“!Mi Wantem Divos!”
Wan haos i kam nogud, mo sam samting i soemaot se ol man blong haos ya oli no lukaot gud long hem. Long ol yia we oli pas, plante hariken oli kilim haos ya mo sam long olgeta oli brebrekem hem. Naoia, ol timba blong haos ya oli no moa strong, mo i klia se klosap nao bambae hem i foldaon.
MARED blong plante man tede i olsem haos ya. ?Yu yu harem olsem se mared blong yu tu i stap kam moa nogud? Sipos yes, yu mas save se long evri mared i gat problem. Yes, Baebol i soemaot klia se olgeta we oli mared bambae “oli gat trabol long laef blong olgeta.”—1 Korin 7:28.
Sam man blong stadi oli soemaot se ol tok ya oli tru. Ol man ya oli tokbaot se mared i olsem “wan bisnes we i isi nomo blong brokdaon. Be bighaf blong ol man long wol oli joen long bisnes ya.” Oli talem bakegen se: “Long stat, mared i karem bigfala glad long laef blong wan man mo i fulap long ol gudfala promes. Be biaen, ol samting oli save jenis nao man ya i hadwok tumas blong mekem mared blong hem i gohed gud. Ale hem i harem nogud long ful laef blong hem mo i safa.”
?Olsem wanem long mared blong yu? ?Long mared ya, i gat wan, no bitim wan, long ol fasin ya?
● Raorao oltaem
● Wan i sakem ol tok blong stikim narawan
● Wan i no stap tru long narawan
● Kros
?Yu yu mas mekem wanem sipos yu luk se mared blong yu i no moa strong, mo se klosap i brokdaon? ?Yu ting se divos i save stretem trabol ya?
[Bokis/Foto blong pija long pej 3]
‘FASTAEM SMOL MAN NOMO OLI MEKEM DIVOS, BE NAOIA BIGHAF I MEKEM’
Long sam ples, namba blong ol man we oli divos i go antap bitim mak. Tingbaot long Yunaeted Stet. Blong plante yia, ol mared man long kantri ya oli no stap divos. Wan woman we nem blong hem Barbara Dafoe, i raetem long buk blong hem (The Divorce Culture) se afta long yia 1960, “namba blong ol man we oli divos i go antap bitim mak.” Woman ya i talem se: “Long ten yia nomo, namba ya i dabol mo i gohed blong go antap, kasem long stat blong ol yia 1980, ale i no moa jenis. Be namba ya i hae moa long Yunaeted Stet i bitim olgeta kantri blong Yurop mo ol narafala ples long Not Amerika. Samting ya i mekem se long toti yia nomo, divos we fastaem smol man nomo oli mekem, be naoia i kam samting we bighaf blong ol man long Amerika oli mekem.”