Japta 27

No Giaman—?Hemia Beswan Rul Blong Folem?

?OLSEM wanem? ?I gat wan samting i bin kamaot long laef blong yu samtaem, we i pulum yu blong giaman? Donald i talem long mama blong hem se hem i klinim rum blong hem finis, be hem i giaman. Hem i sakem olting blong hem aninit long bed nomo. Richard tu i traem blong giaman long papa mama blong hem. Hem i talem long tufala se risen hem i no kasem gudfala mak long skul, hemia from we ‘tija i no laekem hem.’ Be, samting we i tru se, hem i no stadigud.

Klosap oltaem ol papa mama mo ol narafala oli luksave giaman fasin blong ol yangfala. Be samting ya i no blokem plante yangfala blong traem giaman, haedem trutok, mo mekem i no stret, sipos oli ting se samting ya bambae i givhan long olgeta. Wan samting we i save pulum yangfala blong giaman, hemia se papa mama blong hem tufala i save kros taem hem i mekem wan mastik. Sipos yu kambak long haos let, maet tu aoa afta long stret taem we papa mama blong yu i bin talem, ating yu sem blong talem trutok, se yu fogetem blong lukluk taem. Maet yu wantem talem long tufala se i bin gat wan bigfala aksiden long rod, ale samting ya i blokem ol trak.

Long skul tu, ating i hadwok blong no giaman. Sam yangfala oli ting se oli stap kasem tumas homwok. Plante long klas oli wantem nomo blong win. Long wan stadi we oli mekem long Amerika, oli faenemaot se bighaf blong ol yangfala we oli mekem tes long skul, oli lukluk long wok blong yangfala klosap long olgeta blong stilim ol ansa blong hem. Taswe, ating i gat sam samting we oli save pulum yu tu blong giaman, no maet i luk olsem se fasin ya i wan isi rod blong blokem trabol. ?Be yu ting se fasin ya i save givhan long yu?

?From Wanem Fasin Giaman i No Save Halpem Yu?

Maet long tingting blong yu, i luk olsem we i moagud blong giaman, i bitim we yu kasem panis. Be Baebol i givim woning se: “Man we i giaman olsem bambae i no save ronwe long panis blong hem.” (Ol Proveb 19:5) Ating giaman tok blong yu bambae i kam long klia ples, mo bambae oli panisim yu yet. !Ating bambae papa mama blong yu i kros moa, from we fastaem yu mekem wan nogud samting, be antap long hemia, yu giaman!

?Olsem wanem long fasin blong plante yangfala long skul, blong stilim ol ansa blong narafala no long wan buk we oli haedem? Wan tija we i wok olsem man blong stretem ol yangfala long skul, i talem se: “Sipos wan yangfala i stilim ol ansa long buk we hem i haedem no long narafala we i sidaon klosap long hem, hem bambae i kasem bigfala trabol biaen. Bambae i hadwok long hem blong pasem ol eksam mo kasem gudfala edukesen, mo bambae i had blong hem i kasem wan gudfala wok.”

Ating i luk olsem se samfala oli win long rod ya. Maet oli pas from we oli stilim ol ansa blong narafala. ?Be, wanem samting bambae i kamaot biaen? !Sipos yu stap lanem blong swim, bambae i krangke nomo blong giaman se yu save swim! !Biaen, taem ol narafala oli stap haremgud blong swim mo pleplei long solwota, bambae yu yu mas stap long so! !Mo, sipos narafala i pusum yu yu foldaon long wan wota we i dip, maet bambae yu draon olgeta, from we yu bin giaman se yu save swim!

?Be olsem wanem sipos yu stilim ol ansa long klas blong matematik, no riding nomo? Maet fastaem yu no save kasem bigfala trabol from. !Be, sipos yu no lanem gud ol stamba samting ya we yu nidim long laef, ating biaen, taem yu traem blong faenem wan wok, bambae yu harem se yu trabol bigwan! Mo sipos yu bin giaman blong kasem wan stefeket, samting ya bambae i no givhan long yu nating. Baebol i talem se: “Ol samting we yu winim long giaman toktok oli save mekem yu yu rijman, be blong smoltaem nomo.” (Ol Proveb 21:6) Eni samting we yu winim long giaman fasin, hem i blong smoltaem nomo, bambae i lus olsem smok blong faea. !I moa gud we yu traehad mo stadi, i bitim we yu giaman mo lukluk wok blong narafala long skul! Ol Proveb 21:5 i talem se: “Man we i mekem gudfala plan mo i stap wok strong long hem, hem i save kasem plante samting.”

Fasin Blong Giaman Mo Tingting Blong Yu

Wan gel we nem blong hem Michelle, i giaman se brata blong hem i brekem wan samting we papa mama blong hem i laekem tumas. Be, biaen, tingting blong hem i stikim hem, nao hem i talemaot long tufala se hem i bin giaman. Hem i tokbaot samting ya, i se: “Mi mi harem nogud tumas. Papa mama blong mi tufala i trastem mi, be mi mi giaman long tufala.” Samting ya i soemaot se God i wokem tingting blong yumi we i naf blong jajem yumi. (Rom 2:14, 15) Tingting blong Michelle i stikim hem, nao hem i haremsave se hem i mekem i no stret.

I tru, samfala oli no wantem lesin long tingting ya we i jajem olgeta. Be sipos oli gohed nomo blong giaman, sloslou, bambae oli no moa haremsave se oli mekem rong. Ol man olsem, “Setan i bonem mak blong hem finis long tingting blong olgeta, nao oli no moa save haremsave trutok.” (1 Timoti 4:2) ?Yu yu wantem wan tingting we i no moa haremsave samting we i stret mo i no stret?

Tingting Blong God

“Fasin blong giaman,” i wan fasin we ‘Hae God i no laekem nating.’ (Ol Proveb 6:16, 17) Setan nao, hem i “stamba blong ol giaman toktok.” (Jon 8:44) Mo Baebol i no talem se ol smosmol giaman oli oraet be ol bigfala giaman oli nogud. Nogat. Hem i talem nomo se: “Giaman tok i no save kamaot long hem [trutok] samtaem.”—1 Jon 2:21.

Taswe, olgeta we oli wantem kam fren blong God oli mas tok tru oltaem. Ol Sam 15 i askem ol kwestin ya se: “Hae God. ?Hu man we i stret blong go long Haos Tapolen blong yu? ?Hu man we i stret blong go mekem wosip long yu long Saeon, tabu hil ya blong yu?” (Vas 1) I gud yumi lukluk ansa we i stap long ol fo vas biaen:

“Man we i stret blong mekem olsem, hemia man we i stap obei long yu long evri samting, mo oltaem i stap mekem ol samting we i stret. Ol tok [“long hat,” NW] blong hem i tru mo i stret.” (Vas 2) ?Olsem wanem? ?Vas ya i stret long wan man we i stil long stoa no wan yangfala we i lukluk ol ansa long wok blong narafala long skul? ?Hem i stret long wan yangfala we i stap giaman long papa mama blong hem mo i gat tu fes? !No gat! Taswe, sipos yu wantem kam wan fren blong God, yu no mas giaman, hemia long ol fasin blong yu mo long hat blong yu tu.

“Hem i no save giaman long ol narafala man. Hem i no save mekem ol samting nogud long ol fren blong hem, mo i no save tok nogud blong spolem nem blong ol man raonabaot long hem.” (Vas 3) ?Olsem wanem? ?Samtaem yu bin joen long wan grup blong ol yangfala we oli tokbaot narafala long fasin we i no kaen, mo oli spolem hem? !Yu mas wokem strong tingting blong no moa joen long ol toktok olsem!

“Hem i no save laekem ol man we yu yu tanem baksaed long olgeta, be i stap ona long ol man we oli stap obei long yu. Oltaem hem i stap mekem ol samting we hem i promes blong mekem, nating we i had tumas long hem.” (Vas 4) Sakemaot ol fren blong yu we oli stap giaman, mo we oli stap stilim ol ansa blong ol tes long skul, mo we oli stap tokflas se oli slip olbaot. Bambae oli wantem se yu tu yu mekem ol fasin ya. Wan yangfala, nem blong hem Bobby, i talem se: “Wan fren we i pulum yu blong giaman olsem hem, bambae i lidim yu blong kasem trabol nomo. Hemia i no wan fren we yu save trastem.” Faenem ol fren we oli folem ol rul blong stret fasin.—Skelem wetem Ol Sam 26:4.

?Yu yu makem tok blong vas ya, se Jeova i laekem, no i “ona long” olgeta we oli holem promes blong olgeta? Ating yu yu promes blong klinim yad long Sarede ya, be afta we yu mekem promes ya, wan fren i singaot yu blong go plei futbol. ?Olsem wanem nao? ?Bambae yu ting nating long promes blong yu? ?Bambae yu go wetem fren blong yu, mo livim papa mama blong yu blong mekem ol wok? ?No bambae yu holem promes blong yu?

“Hem i stap givimaot lonmane, we i no save mekem man i pem intres long hem. Mo hem i no save tekem mane long man we i wantem pem hem blong i girap insaed long kot, i tok agens long man we i mekem i stret nomo. Man we oltaem i stap mekem olgeta samting ya, hem bambae i no save foldaon samtaem.” (Vas 5) I tru se fasin blong wantem plante tumas samting, i stap pusum fulap man blong mekem i no stret mo blong giaman. Yangfala we i stap stilim ol ansa long wok blong narafala long skul, hem tu i gat fasin ya blong wantem plante tumas samting, from we hem i wantem kasem ol gudfala mak, be hem i no wantem stadi from. Mo ol man we oli glad blong tekem dotimane, oli tinghae moa long mane i bitim stret fasin.

Samfala oli talem se i oraet blong giaman from we ol bisnesman mo ol man blong politik oli stap giaman blong winim samting we oli wantem. ?Be, yu ting se ol man olsem oli save win blong longtaem? Ol Sam 37:2 i ansa se: “Olgeta ya bambae oli lus olsem gras we i drae long draetaem.” Maet narafala i faenemaot olgeta mo bambae oli mas sem from. Sipos no, long fiuja, bambae oli mas fesem jajmen blong Jeova. Be, ol fren blong God, oli “no save foldaon samtaem.” Bambae oli kasem laef we i no save finis.

Wokem ‘Tingting We i Klingud’

Yes, i impoten tumas blong blokem enikaen fasin blong giaman. Aposol Pol i tokbaot hem mo ol fren blong hem se: “Mifala i harem se i no gat wan samting nating we i mekem mifala i harem nogud, tingting blong mifala i klin gud nomo.” (Hibrus 13:18) ?Olsem wanem? ?Tingting blong yu i stap stikim yu taem yu wantem giaman? Sipos no, yu mas trenem tingting blong yu. Blong mekem olsem, stadi Baebol mo ol buk we oli tokbaot Baebol, olsem Wajtaoa mo Wekap!

Yangfala Bobby i mekem samting ya, mo hem i kasem gudfala frut from. Hem i lanem se i nogud blong giaman blong haedem trabol. Tingting blong hem i pusum hem blong go luk papa mama blong hem mo tok tru long saed blong ol trabol we hem i kasem. Sam samtaem, tufala i mas stretem hem. Nating se i olsem, hem i talem se hem i ‘haremgud long tingting blong hem’ from we hem i no giaman.

I no isi blong tok tru oltaem. !Be man we i mekemap tingting blong hem blong tok tru, hem bambae i holem wan tingting we i klingud long fored blong God! Bambae hem i joengud wetem ol trufala fren blong hem. Mo samting we i moa gud, se bambae hem i kasem blesing blong stap olsem wan ‘man we i stret blong go long haos tapolen’ blong God. Yes, fasin blong no giaman i beswan rul blong folem, be antap long hemia, hem i stret rul we olgeta Kristin oli mas folem.

Ol Kwestin Blong Tokbaot

◻ ?Wetaem i isi blong giaman?

◻ ?From wanem fasin blong giaman mo stilim ol ansa blong narafala long ol tes long skul, i no save givhan? ?Yu yu save storian long wan samting olsem, we yu bin luk no we i bin hapen long yu samtaem?

◻ ?Olsem wanem wan man blong giaman i save kam olsem we i no moa haremsave samting we i rong?

◻ Ridim Ol Sam 15. ?Olsem wanem ol vas ya oli joen wetem bisnes ya blong no giaman?

◻ ?Olsem wanem wan yangfala i save wokem wan tingting we i klin gud long fes blong God?

[Tok blong pija long pej 212]

‘Sipos wan yangfala i stilim ol ansa long buk we hem i haedem no long narafala we i sidaon klosap long hem, hem bambae i kasem bigfala trabol biaen’

[Tok blong pija long pej 214]

Klosap oltaem ol papa mama oli luksave giaman fasin blong yangfala, taem hem i mekem eskius blong no obei

[Tok blong pija long pej 216]

Baebol i no talem se ol smosmol giaman oli oraet be ol bigfala giaman oli nogud