Baebol i Talem Wanem
?Wetaem i Stret Blong Faet Blong Protektem Yu Wan?
TINGBAOT sipos yu stap slip, nao wantaem nomo long medel naet wan noes i mekem yu yu wekap. Yu harem wan man i stap wokbaot. Man ya i stap insaed long haos blong yu. Yu harem se hat blong yu i pam, yu fraet tumas mo yu stap tingbaot se bambae yu mekem wanem.
Hemia wan trabol we eni man i save fesem tede. Fasin blong brekem loa, olsem fasin ya we man i mekem i nogud long narafala, rep, mo kilim man i ded, yumi bin luk we oli hapen long sam bigbigfala kantri nomo. Be naoia, fasin ya i hapen long evri ples. From we ol man oli fraet tumas long ol samting ya, plante oli yusum ol samting blong traem protektem olgeta wan. Sam man oli pem ol masket no ol naef mo samfala oli lanem sam fasin blong faet olsem karate. Sam gavman oli stanemap sam loa we i givim raet long ol man we oli sitisen blong kantri, blong yusum ol rod blong kilim man i ded blong protektem olgeta. ?Be Baebol i talem wanem? ?I stret we man i yusum ol rod olsem blong protektem hem mo famle blong hem?
God i No Laekem Nating Ol Faet
Baebol i agensem fasin blong faet mo olgeta we oli mekem fasin ya. Deved, man blong raetem Sam, i talem tingting blong Jeova God long saed blong fasin ya se: “Hem i no laekem nating olgeta we oli laekem tumas blong mekem faet.” (Ol Sam 11:5) Jeova i bin talemaot jajmen agensem sam nesen bifo, wetem ol man blong hem tu, from ol raf fasin blong olgeta mo from we oli kilim ol man i ded. (Joel 3:19; Maeka 6:12; Neham 3:1) Folem loa blong ol man Isrel bifo, sipos wan man i no lukaot gud long ol samting blong hem nao i kilim narafala man i ded, hemia i wan bigfala sin nating se man ya i no minim blong kilim wan man i ded.—Dutronome 22:8.
Baebol i pulum yumi blong yumi mas traehad blong gat pis wetem narafala evri dei. Samtaem ol strong toktok nomo i save mekem faet i kamaot. Baebol i talem se: “Sipos i no moa gat faeawud, bambae faea i ded, mo long sem fasin, sipos i no moa gat man i stap talem ol tok olbaot blong spolem narafala man, rao tu bambae i finis.” (Ol Proveb 26:20) Kwaet fasin blong man i save mekem kros i godaon mo i save stopem faet tu. Aposol Pol i raetem se: “Oltaem, long saed blong yufala, yufala i mas traehad blong faenem rod blong yufala i gat pis wetem olgeta man.”—Rom 12:18.
?Yu Mas Mekem Wanem Taem Wan Man i Wantem Mekem i Nogud Long Yu?
From we yumi man we yumi lukaot rod oltaem blong gat pis wetem narafala, hemia i no minim se bambae yumi neva gat trabol. Ol man we oli wosipim God longtaem bifo, oli bin kasem trabol from we ol man oli bin mekem i nogud long olgeta. (Jenesis 4:8; Job 1:14, 15, 17) Sipos wan stilman i poenem masket long wan man, ?narafala man ya i mas mekem wanem? Jisas i talem se: “Yu no givimbak long man we i mekem i nogud long yu.” (Matiu 5:39) Mo hem i talem tu se: “Sipos wan man i kam karemaot sot blong yu, yu mas letem hem i tekem singlet blong yu tu.” (Luk 6:29) Jisas i no agri we yumi yusum ol samting blong faet blong protektem yumi. Sipos stilman i poenem masket long wan man, man ya i waes sipos i no faet bak be hem i givim nomo samting we stil man ya i wantem. !Yes, laef i sas moa i bitim ol samting blong bodi!
?Be olsem wanem sipos i luk olsem se laef blong yu i stap long denja from narafala i wantem kilim yu yu ded? Wan loa we God i givim long ol man Isrel bifo i givhan long yumi long saed ya. Sipos oli kasem wan stilman long dei mo oli kilim hem i ded, man we i kilim stilman ya i ded, hem tu i mas ded. Risen blong samting ya, se Loa i no givim panis long stilman se hem i mas ded, mo tu from we oli holem stilman long dei i isi nomo blong luksave hem mo putum hem long kot. Be sipos wan stilman i kam long haos long naet nao man blong haos i kilim hem i ded, man blong haos ya bambae i no kasem panis from we samting ya i hapen long tudak mo man blong haos ya i no gat janis blong save se stilman ya i kam mekem wanem. Maet man blong haos ya i tingbaot famle blong hem se stilman ya bambae i spolem olgeta, ale hem i tekem aksen blong protektem famle blong hem.—Eksodas 22:2, 3.
Yes, Baebol i soemaot se wan man i gat raet blong protektem hem wan mo famle blong hem, sipos narafala man i wantem kilim olgeta. Man ya i save pusumaot mo givim kil we i naf blong stopem samting we man nogud ya i wantem mekem long hem. Yumi no mekem samting ya blong faet be yumi wantem stopem man ya blong i no spolem yumi. Sipos yumi faet bak blong pusumaot man nogud ya nao man ya i kasem wan aksiden no i ded, be ded blong hem i no fol blong yumi from yumi no minim blong kilim hem i ded.
Beswan Rod Blong Protektem Yumi Wan
I klia se long ol samting we i hapen olsemia i stret nomo blong yumi protektem yumi. Man i gat raet blong protektem hem wan mo ol fren mo famle blong hem taem narafala i mekem i nogud long olgeta no i mekem wan samting we i save kilim olgeta i ded. Taem man i wantem spolem yu mo yu no gat rod blong ronwe long hem, Baebol i no putum loa se i tabu blong protektem yu wan. Be i moa waes blong stap longwe long eni samting we i save pulum yumi blong faet, no blong givim kil long narafala.—Ol Proveb 16:32.
Baebol i pulum yumi blong “lukaot pis mo traehad blong kasem” long olgeta samting we yumi mekem long laef. (1 Pita 3:11, NW) Hemia beswan rod blong traem folem blong stap long pis oltaem.
?YU YU BIN TINGBAOT?
◼ ?From wanem yumi mas stap longwe long fasin blong faet?—Ol Sam 11:5.
◼ ?Wanem rod we i waes blong folem taem yumi wantem lukaotgud long olting blong yumi?—Ol Proveb 16:32; Luk 12:15.
◼ ?Wanem samting we yumi mas mekem blong blokem denja?—Rom 12:18.
[Tok blong makem poen long pej 11]
Baebol i soemaot se wan man i gat raet blong protektem hem wan mo famle blong hem, sipos narafala man i wantem kilim olgeta