Baebol i Talem Wanem
?Man We i Kaen Hem i Wan Slak Man?
“Man blong wok blong Masta blong yumi, hem i no mas man blong faet, hem i mas mekem i gud long olgeta man.”—2 TIMOTI 2:24.
BIFO we yumi bon, yumi haremsave eni samting we i tajem skin blong yumi. Afta we yumi bon, yumi wantem tumas we mama blong yumi i holem yumi. Taem yumi smol, sipos papa mama blong yumi tufala i kisim mo holem yumi plante, bambae yumi smael moa, filing blong yumi bambae i no olbaot, mo bambae yumi wantem toktok wetem ol narafala.
Be Baebol i talem se long ol las dei, bambae ol man oli “no save ona long papa mo mama blong olgeta, oli no man blong talem tangkiu, mo oli no save tingbaot God. Bambae oli no man blong gat sore long man.” Bambae i no gat plante man we oli soem kaen fasin mo sore, from we ol man “oli save tingbaot olgeta nomo” mo oli ‘wael, we oli agens long ol fasin we i gud.’—2 Timoti 3:1-3.
Plante man tede oli ting se oli mas gat strong fasin mo oli no mas sore long narafala. Oli talem se man we i kaen, hem i wan slak man we i no gat paoa. ?Be tingting ya i stret?
Kaen Be Strong Tu
Jeova God, “hem i wan strong man blong faet.” (Eksodas 15:3) Hem i gat olgeta paoa. (Ol Sam 62:11; Rom 1:20) Nating se Jeova i strong olsem, be taem hem i blesem man ya blong bilif, Job, hem i “kaen tumas, mo hem i gat sore.” (Jemes 5:11) Blong soem fasin we Jeova i mekem long ol man Isrel, hem i tokbaot sore we mama i gat long ‘pikinini we hem nomo i bonem.’—Aesea 49:15.
Jisas i kaen, be hem i strong tu. Hem i tok strong agensem ol lida blong skul we oli gat tu fes. (Matiu 23:1-33) Mo hem i ronemaot ol griri man we oli stap mekem maket long haos blong God. (Matiu 21:12, 13) Tru ya, Jisas i no laekem nating kruked mo griri fasin. ?Hemia i min se Jisas i no gat sore long man? !Si, hem i gat sore! Ol man oli save Jisas olsem wan man we i kaen. Hem wan i bin talem se hem i olsem wan mama faol we i “pulum ol pikinini blong hem oli kam haed aninit long wing blong hem.”—Luk 13:34.
?Strong Afsaed No Strong Insaed?
Baebol i talem se ol trufala Kristin oli mas olsem Kraes, oli mas tekem ‘niufala laef we God i wokem blong olgeta, we i stret wetem laef blong hem.’ (Efesas 4:20-24, Nyutesteman wetem Ol Sam long Bislama) Taem wan krab i stap kam bigwan, hem i lego olfala sel blong hem. Long sem fasin, yumi mas ‘sakemaot olfala laef blong yumi, wetem ol fasin blong hem.’ (Kolosi 3:9) Be afta we krab i lego sel blong hem, bodi blong hem i kam strong bakegen. Yumi no mas kam olsem. Yumi mas putum niufala laef ya blong olwe, olsem we i prapa klos blong yumi, mo yumi mas ‘gat sore long ol man mo mekem i gud long olgeta . . . mo tingting blong yumi i mas longfala.’ (Kolosi 3:12) From samting ya, kaen fasin i mas wan bigfala fasin blong yumi.
Taem yumi putum kaen fasin olsem klos blong yumi, hemia i no min se yumi wan slak man. Defren olgeta, blong gat kaen fasin, yumi mas kasem ‘paoa [we Jeova i givim], blong mekem yumi stanap strong oltaem.’ (Efesas 3:16) Wan man we nem blong hem Lee, i tokbaot samting ya, i se: “Smoltaem i pas finis, mi mi wan raf man, mi rili wan rabis man. Lukluk blong mi nomo i save mekem man i fraet, from we mi bin stikim bodi blong mi olbaot blong hangem ol ring long hem. Mi mi gat strong tingting blong kam rijman, mo oltaem mi tok swea mo faet blong kasem samting we mi mi wantem. Mi no gat sore nating.” Nao wan man long wok i stat stadi Baebol wetem Lee, mo sloslo Lee i save Jeova God mo i lavem Hem. Lee i sakemaot olfala laef blong hem, mo i lanem blong bos long tingting blong hem. Naoia hem i yusum taem blong hem blong stadi Baebol wetem ol narafala man, mo long rod ya, hem i stap soemaot se hem i lavem olgeta.
Fastaem, aposol Pol tu i ‘stap tok nogud long ol man blong spolem olgeta.’ Hem i yusum ol raf fasin blong mekem samting we hem nomo i wantem mekem. (1 Timoti 1:13; Ol Wok 9:1, 2) Be taem Pol i lanem blong gat tangkiu long Jeova God mo Jisas Kraes from sore mo lav we tufala i soemaot, hem tu i traehad blong folem ol fasin blong tufala. (1 Korin 11:1) Nao Pol i stanap strong long ol Kristin rul, be hem i lanem tu blong soem kaen fasin oltaem long ol narafala. Tru ya, Pol i no haedem ol filing blong lav we hem i gat long ol Kristin brata blong hem.—Ol Wok 20:31, 36-38; Filimon 12.
Kasem Paoa Blong Kam Kaen
Laef blong Lee mo aposol Pol tugeta i soemaot se man we i lanem blong gat kaen fasin, hem i no wan slak man. Hem i wan strong man. Man i mas rili strong blong jenisim ol tingting mo fasin blong hem, mo blong sakemaot tingting ya blong wantem ‘givimbak nogud fasin long man we i mekem i nogud long hem.’—Rom 12:2, 17.
Yumi evriwan i save lanem blong gat sore mo blong kaen, sipos yumi ridim Tok blong God evri dei, mo yumi tingting dip long lav mo sore we Jeova God mo Pikinini blong hem, Jisas Kraes, tufala i soemaot finis long yumi. Long rod ya, yumi save letem paoa blong Tok blong God i tekemaot strong fasin long hat blong yumi. (2 Kronikel 34:26, 27; Hibrus 4:12) Nomata wanem kaen famle yumi gruap long hem, nomata sipos yumi bin gat wan had laef, be yumi save lanem blong “mekem i gud long olgeta man.”—2 Timoti 2:24.
[Tok blong pija long pej 20]
Wan gudfala papa i kaen long ol pikinini blong hem