Givhan Long Ol Pikinini We Oli Gat Problem Blong Lanem Samting

MAN BLONG WEKAP! LONG MEKSIKO I RAETEM STORI YA

Steven i faenem i had blong rid. Taem hem i save se tija bambae i askem long hem blong rid long klas, bel blong hem i soa.

Maria i faenem i had blong raet, nating se tija i traem blong givhan long hem. Hem i tekem plante aoa blong finisim homwok blong hem.

Noah i ridim bakegen mo bakegen pepa ya we ol homwok blong hem i stap long hem, be hem i fogetem yet ol samting we pepa ya i talem. Hem i faenem i had blong kasem ol gudfala mak long skul.

STEVEN, Maria mo Noah, trifala i gat problem blong lanem samting. Long olgeta problem we ol pikinini oli gat long saed ya, plante moa oli gat problem ya blong rid (Dyslexia). Taem pikinini i gat problem blong rid, plante taem hem i miksimap ol leta we oli klosap sem mak. Sam narafala problem blong lanem samting, hemia problem blong raet (Dysgraphia) mo problem blong ademap ol namba (Dyscalculia). Bighaf blong ol pikinini we oli gat ol problem ya oli gat hed olsem ol narafala pikinini, mo samfala oli gat hed moa bitim ol narafala.

Hemia sam saen we oli soem se pikinini i gat problem blong lanem samting: pikinini i slo blong lanem blong toktok, i faenem i had blong talem ol wod we saon blong olgeta i laenap gud, i mesmestem oltaem blong talemgud ol toktok, i gohed nomo blong toktok olsem bebi, i faenem i had blong lanem ol leta mo ol namba, hem i no save talem saon blong ol isi wod, i miksimap ol wod we saon blong olgeta i semsem mak, mo i faenem i had blong folem advaes blong olgeta we oli tijim hem.a

Givhan Long Pikinini Blong Yu Blong i Winim Problem Ya

?Wanem samting we yu yu save mekem sipos i luk olsem se pikinini blong yu i gat problem blong lanem samting? Fastaem, i gud yu tekem pikinini blong yu i go long dokta blong i jekem sipos problem ya i kamaot from we ae no sora blong hem i no wokgud.b Biaen, askem long dokta blong i jekem hem fulwan. Sipos pikinini blong yu i gat problem ya blong lanem samting, bambae hem i nidim blong yu yu givhan long hem mo blong yu mekem hem i haremgud taem tingting blong hem i foldaon. Tingbaot se, taem wan pikinini i gat problem blong lanem samting, hemia i no min se pikinini ya i no gat hed.

Yu mas yusumgud enikaen spesel program we skul blong pikinini blong yu i stanemap, olsem sam tija we oli givim praevet lesen long wanwan pikinini afta long ol aoa blong skul. Askem long tija blong klas blong hem blong i wok wetem yu blong givhan long pikinini. Maet hem i save letem pikinini blong yu i sidaon long fored blong klasrum, mo hem i save givim moa taem long pikinini blong i finisim ol wok we hem i mas mekem long klasrum. Tija i save talem ol toktok blong tijim hem, mo hem i save raetem ol toktok ya tu long pepa. Mo blong mekem eksam long pikinini ya, tija i save askem kwestin stret long hem. Plante taem, ol pikinini we oli gat problem olsem oli save fogetem samting, mo oli stap putum ol samting olbaot, oli no putum long stret ples blong olgeta. Taswe, tija i save givim sam moa buk blong pikinini ya i save yusum long haos. Maet tija i save letem wan kompiuta we insaed long hem i gat wan program blong jekem speling blong ol wod, blong pikinini i yusum long klasrum no blong mekem ol homwok blong hem.

I gud we evri dei yu rid smosmol wetem hem. I moagud sipos pikinini we i gat problem blong rid, i rid wetem strong voes, olsem nao yu we yu papa blong hem no mama blong hem, yu save givim advaes long hem mo stretem ol wod we hem i rong long olgeta. Yu nao yu mas rid faswan, mo askem pikinini blong i folem long buk blong hem. Biaen, yutufala tugeta i rid long semtaem wetem strong voes. Biaen bakegen, talem long pikinini blong hem wan i rid. Taem hem i stap rid, mekem hem i putum wan rula aninit long laen we hem i ridim, mo yusum wan pen we kala blong hem i strong blong makem ol wod we oli had. Smol wok ya i save tekem 15 minit nomo long wan dei.

Blong tijim pikinini blong i save ademap ol namba, yu save soem long hem olsem wanem blong skelem ol samting olsem eg, flaoa, mo suga, taem yu wantem kukum wan kek. Sipos yu wantem wokem wan jea no wan tebol, soem long hem olsem wanem blong yusum wan rula blong makem longfala blong ol timba. Mo tu, yu save tekem hem i go wetem yu blong pem ol samting long stoa, mo soem long hem olsem wanem blong kaontem mane. Yu save yusum ol pepa we i gat ol smosmol skwea long olgeta mo droem ol defdefren laen blong givhan long pikinini blong kasem save matematik. Sipos pikinini i faenem i had blong raet, traem blong yusum pepa we ol laen blong hem oli longlongwe long olgeta mo wan pensel we raeting blong hem i tik. Yu save givhan long pikinini blong i spelem ol wod sipos yu yusum ol alfabet leta we oli olsem magnet, blong oli save fas long wan aean we i flat.

I gat sam gudfala rod tu blong givhan long ol pikinini we oli gat problem ya blong mufmuv oltaem mo oli no save stap kwaet. Bifo we yu toktok long wan pikinini we i gat problem ya, yu mas mekem hem i lukluk stret long yu. Mekem hem i sidaon long wan ples we i kwaet blong mekem homwok blong hem, mo letem hem i spel wanwan taem gogo hem i finisim. From we hem i mufmuv oltaem mo i no save stap kwaet, givim ol smosmol wok we hem i save mufmuv olbaot blong mekem, olsem maet hem i save rekem ol lif.

Pikinini i Save Winim Problem Ya

Sipos pikinini blong yu i gud long wan samting no i gat gudhan blong mekem wan samting, leftemap tingting blong hem blong i gohed blong mekem samting ya. Talem gudfala toktok mo givim presen long hem taem hem i mekemgud wan wok, nating sipos wok ya i smol nomo. Sipos wan wok i bigwan lelebet, seraotem i go long ol smosmol wok, ale taem hem i finisim wan, hem i glad tumas se hem i winim nao bambae hem i rere blong gohed long nekiswan. Yusum ol pija no droem ol wanwan wok we hem i mas mekem, blong givhan long hem blong finisimgud wok ya.

I impoten we wan yangfala i naf blong rid, raet, mo ademap ol namba. Yu save sua se pikinini blong yu i save lanem ol samting ya, sipos yu givhan long hem blong wantem lanem, mo sipos hem i kasem help. Hemia nomo se, maet hem i lanem ol samting ya long fasin we i defren long ol narafala pikinini, mo maet hem i tekem longtaem moa blong lanem.

[Ol futnot]

[Bokis blong pija long pej 11]

PROBLEM BLONG LANEM SAMTING I GIVHAN LONG MI

“Taem mi lukluk ol wod long wan buk, oli luk olsem ol laen we oli olbaot nomo. Long lukluk blong mi, i olsem se ol wod ya oli stap long wan narafala lanwis. Oli no gat mining long tingting blong mi gogo kasem we wan narafala i ridim olgeta long bigfala voes. Ol tija blong mi oli bin ting se mi mi les nomo mo se mi no gat respek, oli ting se mi no stap traehad mo mi no stap lesin. Be ol samting ya oli no tru nating. Mi mi stap lesin gud mo mi rili traehad, be mi no naf blong kasem save olsem wanem blong rid mo raet. Ol narafala lesen olsem matematik, oli no had long mi. Taem mi mi smol, mi putum tingting blong mi long ol samting olsem spot, ol smosmol wok we mi gat gudhan blong mekem, ol naesfala pija we mi droem no katem, mo eni samting we mi save wokem wetem han blong mi, we mi no nidim blong rid mo raet.

“Sam yia biaen, mi jusum wan wok we mi save yusum ol han blong mi long hem, mo mi lanem blong gat gudhan long wok ya. Samting ya i givim janis long mi blong wok long faef bigfala haos wosip blong ol Witnes blong Jeova long ol narafala ples long wol. From we mi mas traehad bigwan blong mi save rid, samting ya i mekem se mi save rimemba plante samting we mi ridim. Hemia i givhan bigwan long mi taem mi stadi Baebol, antap moa, long wok blong prij. Taswe, mi no lukluk problem blong mi olsem wan samting we i blokem mi, be olsem wan samting we i givhan long mi.—Peter, wan Witnes blong Jeova we i wok olsem fultaem paenia, mo we i gat problem blong rid (Dyslexia).

[Tok blong pija long pej 10]

I no hadwok long ol pikinini blong droem ol pija blong wan stori we oli stap lesingud long hem