Stori Blong Sam Gudfala Famle​—Seken Haf

Olsem we yumi tokbaot finis long “Stori Blong Sam Gudfala Famle—Faswan Haf,” ol tok blong Baebol oli save halpem ol famle blong stanap strong taem oli kasem problem.a Jeova God i promes long olgeta we oli folem ol tok blong hem long laef blong olgeta se: “Mi bambae mi tijim yu long rod we i stret blong yu yu folem. Bambae mi stap givim gudfala tingting long yu, mo mi stap lukaot gud long yu.”—Ol Sam 32:8.

Taem famle i kasem hadtaem. Plante taem, samting we i stamba blong ol bigfala rao long mared, hemia ol problem long saed blong mane. Be ol advaes blong Baebol oli save halpem ol famle blong oli no tingting tumas long ol problem long saed blong mane. Jisas i talem se: “I nogud yufala i stap tingting tumas from laef blong yufala se, ‘?Bambae mifala i kakae wanem?’ no ‘?Bambae mifala i dring wanem?’ Mo i nogud yufala i stap tingting tumas from bodi blong yufala se, ‘?Bambae mifala i kasem klos blong mifala olsem wanem?’ . . . Papa blong yufala long heven, hem i save we yufala i mas gat olgeta samting ya.”—Matiu 6:25, 32.

Long pej 23, i gat ol toktok blong Issachar, we hem i stap long Yunaeted Stet. Hem i tokbaot wanem i givhan long hem mo famle blong hem afta we hariken Katrina i spolem haos blong olgeta nao oli kasem hadtaem long saed blong mane.

Taem wan long famle i sik. Olgeta man oli kasem sik. Plante taem man i sik blong smoltaem nomo mo hem i save kam gud bakegen kwiktaem. ?Be olsem wanem sipos wan memba blong famle i kasem wan sik we i stap longtaem? Baebol i talem se Jeova i save givhan long ol man we oli sik. (Ol Sam 41:1-3) ?Olsem wanem Jeova i save yusum famle blong sikman, blong givhan long sikman ya?

Long pej 24, i gat ol toktok blong wan man Japan, nem blong hem Hajime. Hem i tokbaot olsem wanem hem wetem tufala gel blong hem trifala i wokgud tugeta blong halpem waef blong hem, Noriko, taem Noriko i faenemaot se hem i gat wan nogud sik.

Taem wan pikinini i ded. Wan trabol we i bigwan bitim ol narafala trabol we oli save kasem wan famle, hemia taem wan pikinini i ded. Jeova i promes se bambae hem i ravemaot wota blong ae blong olgeta we oli krae from man we i ded. (Revelesen 21:1-4) Tede tu, hem i save givhan long olgeta we oli harem nogud from ded blong wan pikinini, blong oli harem gud bakegen.—Ol Sam 147:3.

Long pej 25, i gat ol toktok blong Fernando mo Dilma we tufala i stap long Yunaeted Stet. Tufala i tokbaot olsem wanem Baebol i givim paoa long tufala blong stanap strong, taem smol gel blong tufala, we i bebi nomo, hem i ded.

Ol stori we oli kam biaen, oli soemaot se ol famle oli save trastem Baebol blong lidim olgeta long stret rod taem oli kasem ol bigfala problem.

[Futnot]

[Bokis/Foto blong pija long pej 23]

Taem Famle i Kasem Hadtaem

Issachar Nichols blong Yunaeted Stet i talem stori ya

“Hariken Katrina i spolem haos blong mifala, fandesen nomo i stap. Wan manis haf afta long hariken ya, wota i fulap yet long skul we mi mi wok long hem.”

LONG hot taem blong yia 2005, mi wetem waef blong mi Michelle, mo gel blong mitufala Sydney, we hem i gat 2 yia blong hem, mitrifala i stap long Bay Saint Louis, Mississipi, Yunaeted Stet. Mifala i Witnes blong Jeova, taswe mi mo Michelle, mitufala i wantem tumas blong joen fulwan long wok blong prij we ol Kristin oli stap mekem. Mi mi tijim ol kos long saed blong wok we ol man mo woman oli save mekem, mo skul we mi wok long hem i stap long taon ya New Orleans, Louisiana, klosap nomo long ples blong mifala. Program blong mi se mi mi wok tri dei long wan wik, mo ol narafala dei mi save yusum blong tijim ol man long saed blong Baebol. Program ya i wokgud mo laef blong mifala i gud. Ale mifala i kasem nius se bambae hariken Katrina i kilim ples blong mifala. Kwiktaem nomo mifala i ronwe.

Taem hariken i pas finis, haos blong mifala long Bay Saint Louis i nogud olgeta, sem mak olsem skul we mi wok long hem. Kampani blong insurens mo gavman oli givim sam mane long mifala blong mifala i save rentem wan rum blong stap long hem. Be i hadwok long mi blong faenem wan gudfala wok bakegen. Mo tu, waef blong mi i kasem wan sik from wota we i no klin. Sik ya i mekem se bodi blong hem i no moa save faetem ol narafala sik, ale wan mostik i kakae hem mo hem i kasem sik ya West Nile virus. Long taem ya, praes blong insurens i go antap mo ol samting we man i nidim blong laef oli kam moa sas.

Ol jenis long laef blong mifala oli mekem se mifala i mas jenisim tingting blong mifala tu long sam samting. Mifala i no westem mane olbaot, mo taem mifala i pem ol samting we mifala i nidim, mifala i traem faenem ol samting we oli no sas tumas. Mo mi mi lanem blong glad long enikaen wok we mi save kasem.

I tru, mifala i harem nogud blong lusum olting blong mifala. Be mifala i glad se mifala i laef. Samting we i hapen long mifala i tijim mifala se olting oli no impoten tumas. Trabol ya i pulum mifala blong tingbaot tok we Jisas i talem, se: “Maet man i gat plante samting blong hem, be stamba blong prapa laef blong man i no stap long ol samting ya.”—Luk 12:15.

Narafala samting we mifala i kasem save long hem, se plante narafala oli lusum samting we i moa impoten i bitim samting we mifala i lusum. I tru, mifala i lusum evri samting blong mifala, be samfala oli lusum laef blong olgeta. From samting ya, afta we hariken i pas, mi kwik blong joen wetem olgeta we oli stap givhan long ol man we oli kasem bigfala trabol long hariken ya. Mi traem leftemap tingting blong olgeta we oli harem nogud tumas from wan famle blong olgeta we i ded no from ol samting we oli lusum.

Long hadtaem ya, ol tok we i stap long Ol Sam 102:17 (NW) i givhan bigwan long mifala, blong mifala i harem gud. Hem i talem se, Jeova God “bambae i harem prea blong ol man we oli lusum evri samting, bambae hem i no save ting nating long prea blong olgeta.” !Mifala i luksave se Jeova i halpem famle blong mifala bigwan!

[Bokis blong pija long pej 23]

Long yia 2005, afta we tufala hariken ya, Katrina mo Rita, tufala i kilim ol taon klosap long solwota long saot blong Yunaeted Stet, ol Witnes blong Jeova oli wok kwik blong makemaot 13 ples we ol man we oli nidim help oli save go long olgeta. Mo tu oli yusum 9 dok, we ol Witnes oli save kam long olgeta blong kasem samting we oli nidim, mo 4 stesen blong karem bensin. Klosap 17,000 Witnes blong Yunaeted Stet mo 13 narafala kantri oli kam blong wok olsem ol volontia, blong givhan long ol man we hariken i spolem olgeta. Oli fiksimap plante taosen haos we oli brobrok.

[Bokis/Foto blong pija long pej 24]

Taem Wan Long Famle i Sik

Hajime Ito blong Japan i talem stori ya

“Bifo we sik i kasem Noriko, mitufala i laekem tumas blong joen tugeta blong kuk. Be naoia, hem i no moa save yusum maot blong hem blong dring mo kakae, mo hem i no save toktok tu. Hem i stap nomo long wan wiljea mo hem i pulum win long wan masin.”

LONG manis Mei, 2006, waef blong mi, Noriko, i stat blong harem se i had long hem blong toktok. Long sem yia, long hot taem, hem i luk se i had long hem blong kakae mo dring. Ale long manis Septemba ol dokta oli faenem sik blong hem. Hem i gat sik ya, amyotrophic lateral sclerosis (ALS), we sloslo i spolem ol nev long bren mo long bigfala bun long baksaed. Long fo manis nomo, laef blong mifala i jenis bigwan. Be hemia i stat nomo blong ol problem blong Noriko.

Sloslo Noriko i no moa save muvum tang blong hem mo raethan blong hem tu. Ol dokta oli katem bel blong hem smol mo putum wan paep, blong hem i save kasem wan spesel wota we i olsem kakae blong hem. Mo tu oli katem wan smol hol long nek blong hem, blong hem i save pulum win long hem. Samting ya i mekem se hem i no moa save toktok. Mi save se ol samting ya oli mas mekem Noriko i harem nogud tumas, from we bifo hem i laekem blong wok strong. Mifala i Witnes blong Jeova, mo bifo Noriko mo tufala gel blong mitufala, trifala i wok fultaem long wok blong prij we ol Kristin oli mekem. Be naoia, Noriko i mas pulum win long wan masin, mo klosap oltaem hem i stap long bed nomo.

!Nating se i olsem, Noriko i gat strong tingting yet! Hem i go long ol Kristin miting long wan wiljea mo hem i karem masin blong pulum win long hem i go tu. Naoia sora blong hem i fas, taswe long taem blong miting, gel blong mitufala i raetemdaon ol poen long bigfala raeting. Olsem nao, Noriko i save harem gud long ol save we i kamaot long miting. Noriko i no moa save mekem wok blong prij fultaem, be hem i gohed yet blong raetem ol leta long ol man, blong tijim olgeta long saed blong promes we Baebol i mekem blong wan gudfala fiuja. Mifala i mekem sam jenis long kompiuta blong mifala blong Noriko i save raetem ol leta ya long hem.—2 Pita 3:13; Revelesen 21:1-4.

Mifala evriwan long famle i wok tugeta blong halpem Noriko. Tufala gel blong mitufala, tufala i jenisim wok blong tufala blong givhan moa long haos. Mitrifala i mekem ol wok long haos we bifo Noriko i stap mekem evri dei.

Long sam moning, i luk olsem se Noriko i taed. Mi wantem tumas blong talem long hem blong spel long dei ya. Be Noriko i no wantem spel. Hem i wantem serem tok blong Baebol wetem ol narafala. Taem mi stap rerem kompiuta, blong hem i save wok long hem, !mi luk bigfala glad long fes blong hem! Ale taem hem i raetem ol leta, hem i harem gud moa. Naoia, mi kasem save from wanem i impoten we ‘oltaem yumi mas wok strong long ol wok blong Masta.’—1 Korin 15:58.

Stori blong Jason Stuart we i gat sik ya ALS i stap long Wekap! blong Jenuware, 2006 (long Franis mo Inglis). Stori ya i givhan bigwan long Noriko, blong hem i no letem tingting blong hem i foldaon. Taem ol man we oli wok long hospital oli askem long Noriko from wanem hem i gat gudfala tingting olsem, hem i talem stori blong Jason long olgeta mo mifala i givim Wekap! ya long olgeta. Waef blong mi i laekem blong tijim ol narafala long saed blong bilif blong hem, mo samting ya i givhan bigwan long hem.

Mitufala i mared 30 yia finis, be long trifala yia we i jes pas, mi kasem save long sam samting long saed blong woman blong mi we mi no luksave bifo. !Mi mi glad tumas we mi maredem hem!

[Bokis/Foto blong pija long pej 25]

Taem Wan Pikinini i Ded

Fernando mo Dilma Freitas blong Yunaeted Stet tufala i talem stori ya

“Mi harem nogud bitim mak taem pikinini blong mi i ded, i no gat toktok blong eksplenem. I no gat wan narafala samting we i save mekem wan man no woman i harem nogud olsem.”

LONG Eprel 16, 2006, gel blong mitufala we nem blong hem Precious, hem i ded. Hem i laef ten dei nomo. Taem mama blong hem i gat bel tri manis, ol dokta oli faenemaot se bebi we i stap long bel blong hem i gat wan bigfala problem blong hat. Taem mama blong hem klosap i bonem hem, i klia se sipos bebi ya i no ded finis taem hem i bon be bambae hem i no save laef longtaem biaen. Mitufala i harem nogud tumas long nius ya. Mitufala i gat tri pikinini finis we bodi blong trifala i strong. Mitufala i no save bilivim se bebi blong mitufala bambae i ded.

Afta we Precious i bon, wan dokta we i save gud long saed blong ol problem blong ol geneb long bodi blong man, hem i talem se Precious i gat wan problem we i no kasem plante bebi, oli kolem sik ya se Trisomy 18. Long 5,000 bebi we oli bon, maet wan long olgeta nomo i gat sik ya. I klia se Precious bambae i no save laef longtaem. Mifala i harem nogud from we i no gat plante samting we mifala i save mekem blong givhan long hem. Wan samting we mifala i save mekem, hemia blong stap wetem hem long sot taem ya we bambae hem i laef, mo hemia nao samting we mifala i mekem.

Mifala i glad tumas long ten dei ya we mifala i spenem wetem Precious. Long taem ya, mitufala wetem trifala pikinini gel blong mitufala, mifala i harem se mifala i lavem hem tumas. Mifala i karem hem, toktok long hem, kisim hem, mo tekem fulap foto blong hem. Mo mifala i tokbaot tu se hem i tekem gud fes blong hu. Dokta ya we i faenemaot sik blong hem, i kam luk mifala evri dei long hospital. Hem i krae wetem mifala mo i talem sore blong hem. Mo taem hem i stap storian wetem mifala, hem i droem pija blong Precious, blong hem i save tingbaot fes blong Precious oltaem. Ale hem i givim wan kopi blong pija ya long mifala.

Mifala i Witnes blong Jeova, taswe mifala i bilif strong long samting we Baebol i tijim, se God bambae i mekem wol ya i kam paradaes bakegen. Mifala i bilif tu se hem i wantem tumas blong mekem olgeta we oli ded oli laef bakegen long wol. Promes ya i go tu long ol bebi olsem Precious. (Job 14:14, 15; Jon 5:28, 29) Mifala i stap wet long dei ya we bambae mifala i save karem hem mo kisim hem bakegen. !Evri taem mifala i harem tok ya “paradaes,” mifala i tingbaot promes ya we i mekem mifala i glad tumas! Go kasem taem we promes ya i kamtru, mifala i harem gud blong tingbaot se God i no fogetem Precious, mo tu, mifala i glad se Precious i no moa harem nogud long bodi blong hem.—Prija 9:5, 10.

[Futnot]