Tu Haf Blong Wan Disasta

Man blong Wekap! long Meksiko i raetem stori ya

TAEM Hariken Pauline i kilim taon blong Oksaka long Meksiko, Godofredo mo waef blong hem Gisela, we tufala i Witnes blong Jeova, tufala i stap long haos blong tufala wetem ol smol pikinini blong tufala. Haos blong tufala oli wokem wetem kolta mo kadbod nomo. Sloslou ol strongfala win oli pulumaot wanwan blong ol wol blong haos ya, gogo wan wol nomo i stanap i stap. Famle ya i no moa gat ples blong haed.

Gisela i holemtaet smol bebi blong hem we i gat eit manis nomo. Trifala narafala pikinini oli holemtaet hem mo Godofredo. Ale, oli faet agensem ol strongfala win ya blong bitim tu aoa. Sam samtaem, paoa blong hariken ya i mekem oli foldaon mo i rolem olgeta olbaot long graon. Be, olgeta evriwan oli laef gogo hariken ya i pas.

Long taon blong Akapulko, wan Witnes blong Jeova we nem blong hem Nelly i luk se wota i stap kam insaed long haos blong hem. Ale, hem i wekemap famle blong hem. Wota i kam antap kwiktaem, mo taed i kam strong tumas nao i pulum Nelly i go aninit long wota. Laki nomo, gel blong hem i pulumaot hem. Oli no save mekem wan samting, oli holemtaet boda blong windo nomo mo oli stap wajem wota ya i kam antap kasem nek blong olgeta. Nao oli harem voes blong wan man we i singaot i kam long olgeta. Hem i man we i laef klosap long haos blong olgeta. Man ya i halpem olgeta blong kamaot long ples ya mo oli go long haos blong hem. Taem oli stap long haos blong man ya, nao oli luk we wota i karem wan trak i kam smasemgud haos ya we oli stap long hem sam menet nomo bifo.

Long aftenun blong Wenesde, Oktoba 8, 1997, Hariken Pauline, we win blong hem i kasem 200 kilometa wan aoa, i kilimgud ol ples blong Oksaka. Biaen, long eli moning blong Tasde, Oktoba 9, hariken ya i kasem Guerero, we i spolemgud taon blong Akapulko moa i bitim ol narafala taon. Win blong hem i mekem ol wef blong solwota oli kam antap kasem 10 mita, mo oli karemaot plante haos, trak, anamol, mo man. Afta we hariken ya i pas, i gat ol bigbigfala hol we oli dip olsem 10 mita long ples we rod i stap long hem fastaem. Niuspepa ya The News, i ripotem se Red Kros blong Meksiko i kaontem klosap 400 man we oli ded mo 20,000 kasem 25,000 man we oli lusum haos blong olgeta long tufala ples ya. Be, wan samting we i tajem hat blong yumi, hemia se long taem blong disasta ya i gat sam man we oli soemaot trufala Kristin lav.

Ol Man Blong Jeova Oli Tekem Aksin

Taem nius long saed blong Hariken Pauline i kasem olgeta ples, ol Witnes we oli stap long ol narafala kantri raonabaot, oli stat telefon i go long branj ofis blong ol Witnes blong Jeova long Meksiko blong save sipos i gat sam samting we oli mas mekem blong halpem ol brata blong olgeta. Sam kantri long narafala ples blong wol tu, oli talem se oli rere blong givhan. Kwiktaem nomo Sosaeti i stanemap wan grup blong man we oli save go long Meksiko blong givhan. Grup ya i karem plante kakae, klos, mo narafala samting bakegen, blong givimaot long ol brata we oli trabol.

Mo tu, ol brata oli pem ol tul mo narafala samting blong wokem haos, nao kwiktaem oli stat wok blong bildim bakegen olgeta 360 haos mo samfala Haos Kingdom we oli bin lus no brok long taem blong hariken ya. Plante taosen Kristin brata mo sista oli bisi blong givim presen mane, putumgud ol samting long ol bokis, karem i go wetem ol trak, mo seremaot ol kakae mo klos no ol samting blong wokem haos.

Sam man we oli gat stoa, oli sapraes bigwan long wok blong ol Witnes, mekem se olgeta tu oli givim ol kakae, samting blong wokem haos, mo narafala samting bakegen, i fri nomo long ol brata. Sam narafala oli katem daon praes blong ol samting we oli salem long ol brata. Ol Witnes we hariken i kasem olgeta, oli harem gud tumas from lav we ol brata oli soemaot long olgeta, antap moa, taem oli ridim ol gudfala leta we samfala i bin raetem i go long olgeta blong leftemap tingting blong olgeta.

Yumi sore nomo se, José Faustino—wan yangfala Witnes we i gat 18-yia—mo tri narafala man we oli bin stap stadi Baebol wetem ol Witnes, oli ded long taem blong hariken ya. Ol famle blong fofala ya, antap moa papa mama blong José, oli tangkiu long ol brata we oli bin prea from olgeta, mo long kongregesena we i bin leftemap tingting blong olgeta.

Sam Gudfala Risal

Afta long Hariken Pauline plante man, we sam long olgeta oli ol famle blong sam Witnes, oli askem blong stadi Baebol wetem ol Witnes. Mo plante long ol man we oli laef klosap long ol Witnes, naoia oli rere moa blong lesin long mesej we ol Witnes oli serem blong givim hop long man. Long taem ya, ol Witnes oli joen wetem ol narafala man tu, blong seremaot kakae long olgeta we oli nidim. Wan long ol Witnes we i joen long wok ya, i aksem wan man from wanem hem i jusum ol Witnes blong Jeova blong givimaot ol kakae we kampani blong hem i bin presen, man ya i ansa se: “From we mi mi save se yufala i no wok olbaot mo se yufala i no stap stil mo giaman. Antap long samting ya, yufala nao i naf blong talem hu ol man long ples ya we oli rili nidim help, from we yufala i save gud ol man long eria blong yufala.”

Naoia we yumi kam klosap moa long taem blong en, bambae ol disasta oli save kam antap moa long olgeta ples long wol. Be, samting we i leftemap tingting blong yumi, hemia blong luk se i gat sam man we oli traehad blong folem ol rul blong Baebol, nating se narafala i agensem olgeta.

[Futnot]

[Tok blong pija long pej 30]

Ol yangfala oli givhan blong bildim bakegen ol haos

[Tok blong pija long pej 31]

Ol Witnes we oli stap bildim wan niufala Haos Kingdom long Oksaka afta long Hariken Pauline