Mekem Fasin Blong Yu i Stretgud Long Mak Blong Gud Nyus
1 Yumi ol Wetnes blong Jeova, yumi wantem givim ona long nem blong Jeova. Yumi save se ol fasin mo toktok, hea mo klos blong yumi, oli save jenisim tingting blong narafala long saed blong trufala wosip. Samting ya i tru moa taem yumi stap long ol miting. Yumi mas mekem sua se evri samting we yumi talem mo mekem long miting, oli stretgud long mak blong gud nyus, mo oli givim ona long Jeova.—Fil. 2:4.
2 Plante fasin blong wol ya long saed blong klos mo hea, oli no stret long ol Kristin. Hemia wan samting we ol minista blong gud nyus oli mas lukaotgud long hem. Wajtaoa blong Epril 1, 1990, long pej 22, i talem se: “Nating se klos blong yumi i no sas, be oli mas klin, stret, mo gud. . . . Sus blong yumi i no mas brokbrok, mo i no mas doti. Mo long evri miting, long Bukstadi tu, bodi blong yumi i mas klin, yumi mas flas gud mo werem sam klos we i stret.”
3 Taem yumi no kam let long miting, yumi soem se yumi rili tingbaot ol narafala mo yumi gat lav. Wanwan taem, ol samting we yumi no save blokem, oli mekem se yumi no save kam long stret taem long wan miting. Be sipos oltaem yumi let, maet samting ya i soem se yumi no gat respek long ol miting ya we oli tabu, mo yumi no luksave responsabiliti blong yumi blong mekem i gud long narafala. Olgeta we oli kam let long miting, oli pulum ae blong ol narafala, mo mekem se oli no moa lesingud. Taem yumi no let long miting, yumi soem respek long ol filing mo intres blong ol man we oli stap.
4 Lav long ol man we oli stap kolosap long yumi i mas pusum yumi blong no spolem ol narafala we oli stap lesingud long miting. Taem yumi toktok long smol voes long narafala, kakae jinggom, mekem noes wetem pepa, mo go long toelet oltaem, yumi save mekem se ol narafala oli no lesingud, mo yumi no soem respek long ples blong wosip blong Jeova. I no stret blong eni man i stap tokbaot wan bisnes long saed blong kongregesen no i storeyan wetem narafala, taem miting i stap gohed. Maet samting ya i hapen nomo sipos i gat wan problem i kamaot we i mekem se samfala oli mas aot long jea blong olgeta. Sipos no, evriwan i mas stap sidaon mo lesin long miting, nao olgeta mo ol famle blong olgeta tu oli save kasem blesing from. I stret blong mekem ol gudfala fasin nomo long Haos Kingdom, from we “man we i gat lav . . . hem i no save mekem ol fasin we oli no soem respek.”—1 Kor. 13:4, 5, NW; Gal. 6:10.
5 Mo tu, gudfala fasin blong ol pikinini blong yumi long ol miting i presem mo givim ona long nem blong Jeova. I impoten we ol papa mama oli lukaotgud long ol pikinini blong olgeta long miting. Oli mas leftemap tingting blong ol pikinini blong lesingud mo givim ansa. Plante papa mama we oli gat smol pikinini, oli laekem blong sidaon long wan ples we i isi blong kamaot long hem sipos oli mas tekem pikinini i go afsaed. Olsemia nao, oli no blokem tumas ol narafala we oli stap lesin long miting.
6 Pol i talem se: “Mekem fasin blong laef blong yufala evri dei i stretgud long mak blong gud nyus.” (Fil. 1:27) Taswe, taem yumi stap long miting, yumi mas traehad blong gat gudfala fasin mo blong tingbaot ol narafala. Sipos yumi evriwan i traehad long samting ya, bambae ‘bilif blong narafala i save givhan long yumi, olsem we bilif blong yumi tu i save givhan long narafala.’—Rom 1:12.