?Yu Save Givhan Long Wan Hasban No Waef We i No Bilif?
1 ?I gat sam brata mo sista long kongregesen blong yu we hasban no waef blong olgeta i no bilif long trutok? Sipos yes, yumi save se ol brata mo sista ya bambae oli harem gud sipos hasban no waef blong olgeta i joen long tru wosip. Be i no olgeta ya nomo we oli wantem olsem. Evriwan long kongregesen oli gat sem tingting olsem God, we i “wantem sevem olgeta man, mo i wantem we olgeta man bambae oli save trutok blong hem.” (1 Tim. 2:4) Long kongregesen blong yumi, maet i gat sam pablisa we hasban no waef blong olgeta i no bilif. ?Wanem samting we yumi save mekem, blong givhan long ol hasban no waef olsem?
2 Fastaem, i gud yumi traem kasem save tingting blong man ya we i no bilif. Plante hasban mo waef we oli no bilif, oli lavem famle blong olgeta, mo oli traem blong stap olsem ol gudfala hasban mo waef, mo ol gudfala papa mo mama. Ating oli bilif strong long wan skul we i defren long skul blong yumi. Maet oli gat smol save nomo long saed blong ol Witnes blong Jehova. Maet oli kasem ol save ya long ol fren we oli no gat stret save long saed blong yumi, no oli agensem yumi. Sam hasban no waef we oli no bilif, oli harem nogud from we Kristin waef no hasban blong olgeta i yusum taem we bifo i spenem wetem famle, blong go long ol miting. Fasin luksave bambae i givhan long yumi blong respektem mo soemaot kaen fasin long man ya we i no bilif. Mo taem yumi joen wetem hem, yumi no mekem olsem we yumi fraet long hem.—Prov. 16:20-23.
3 Yumi Traem Save Hem: Ol samting we yu mekem nao i nambawan rod blong pulum wan hasban no waef we i no bilif, i kam long trutok. Plante taem i no wan storian long saed blong Baebol we i pulum hem fastaem. (1 Pita 3:1, 2) Taswe yumi mas traehad blong save olgeta wanwan. Ol sista long kongregesen oli traehad blong save ol waef we oli no bilif, mo ol brata oli save mekem sem mak long ol man we oli no bilif. ?Yumi mekem samting ya olsem wanem?
4 Sipos yu no gat janis yet blong storian wetem wan hasban no waef we i no bilif, yu save go luk hem. Be maet i gud we yu tokbaot samting ya fastaem long Kristin hasban no waef blong hem. Maet yu luk se hemia we i no bilif i no glad tumas blong storian, be yu no mas harem nogud. Sipos yu toktok gud long hem mo yu soemaot kaen fasin, samting ya i save pulum hem blong i gat gudfala tingting long saed blong ol Witnes blong Jehova. (Rom 12:20) Maet sam Kristin we oli strong long trutok, oli singaot wan man we i no bilif wetem famle blong hem, blong oli kam kakae wetem olgeta. Oli mekem olsem blong save hem moa, mo blong daonem eni kaen nogud tingting we maet hem i gat long saed blong ol Witnes blong Jehova. Oli no storian long saed blong Baebol, be oli tokbaot ol samting ya nomo we hem i wantem tokbaot. Biaen, taem hem i no moa fraet blong storian, maet i stret nao blong storian long saed blong Baebol. Oli save singaot hem i kam long wan miting blong yumi, nao hem i save harem wanem samting we waef blong hem i stap lanem. Maet hem i glad blong kam, from we hem i save sam brata long kongregesen finis. Nating sipos hem i no rere yet blong stadi Baebol, be oli save talem gudfala toktok long hem from we hem i stap givhan gud long Kristin waef blong hem.
5 Ol elda nao oli mas traehad moa blong givhan long ol hasban mo waef we oli no bilif. Mo oli mas rere blong tekem janis oltaem blong talemaot trutok long olgeta. Maet wan hasban no waef we i no bilif i no wantem stadi Baebol. Be sipos hem i kasem sam bigfala problem long saed blong helt no i slip long hospital, ating bambae hem i lesin long sam tok blong Baebol blong leftemap tingting blong hem. Maet wan hasban no waef we i no bilif i kasem wan bigfala trabol, ating from we wan famle i ded. Ale, taem ol elda oli storian blong leftemap tingting blong olgeta evriwan long famle, oli save singaot hem tu blong i kam lesin.
6 !Yu traem tingbaot bigfala glad we wan Kristin long kongregesen blong yumi bambae i kasem, sipos hasban no waef blong hem i kam long trutok! Wan gudfala samting olsem, bambae i mekem Jehova tu i harem gud tumas, wetem ol enjel mo ol narafala man long kongregesen. (Luk 15:7, 10) Nating sipos fastaem hasban no waef ya i no wantem tokbaot trutok, be yumi save harem gud yet, from we Jehova i glad taem yumi traehad blong givhan long hem. Jehova i “no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.”—2 Pita 3:9.
[Kwestin]
1. ?Olgeta Kristin we hasban no waef blong olgeta i no bilif, olgeta ya nomo oli wantem we oli save trutok, no olsem wanem?
2. ?Fasin luksave i givhan long yumi olsem wanem, blong halpem wan hasban no waef we i no bilif?
3. ?Wanem rod we i nambawan blong pulum wan hasban no waef we i no bilif?
4. ?Maet yumi mekem wanem blong save wan man we i no bilif?
5. ?Ol elda oli save mekem wanem blong givhan long wan hasban no waef we i no bilif?
6. ?Wanem sam risen from wanem yumi mas givhan long ol hasban no waef we oli no bilif?
[Tok blong makem poen long pej 6]
Ol samting we yu mekem nao i nambawan rod blong pulum wan hasban no waef we i no bilif, i kam long trutok. Plante taem i no wan storian long saed blong Baebol we i pulum hem fastaem