Yumi Laekem Haos Blong God
1 Long taem bifo, Jeova i givim oda long ol man blong hem, blong joen tugeta evri taem long haos blong hem. (Lev. 23:2) Ol miting ya oli givhan long olgeta blong oli tingbaot Tok blong God. Oli gat taem blong tingtingdip, blong joen wetem ol fren, mo blong tokbaot ol loa blong God. Tingting blong olgeta i fulap long ol tok blong God, taswe oli kasem ol rij blesing long saed blong speret. Hemia nao sam jans blong oli rili hapi. Plan ya i stanemap fasin joengud mo wosip we i klin. Tede i no defren, ol miting long haos blong God oli impoten tu.
2 ?Olsem Wanem Blong Soem Se Yumi Laekem Ol Miting? Ripot blong sam kongregesen i soem se smol man nomo oli kam long ol miting. Ol wanwan trabol we i kamaot long laef i save blokem wan man blong i no kam long miting. Be, ?olsem wanem long yu? ?Yu letem ol smol trabol oli blokem yu, blong yu no kam oltaem long miting? Ating sam oli mekem disisen blong stap long haos from hed i soa smol no oli harem se oli taed afta wan bisi dei. Sam narafala oli ting se oli mas lukaot long sam famle we oli no kristin mo oli kam visitim olgeta. Sam oli mestem miting tu, jes blong luk wan program long televisin no from spot. Sipos i olsem fasin blong laekem ol miting i no kasem ol mak ya we ol pikinini blong Kora oli gat long fulhat blong olgeta, “!Mi mi wantem tumas blong stap long hem! Hae God, mi wantem tumas blong stap ol taem long haos blong yu.”—Sam 84:2.
3 Nating se ol miting oli fulap long ol kakae blong speret, sam oli hadwok blong lesingud. Maet oli stap drim nating se oli wekap, oli stap tingbaot ol wari blong dei, no oli stap slip smol tu. Plante oli luk se taem oli tekem not, samting ya i givhan long olgeta blong stap wekap mo blong tingbaot ol tok we oli harem. Fasin ya blong raetemdaon ol samting i putum olgeta long tingting blong yumi. Antap long samting ya fasin blong mekem rere ol miting i save givhan bigwan long yumi blong kasem plante samting from. Sipos yumi reregud bambae yumi save “strong moa blong holem ol trutok ya we yumi harem finis.”—Hib. 2:1.
4 Ol pikinini mo ol bigman tu oli nidim blong kasem ol tijing we oli kamaot long ol miting. Bambae ol pikinini oli lanem smol samting nomo sipos papa-mama, oli givim ol pleplei no ol buk blong oli putum kala long olgeta, blong mekem se oli stap kwaet. Taem oli letem ol pikinini oli pleplei, oli toktok, oli krae no oli mekem ol narafala samting we i spolem ol man we oli sidaon kolosap, samting ya i soem se oli no gat gudfala fasin. Fasin ya blong go oltaem mo blong nating long toelet, blong go dring wora taem miting i ron i save kam smol nomo, taem ol pikinini oli save se evri taem papa-mama i go wetem olgeta.
5 Kam Long stret Taem Hem i Impoten: Wanwan taem, ol samting we yumi no save blokem, oli save mekem se yumi kam let long miting. Be sipos oltaem yumi kam let afta singsing mo prea, samting ya i soem se yumi no gat respek long tabu fasin blong ol miting. Yumi no gat respek tu long fasin ya blong no spolem ol narawan. Tingbaot se taem yumi singsing mo prea wetem ol brata blong yumi long ol miting blong kongregesen, hem i wan haf blong wosip blong yumi. Fasin blong kam let oltaem i kamaot from we i no gat oda mo ol plan fastaem. Fasin ya blong kam long stret taem i soem se yumi gat respek long ol miting blong yumi mo yumi laekem olgeta tu.
6 Moa dei ya i stap kam kolosap, moa yumi nidim blong kam tugeta wan ples. (Hib. 10:24, 25) Yumi mas soem fasin blong laekem ol miting, blong stap reregud fastaem, blong kam long stret taem, blong lesingud, mo blong mekem wanem yumi lanem.