim fasin blong yu! Hemia sam advaes we yu save folem.

● TINGBAOT NOGUD FRUT WE BAMBAE I KAMAOT. Maet man we i let oltaem i ting se hemia wan smol samting nomo. Be traem harem tok ya blong Baebol: “Ol flae we oli ded, hemia nao samting we i mekem gudfala oel blong man blong wokem senta i sting mo i ronaot. Long sem fasin, wan smol krangke samting nomo we gudfala man i mekem i save spolem waes mo haenem blong hem.” (Prija 10⁠:​1, NW ) Yes, “wan smol krangke samting nomo” we i soem se yu no tingbaot narafala, i save spolem gudnem we yu yu gat wetem tija blong yu no bos blong yu.

Woman ya Marie i tekem sam kos long wan kolej long ples blong hem. Nao hem i luk we samfala long klas blong hem “oli no ting se i impoten blong kam long stret taem.” Plante long olgeta oli stap kam let. Woman ya i gohed se: “Oli mas jenisim fasin ya hareap, from we tu tija blong kos ya tufala i stanemap sam strong rul. Sipos wan studen i kam let, nating se sam menet nomo, be tufala i makem hem se hem i no stap. Nao sipos tufala i makem plante dei we wan studen i no stap, ale studen ya bambae i no pasem eksam blong hem.”

Wan narafala samting se, sipos yu yu let oltaem, ol fren blong yu bambae oli no moa tinghae long yu. Wan medel man we nem blong hem Josef i tingbaot wan Kristin we hem i save plante yia bifo. Ol man oli respektem Kristin ya from we hem i gat gudhan blong tijim narafala. Be hem i gat wan fasin we i mekem ol man oli sem long hem. Joseph i talem se: “Oltaem hem i kam let. !Mi minim se hem i let blong evri samting! Long tingting blong hem, fasin ya i no wan bigfala samting. Ol man oli tok plei long saed blong fasin blong hem blong kam let.” ?Olsem wanem? ?Ol man oli stap tokbaot yu se yu wan man we yu kam let oltaem? Sipos yes, i isi blong oli no moa luk ol gudfala fasin blong yu.

● TINGBAOT OL NARAFALA. Sipos yu kam let oltaem, bambae yu no soem respek long ol narafala, mo yu mekenoes we i pulum ae mo tingting blong ol narafala. Mo tu, ol narafala oli save ting se yu yu gat flas tingting. Wan bisnesman i tokbaot from wanem plante bos oli kam let long ol miting blong olgeta, i se: “Bighaf blong mifala i flas nomo.” Ol Kristin oli defren, oli luk ol narafala man olsem we oli gud moa long olgeta. (Filipae 2⁠:3) Mo tu, oli folem Golden Rul, hemia se oli mekem long narafala olsem we oli wantem se narafala i mekem long olgeta. (Matiu 7⁠:12) ?Olsem wanem? ?Yu yu kam kros taem yu mas wet long narafala? Ale, yu no mas mekem narafala i wet long yu.

● LANEM BLONG MAKEMAOT TAEM. ?Yu yu gat fasin blong livim evri samting i stap gogo, long las menet nomo yu hareap blong mekem ol samting ya? ?Yu yu traem blong mekem plante tumas samting long wan smol taem nomo? Tingting we i stap long Prija 3⁠:1 (NW ) i save givhan long yu: “Evri samting i gat wan taem we i stret long hem.” Sipos yu makemaot ‘wan stret taem’ blong mekem evri samting, yu save wok long fasin we i gat oda, i no olbaot.

Fastaem, raetem wan lis blong olgeta samting we yu mas mekem. Nao yu save folem advaes we i stap long Filipae 1⁠:10 (NW ): “Jusumaot ol samting we oli impoten moa.” !Yes, mekem ol impoten samting fastaem! ?Wanem samting we yu no save livim i stap? ?Wanem samting we yu save livim i stap blong mekem long wan narafala taem? Laswan samting se, yu mas wokemaot hamas taem yu nidim blong mekem ol wanwan samting, mo wetaem stret yu save mekem olgeta. Yu no mas bitim mak mo traem mekem plante tumas samting long wan smol taem nomo.

Woman ya Dorothy i talem tangkiu long papa mama blong hem from we tufala i tijim hem blong no kam let. Woman ya i talem se: “Sipos mifala i mas stap long wan Kristin miting long haf pas seven long naet, mama blong mi i stat blong rerem mifala wan aoa 45 menet bifo long taem ya. Mifala i gat taem blong kakae, wasem plet, swim, mo ron long trak go kasem ples blong miting. Ale fasin ya blong no kam let, i stap olsem wan haf blong laef blong mifala.” I gud tu blong makemaot smol taem moa antap long taem we yu nidim blong mekem wan wok, from sam trabol we maet oli save blokem yu smol. Dorothy i talem se: “I no longtaem i pas, mi mi stap go blong karem samfala oli go long wan miting. Ale, wil blong trak i flat. Be mi gat taem blong singaot wan man i kam fiksimap wil ya, mo mifala i kasem ples blong miting bifo we miting i stat. Oltaem mi stap makemaot smoltaem antap long taem we mi nidim, from we maet i gat wan trabol long trak no maet ol trak oli fasfas long rod.”

● ASKEM ADVAES BLONG OL NARAFALA. Long Ol Proveb 27⁠:​17, Baebol i talem se: “Oltaem, ol man oli stap lanlan long olgeta bakegen, olsem we naef i save sapenem naef.” Blong folem rul ya, i gud blong toktok wetem ol narafala we laef blong olgeta i klosap sem mak long laef blong yu, mo we oli no stap kam let. Ating oli save givim plante gudfala advaes long yu.

Renee we yumi ridim tok blong hem antap, i gat strong tingting blong no moa kam let. Hem i se: “Mi mekem promes se bambae mi traehad moa. Samting ya i no isi, be mi stap kamgud sloslo.” Yu tu yu save mekem olsem hem. !Sipos yu yu gat stret tingting mo yu stap traehad, yu tu yu save lanem blong no kam let!

[Futnot]

[Tok blong pija long pej 26]

Bos i no glad long man we i stap kam let long wok, mo tu, man olsem i no stap tingbaot narafala

[Tok blong pija long pej 27]

Gudfala plan i save givhan long yu blong no westem taem