Wajtaoa LAEBRI LONG INTENET
Wajtaoa
LAEBRI LONG INTENET
Bislama
  • BAEBOL
  • OL BUK
  • OL MITING
  • g 7/06 pp. 14-19
  • Olgeta We Oli Lesin Long Woning Oli Stap Sef

I no gat video yet long haf ya.

Sori, i gat problem taem i stap lodem video ya.

  • Olgeta We Oli Lesin Long Woning Oli Stap Sef
  • Wekap!—2006
  • Ol Sabtaetol
  • Sem Samting
  • ‘!Nekis Taem Bambae Mi Mi Faswan Blong Ronwe!’
  • Woman We i No Lesin Long Woning, i Mas Holemtaet Wan Tri
  • Plan We Ol Witnes Oli Mekem Blong Stap Sef
  • Faenem Ol Witnes Long Astrodome
  • Samfala Oli Gobak Long Haos Blong Olgeta
  • Wok Blong Halpem Ol Man
  • Jekem Ol Haos Mo Fiksimap Olgeta We Oli Brobrok
  • Lesen We Yumi Lanem
  • !Lav We i Gat Moa Paoa i Bitim Wan Hariken!
    Wekap!—2008
  • Samting We Bigfala Ren i No Save Karemaot
    Wekap!—2004
  • Tu Haf Blong Wan Disasta
    Wekap!—1999
  • Ol Wok Blong Jeova Blong Sevem Man Naoia
    Wajtaoa—1993
Luk Moa Samting
Wekap!—2006
g 7/06 pp. 14-19

Olgeta We Oli Lesin Long Woning Oli Stap Sef

LONG Wenesde Ogis 24, 2005 long New Orleans, Louisiana, Yunaeted Stet, ples i hot mo i hevi. Alan wetem famle blong hem oli aot blong go spel smol long Beaumont, Teksas, we i stap 300 kilometa long wes blong New Orleans. Oli tekem naf klos blong faef dei. Alan i talem se: “Mifala i no save se hariken Katrina i stap long solwota long is blong Florida. Ale long Fraede naet, meteo i laetem trifala red laet evriwan, blong soemaot se hariken ya i strong tumas, mo i klia se bambae i kilim New Orleans.”

Long Sande, Ogis 28, evriwan oli luksave se hariken Katrina bambae i bigwan bitim mak. Ale, mea blong New Orleans i givim oda se evriwan oli mas aot long taon ya. From samting ya, plante taosen trak oli stap ron sloslo i go long not mo wes, nao ol rod oli fasfas gud. Plante taosen man we oli no gat trak oli go stap long ol strong haos, mo plante oli go long wan bigfala stadium, nem blong hem Superdome. Be samfala oli no wantem ronwe, oli stap nomo long haos blong olgeta.

‘!Nekis Taem Bambae Mi Mi Faswan Blong Ronwe!’

Joe we i wan Witnes blong Jeova, i no wantem ronwe. Hem i ting se hem i save stap sef long haos blong hem nomo. Hem i tingbaot we oli givim woning from sam hariken bifo finis, be ol hariken ya oli no bigwan tumas. Hem i se: “Mi ting se mi save stap sef. !Be kwiktaem nomo tingting blong mi i jenis! Win mo ren i kam strong bitim mak. Wantaem nomo, win i karemaot ruf blong haos blong mi. !Wota i ron i kam antap hareap nomo​—⁠tri meta long tri aoa! Wota i stap fulumap haos kwiktaem, ale mi klaem i go long rum antap. Mi fraet we mi fraet from we noes blong win i antap tumas, mo i luk olsem se ol wol blong haos oli rere blong bosta. Siling i stap foldaon raon long mi, mo mi stap tingbaot se bambae mi mekem wanem nao blong mi save stap sef.

“Mi ting se maet mi jam i go nomo long bigfala wota ya. Be wota ya i stap ron strong tumas, mo win i stap mekem we ol wef oli brok long ol rod raonabaot. Mi save se sipos mi jam, bambae mi ded.”

Afta we sam taem i pas, wan bot i kam blong sevem Joe, mo i karem hem i go long wan brij. Aninit long brij ya, ol dedbodi oli stap flot i go, mo i gat ol doti blong tolet i stap flot olbaot tu. Joe i slip wan naet long bak blong wan trak. Biaen, helikopta mo bas i karem hem i go long Taon Hol blong New Orleans. Hem i se: “Ol man long ples ya oli mekem i gud long mi. Mi tingbaot we mi stat lusum hed mo toktok krangke. Mi stap tingbaot nomo se: ‘?Weples bambae mi save faenem wota blong dring?’ ”

Naoia, Joe i luksave se sipos i bin lesin long woning, bambae hem i no kasem trabol olsem. Hem i se: “Mi lanem wan bigfala lesen. !Nekis taem oli talem se ‘Ronwe,’ bambae mi mi faswan blong aot!”

Woman We i No Lesin Long Woning, i Mas Holemtaet Wan Tri

Hariken i flatemgud tufala taon ya Biloxi mo Gulfport we tufala i stap long Misisipi klosap long solwota. Plante man oli ded. Vincent Creel, maneja blong ol samting we i afektem laef blong ol man long Biloxi, i raetem toktok long niuspepa (The New York Times) long Ogis 31, 2005, se: “Plante man oli no lesin long oda blong aot long taon, from we olgeta mo haos blong olgeta i bin stap oraet long hariken Camille [long 1969].” Oli talem se Katrina i no strong olsem Camille. Be Vincent Creel i talem se taem Katrina ‘i blu long solwota, hem i mekem se solwota i stanap olsem wan stonwol mo i kamso olsem wan taetel wef.’

Wan woman we nem blong hem Inell, i bin stap long Biloxi long bighaf blong laef blong hem. Hem i no lesin long woning blong hariken ya. Hem i talem se: “Long ol yia we i pas, i bin gat plante hariken mo mifala i bin stap sef tru long olgeta. Taswe mi no wari tumas long Katrina.” Inell i tekem mama blong man blong hem we i gat 88 yia, mo boe blong hem, wetem gel blong hem mo man blong gel blong hem, mo tufala dog wetem trifala puskat blong hem, oli kam long haos blong hem. Oli no ting se oli nidim blong aot, from we haos ya i strong gud. Be long Ogis 29, long 10 klok long moning, hariken i kasem Biloxi. Inell i tingtingbak, nao i talem se: “Mi luk we wota i stat lik i kam insaed long wan rum blong slip. Biaen wota i lik i kam insaed long evri rum. Mifala i klaem i go long wan rum antap. Be wota i kam antap gogo mifala i mas aot long rum ya, sipos no, bambae mifala i draon insaed. ?Be mifala i save go wea?

“Boe blong mi i terem wan hol long waea blong mostik, nao mifala i swim i go afsaed. Mifala i flot nomo mo holemtaet ruf blong haos. Tri long mifala i stap long raetsaed blong haos, mo gel blong mi i stap long lefsaed. Mi luk wan bigfala tri i stap klosap. Mi wetem mama blong man blong mi mo boe blong mi, mitrifala i swim i go long tri ya mo holemtaet. Nao mi harem gel blong mi i stap singaot bigwan se: “!Mama, Mama!” Man blong gel blong mi we i laswan blong kamaot long haos, i swim i go blong sevem gel ya. Tufala i naf blong swim i go long wan bot we i bin stap long yad blong mifala, nao tufala i klaem long bot ya mo flot nomo antap long wota. Tufala i singaot mi blong mi tu mi klaem long bot. Be mi fraet blong swim i go from we wota ya i stap ron strong tumas. Mi harem se mi stap sef long tri ya, mo mi no wantem muf.

“Mi stap lukluk wota ya we i ron olsem reva long ol rod raon long haos blong mifala. Mi tingting dip long samting we i hapen long mi, mo mi luksave se mi krangke nomo blong no obei long oda ya blong ronwe.

“!Sloslo, wota i godaon, nao mifala evriwan i klaem long bot ya! Wan trak blong kilim faea we i stap ronron olbaot blong sevem ol man i karem mifala i go long hospital. !Mifala i glad tumas blong stap laef!”

Plan We Ol Witnes Oli Mekem Blong Stap Sef

Katrina i kilim olgeta ples klosap long solwota long Galf blong Meksiko. Stat long Louisiana go kasem Alabama long is, plante taosen haos oli lus. Be longtaem finis i kam, ol hariken oli bin kilim ples ya. Taswe, plante yia finis, ol Witnes blong Jeova oli plan from samting we bambae oli mekem blong stap sef long ol hariken. Evri yia, long manis Jun, bifo we taem blong hariken i stat, 21 kongregesen blong ol Witnes blong Jeova long New Orleans oli toktok bakegen long saed blong plan we bambae oli folem sipos i gat strong hariken. Taswe, bighaf blong ol Witnes long ples ya oli save wanem we oli mas mekem. ?Plan ya i wok long taem blong hariken Katrina?

Taem ol bigman blong taon oli talem se ol man oli mas aot, ol elda long wanwan kongregesen oli toktok i go long evriwan long kongregesen blong pulum olgeta blong aot long taon ya. Plante Witnes oli mekem prapa rod blong olgeta blong aot wetem famle no sam fren blong olgeta. Ol elda oli givhan long ol olfala mo olgeta we oli sik, blong oli save aot. John we i stap long komiti blong ol Witnes we oli wok long taem blong disasta, i talem se: “Mi bilif strong se mifala i stap laef tede from we mifala i folem plan ya.” Taswe bighaf blong ol Witnes blong Jeova oli aot finis taem hariken i kilim taon ya. Hed ofis blong ol Witnes blong Jeova long Yunaeted Stet i putumap ol komiti we oli wok kwiktaem blong givhan long olgeta long ol ples we hariken i kilim.

Faenem Ol Witnes Long Astrodome

Samwe long 16,000 man we bighaf blong olgeta oli blong Louisiana, oli stap kasem kakae, wota, mo ples blong haed long Astrodome, long Houston, Teksas. Komiti blong ol Witnes long Houston we oli givhan long taem blong disasta oli kasem nius se sam Witnes tu oli stap long Astrodome. ?Be olsem wanem bambae oli faenem olgeta?

Long eli moning long Fraede, Septemba 2, sam elda blong ol Witnes oli kamtru long Astrodome blong traem faenem ol Kristin brata mo sista blong olgeta. Oli sapraes bigwan taem oli luk se i gat plante taosen man, woman, yangfala, pikinini, mo bebi, oli stap long stadium ya. Olbaot long futbol fil, i gat plante taosen bed blong bebi, mo ol man oli stap wet nomo blong harem wanem we oli save mekem blong winim trabol ya. Plante man oli stap laenap blong luk dokta, mo ol dokta mo nes oli stap resis olbaot blong putum ol sikman oli go long ol ambulans.

Wan elda we i stap traehad blong faenem ol Witnes long ples ya, nem blong hem Samuel, i talem se: “Mi harem olsem se mi stap long wan kamp blong ol refuji.” ?Olsem wanem oli save faenem wan smol grup blong ol Witnes long medel blong bigfala hip blong ol man ya? Fastaem ol elda oli holem ol bigfala saen we oli raetem mesej long olgeta blong askem ol Witnes blong kam luk olgeta, nao oli wokbaot i go i kam long medel blong ol man. Afta we oli mekem samting ya blong tri aoa, oli luksave se oli mas traem wan narafala rod. Ale oli askem long Red Kros blong talemaot long laodspika se: “Olgeta we oli baptaes finis olsem ol Witnes blong Jeova, plis kam long is saed blong stadium klosap long rod blong wokbaot i go antap long nekis level.”

Sloslo, ol Witnes oli kamtru long ples ya, mo oli stap smael bigwan. Samuel i talem se: “Wota i stap ron long ae blong olgeta from we oli glad tumas blong luk mifala. Oli putum han blong olgeta i goraon long mifala mo holemtaet mifala mo samfala oli holem han blong mifala. Oli no wantem lego mifala from we oli fraet se bambae oli lus bakegen long medel blong ol man ya.” Long Fraede mo Sarede, oli faenem 24 Witnes long ples ya, mo oli tekem olgeta oli go long ples we ol Witnes oli hivap long hem blong kasem help.

Bighaf blong ol Witnes ya oli no gat wan samting, klos nomo we oli stap werem mo we oli doti finis. Wan Witnes woman i karem wan smol bokis, olsem bokis we oli fulumap sus long hem. Insaed long bokis ya i gat ol impoten pepa blong hem​—⁠hemia nomo we sista ya i save sevem, taem hariken i kilim ples blong hem.

Long Astrodome, plante man oli luksave ol elda se oli Witnes blong Jeova, ale oli kam luk olgeta blong askem olgeta blong givim wan Baebol mo sam buk we oli tokbaot Baebol. Oli askem bitim 220 Baebol. Mo tu, ol Witnes oli givimaot Wekap! blong Julae 22, 2005 (Franis mo Inglis), we i tokbaot samting we ol man oli stap tingbaot long taem ya: “Natural Disasters​—⁠Are They Getting Worse?” (“Ol Disasta​—⁠?Oli Stap Kam Bigwan Moa?”)

Samfala Oli Gobak Long Haos Blong Olgeta

Wan man we i laef tru long hariken ya, hem i maneja blong wan televisin stesen long New Orleans, mo wok blong hem i blong faenem nius blong putum long televisin. From samting ya, hem i luk finis plante hariken we oli spolemgud ol ples. Hem i tokbaot we hem i gobak long haos blong hem long Jefferson Parish long Louisiana blong traem karemaot sam samting, i se: “Mi mi sek. Hariken ya i flatemgud haos mo i spolem evri samting insaed long haos. Long televisin, yumi luk se taem ol bag sanbij we ol man oli putum blong blokem wota oli brok, wota i ron olbaot olsem reva. Be bigfala win tu i spolem evri samting. Stori haos we rum blong mi i stap long hem, hem i flat evriwan. Nalumlum i stap kavremap evri samting, olting oli rotin mo ples i smel nogud. Yes ol samting i sting we i sting, i nogud we i nogud. Be samting we i gud se yumi stap laef.”

Alan, we yumi tokbaot fastaem finis, sloslo hem i folem rod blong gobak long haos blong hem long Metairie, long wes saed blong New Orleans. Long rod, hem i luk we hariken i bin brekemdaon evri samting. Hem i se: “Mi sek mo mi harem nogud tumas blong luk ol samting ya. I olsem se wan bom i bosta long medel blong taon. Taem yumi harem nius blong hariken ya mo yumi lukluk long televisin, i no gat bigfala paoa long yumi. Be taem yumi wokbaot no draevem trak tru long ol ples we hariken i kilim mo spolem, hemia i defren. Yumi luk se win ya i bigwan bitim mak mo ples we hem i kilim i bigwan we i bigwan, i winim tingting blong yumi.

“Wan samting, hemia nogud smel we i stap​—⁠i olsem ol dedbodi we oli sting finis. Plante stoa oli no moa stap, mo plante narafala stoa oli fulap long wota. I gat polis mo ol soldia oli stap stanap long evri kona. I luk olsem wan ples we bigfala faet i stap gohed long hem.”

Wok Blong Halpem Ol Man

Ol bigman blong taon, stet, mo kantri, oli putumap wan plan blong halpem olgeta we oli gat nid. Grup blong gavman we oli givhan bigwan hemia FEMA (Federal Emergency Management Agency). Sam narafala grup tu oli givhan long plante taosen man. Ol trak oli karem fulap kakae, klos, mo wota i kam long ol ples we hariken i spolem. FEMA i raetem sam jek blong givim mane long samfala blong oli save pem ol samting we oli nidim blong stap laef long ol faswan dei mo wik afta long hariken. ?Olsem wanem long ol Witnes blong Jeova?

Jekem Ol Haos Mo Fiksimap Olgeta We Oli Brobrok

Taem hariken i jes stat, ol Witnes oli makemaot ol tim we bambae oli go long ol ples we hariken i spolem, blong lukluk hamas haos blong ol Witnes mo hamas Haos Kingdom oli brobrok no oli lus olgeta. Hemia i wan bigfala wok. ?Bambae oli mekem olsem wanem? Hed Kampani blong ol Witnes blong Jeova, we i stap long Brooklyn, New York, i givim raet long Branj Komiti blong Yunaeted Stet blong putumap sam komiti blong givhan long olgeta we oli gat nid. Mo oli singaot ol Komiti blong Bildim Ol Haos Wosip long ol defren ples long Yunaeted Stet, blong oli joen long wok ya blong bildim bakegen ol haos.a ?Kam kasem naoia, ol wokman oli mekem wanem?

Long Februari 17, 2006, tim blong ol Witnes we oli wok long Long Beach, Misisipi, oli sanem ripot se oli fiksimap finis 531 long ol 632 haos blong ol Witnes we oli brobrok long eria ya, mo oli mas mekem wok yet long 101 haos. Ol Witnes oli bin givhan tu long ol man we oli stap raonabaot long olgeta, we oli no Witnes. I gat 17 Haos Kingdom we ruf blong olgeta i brok no i lus. Kam kasem medel blong manis Februari oli mekemgud bakegen 16 long olgeta. ?Olsem wanem long tim blong Baton Rouge, Louisiana?

Grup ya i wok long Louisiana, mo long ples ya paoa blong hariken Katrina i strong moa. I gat 2,700 haos blong ol Witnes we oli brobrok. Kam kasem medel blong manis Februari, oli fiksimap 1,119 long olgeta. Be i gat bigfala wok i stap yet. Bakegen oli halpem sam famle we oli no Witnes, we olgeta tu oli kasem trabol long taem blong hariken. I gat 50 Haos Kingdom we hariken i kilimgud olgeta. Kam kasem Februari, oli riperem 25 long olgeta. Long Teksas, tim blong Houston i stap fiksimap 871 haos we hariken Rita i bin spolem long Septemba. Kam kasem Februari namba 20, oli mekem 830 long olgeta.

Lesen We Yumi Lanem

Plante taosen man we oli laef tru long bigfala hariken ya Katrina oli lanem wan lesen, hemia se, i impoten blong obei long woning. Yes, plante long olgeta oli talem sem tok olsem Joe we yumi tokbaot antap, se: “!Nekis taem oli talem se ‘Ronwe,’ bambae mi mi faswan blong aot!”

Ol Witnes blong Jeova oli gohed yet blong givhan long olgeta long Galf blong Meksiko we oli trabol gud from hariken Katrina. (Galesia 6⁠:10) Be wok blong ol Witnes i no blong givhan long ol man long saed blong bodi nomo. Bigfala wok blong ol Witnes blong Jeova we i stap gohed long 235 kantri blong wol, hemia blong talemaot wan woning we i moa impoten i bitim woning blong wan bigfala hariken. Baebol i talem se i no longtaem bambae God i spolem ol rabis fasin blong wol ya. Bambae hem i mekem wol i klin, mo i kam olsem hem i wantem fastaem. Sipos yu wantem kasem save long samting we Baebol i tijim long saed blong jajmen ya, plis askem long wan Witnes blong Jeova long ples blong yu. Sipos yu no gat rod blong mekem olsem, yu save raet i kam long wan long ol adres we i stap long pej 5 blong buk ya.​—⁠Mak 13⁠:10; 2 Timoti 3⁠:​1-5; Revelesen 14⁠:​6, 7; 16⁠:​14-16.

[Futnot]

a Ol Komiti blong Bildim Ol Haos Wosip, hemia ol tim blong ol Witnes blong Jeova we oli wok olsem volontia blong bildim mo riperem ol Haos Kingdom. I gat samwe long 100 tim long Yunaeted Stet, mo plante moa grup long ol narafala kantri long wol.

[Tok blong pija long pej 14, 15]

Pija blong hariken Katrina we satelaet i tekem

[Credit Line]

NOAA

[Tok blong pija long pej 15]

Wota i ron bigwan long taon blong New Orleans

[Credit Line]

AP Photo/David J. Phillip

[Tok blong pija long pej 15]

Hariken Katrina i spolem fulap haos mo i tekemaot laef blong plante man

[Credit Line]

AP Photo/Ben Sklar

[Tok blong pija long pej 16]

Samwe long 16,000 man, woman, mo pikinini, oli haed long Astrodome long Houston, Teksas

[Tok blong pija long pej 17]

Ol Kristin elda oli traehad blong faenem ol Witnes long medel blong ol man long Astrodome

[Tok blong pija long pej 18]

Ol volontia oli stap riperem ruf blong wan haos we hariken i spolem

[Tok blong pija long pej 18]

Ol Witnes oli talem bigfala tangkiu long olgeta we oli fiksimap haos blong olgeta

[Tok blong pija long pej 18]

Ol volontia oli givimaot kakae

[Tok blong pija long pej 19]

Alan

    Ol buk long Bislama (1987-2026)
    Logaot
    Login
    • Bislama
    • Serem
    • Setemap Olsem Yu Wantem
    • Copyright © 2025 Watch Tower Bible and Tract Society of Pennsylvania
    • Ol Rul
    • Privacy Policy
    • Privacy Settings
    • JW.ORG
    • Login
    Serem