?Laef Blong Man i Stat Wetaem Stret?

WAN yangfala woman we nem blong hem Gianna, i talem se: “Taem stret mama blong mi i gat 17 yia blong hem, hem i gat bel 7 manis haf, ale hem i mekem desisen blong kilim bebi ya long bel blong hem. Blong mekem olsem, ol dokta oli stikim hem wetem wan strong meresin.”a Gianna i talem bakegen se: “Mi nao mi bebi ya we hem i aotem long bel blong hem. Be mi mi no ded. Mi laef i stap.”

Gianna we i gat 19 yia blong hem, i talem toktok ya long yia 1996, long fored blong wan komiti blong gavman blong Yunaeted Stet, we i stap mekem wan miting long saed blong fasin ya blong kilim pikinini long bel. Taem Gianna i stap insaed long bel blong mama blong hem blong seven manis haf, ol defdefren haf blong bodi blong hem oli stap finis. Maet yu yu agri se hem i wan laef samting, from we hem i gohed blong laef olsem wan woman afta we hem i kamaot long bel blong mama blong hem.

Oraet, ?be olsem wanem long Gianna taem hem i stap faef wik nomo insaed long bel blong mama blong hem, we longfala blong hem i kasem wan sentimita nomo? I tru se long taem ya, evri haf blong bodi blong hem oli no stap yet, be bren blong hem mo stamba blong ol nev we bambae oli lidim mo bos long bodi blong hem, oli stap finis. Hat blong hem i pam finis, 80 taem long wan minit, blong fosem blad i go long ol smosmol string. Taswe, sipos Gianna i wan laef samting taem mama blong hem i gat bel long hem seven manis haf, ating i stret blong talem se taem mama blong hem i gat bel long hem faef wik nomo, long taem ya tu Gianna i wan laef samting, nating se ol haf blong bodi blong hem oli no gru fulwan yet.

Taem Bebi i Stat Blong Gru Long Bel Blong Mama, Hemia Wan Merikel

Taem sid blong man i joen wetem eg blong woman, olgeta haf blong bodi blong bebi oli stat blong gru long bel blong mama blong hem. Ol niufala save mo mesin blong ol saentis oli givhan long olgeta blong lukluk ol nambawan jenis we oli stap hapen insaed long faswan sel ya, hemia eg blong woman we sid blong man i joen wetem. Ol smosmol samting long DNA (deoxyribonucleic acid) blong papa mo mama, oli joen blong wokem wan bebi we i laef, mo we i neva bin stap bifo.

Faswan sel ya nomo, hem i stat blong bodi blong man, mo wok ya we i gohed blong bildim ol haf blong bodi i olsem wan merikel. Ol jinb blong yumi nao, we oli haf blong DNA, oli mekem se wok ya blong “bildim” olgeta haf blong wan bebi bambae i gohed olsem wanem. Ol jin ya oli kontrolem evri samting long saed blong bodi mo fasin blong yumi. Oli makemaot se bambae yumi longfala olsem wanem, fes blong yumi bambae i olsem wanem, wanem kala blong ae mo hea blong yumi, mo plante taosen smosmol samting bakegen long saed blong yumi.

Biaen, taem faswan sel ya i seraot mo i kam plante, insaed long evri niufala sel i gat plan i stap, se bambae bodi blong bebi ya i olsem wanem, mo ol sel ya oli save bildim bodi blong bebi folem plan ya. Yumi sapraes blong luk se olgeta sel ya wanwan oli naf blong kam enikaen sel we bodi blong bebi i nidim. Long ol sel ya, i gat ol sel blong hat, ol sel blong bren, blong bun, skin, mo ol sel blong ae we i mekem se yumi save luk tru long hem. Yumi kasem save nao from wanem ol man oli talem se plan ya we i stap long faswan sel, blong sel ya i kam plante gogo i wokem wan bebi we i laef, i “wan merikel.”

Wan bigfala dokta we i stadi long ol sel long bodi blong man, nem blong hem Dokta David Fu-Chi Mark, i talem se: “Plan ya se wan man bambae i gru olsem wanem mo se bodi blong hem bambae i olsem wanem long ful laef blong hem, i stat taem sid blong man i joen wetem eg blong woman, nao eg ya i kam faswan sel.” Dokta ya i talem bakegen se: “Naoia yumi suagud se olgeta man wanwan oli defdefren, i stat long taem ya we laef blong olgeta i stat, hemia taem sid blong papa blong hem i joen wetem eg blong mama blong hem.”

?Wan Bebi i Laef i Stap Long Bel Blong Mama?

Long taem ya we bebi i jes stat long bel blong mama, bebi ya i kam wan narafala man we i laef, i no wan smol pis nomo blong mama blong hem. Bodi blong mama i no luk bebi ya olsem se i haf blong bodi blong hem, be i wan narakaen samting we i stap long bodi blong hem. Sipos basket blong pikinini long bel blong mama i no protektem bebi ya, bambae bodi blong mama i sakemaot bebi ya kwiktaem nomo. Niufala laef ya, we spesel haos blong hem long basket blong pikinini i protektem hem mo i mekem se hem i seraot long mama, i wan man mo i gat wan DNA we i no sem mak long eni narafala man.

Samfala oli talem se bodi blong woman i stap aotem plante eg we sid blong man i joen wetem finis, from we i gat wan samting i rong long olgeta. ?Sipos i olsem, from wanem i no stret we dokta i aotem wan bebi long bel tu? Yumi save talem se, sipos laef i finis hem wan long bel blong mama, hemia i defren olgeta long fasin ya we mama i minim nomo blong kilim bebi i ded long bel blong hem. Long wan kantri blong Saot Amerika, long 1,000 pikinini i gat 71 we oli ded long faswan yia blong olgeta. ?Nao i stret blong talem se from we plante pikinini oli ded taem oli smol olsem, i oraet nomo blong wan man i kilim wan pikinini bifo we hem i gat wan yia blong hem? !Nogat!

Wan impoten samting se, Baebol i tokbaot pikinini we i stap long bel blong mama blong hem olsem we hem i wan laef man. Man blong raetem Ol Sam i talem long God se: “Longtaem bifo we mi mi bon, taem mi stap yet long bel blong mama blong mi, be ae blong yu i luk finis sid ya we mi mi kamaot long hem. Mo plan blong olgeta haf blong bodi blong mi, oli stap finis long buk blong yu.” (Ol Sam 139:16, NW) Deved i no jes talem “wan sid,” be i talem “sid ya we MI MI kamaot long hem,” hemia i soemaot stret se laef blong Deved i stat longtaem bifo we hem i bon, taem hem i stat blong gru long bel blong mama blong hem. God i putum long tingting blong Deved blong i talemaot tu, se taem hem i stat blong gru long bel blong mama blong hem, ol haf blong bodi blong hem oli gru folem wan plan, no folem sam save we i stap finis long wan “buk,” mo samting ya nao i mekem se Deved i gat ol defdefren fasin we hem i gat taem i kam bigman.

I gud blong makem se Baebol i no talem we wan woman i gat bel long wan grup blong sel nomo we oli joen. Nogat. Baebol i talem se: “!Wan bebi i stat gru long bel blong mama blong hem we bambae i kam wan strong man!” (Job 3:3, NW) Hemia i soemaot tu se, folem Baebol, wan pikinini i wan laef samting stat long taem ya we hem i jes stat blong gru long bel blong mama blong hem. Yes, hemia nao stret taem we laef blong man i stat.

[Ol futnot]

[Tok blong pija long pej 6, 7]

Wan bebi we i gat faef wik blong hem insaed long bel blong mama, i no jes wan grup blong sel nomo we oli joen. Insaed long faswan sel blong bebi ya, i gat ol stamba samting blong bildim olgeta haf blong bodi blong man

(stret saes)