Baebol i Talem Wanem
?Wanem Tingting Blong God Long Fasin Blong Faet?
LONG fulwol, ol man oli stap faet, mo oli stap mekem samting ya long plante defren fasin. I gat ol wo, ol faet we oli kamaot from spot mo drag, ol grup we oli mekem raf fasin, ol faet long skul mo long wok. I gat ol faet long ol stori long televisin mo video kaset. Mo i gat plante faet oli kamaot long ol famle. Wan stadi we oli jes mekem long Kanada, i soem se long faef yia we i pas, 1.2 milian man mo woman oli karem kil wan taem no bitim wan taem, from hasban no waef blong olgeta. Wan narafala stadi i soem se stret haf (50 pesen) blong ol man we oli stap kilim woman blong olgeta, oli stap kilim ol pikinini blong olgeta tu.
I sua se yu yu no glad blong harem ol namba ya, olsem plante narafala man. Be, long televisin mo video kaset, bighaf blong ol stori oli fulap long faet. Long ol sinema, ol man oli stap wajem ol faet we oli no tru, mo long televisin, oli lukluk ol trufala faet. Long plante kantri, ol man oli laekem blong lukluk boksing mo ol narafala spot we oli raf. ?Be wanem tingting blong God long saed blong fasin blong faet?
Ol Faet Oli Bin Kamaot Blong Plante Yia
Longtaem finis i kam, ol man oli bin faet. Faswan raf fasin we Baebol i tokbaot, i stap long Jenesis 4:2-15. Ken we i fasbon boe blong Adam mo Iv, i jalus long brata blong hem Ebel, nao i kilim hem i ded. ?God i mekem wanem? Baebol i talem se Jeova God i panisim Ken strong, from we hem i tekemaot laef blong brata blong hem.
Jenesis 6:11 i tokbaot wol ya 1,500 yia afta we samting ya i hapen, i se: “Olbaot long evri ples, ol man ya oli stap faet mo oli stap kilim man i ded.” ?God i mekem wanem? Hem i talem long gudfala man ya Noa blong bildim wan bigfala sip, mo Noa wetem famle blong hem oli save stap sef insaed long sip ya, taem Jeova i mekem bigfala ren i foldaon long wol, blong “spolem” ol man we oli stap mekem raf fasin. (Jenesis 6:12-14, 17) ?Be wanem i mekem se ol man ya oli wantem faet?
Ol Rabis Enjel Oli Gat Paoa Long Olgeta
Jenesis i soem se sam enjel no pikinini blong God, oli kamdaon long wol, oli mekem bodi blong olgeta i kam olsem bodi blong man, nao oli tekem ol woman mo givim pikinini long olgeta. (Jenesis 6:1-4) Ol pikinini ya, ol Nefilim, oli ol bigbigfala man we oli dabolbun mo olgeta man oli savegud nem blong olgeta. Ol rabis enjel we oli papa blong olgeta, oli pulum olgeta blong bos long ol man long raf fasin. Taem bigfala ren i foldaon mo wota i kavremap wol, ol rabis man blong faet ya oli lus. Be i luk olsem we ol rabis enjel oli lego bodi blong olgeta mo oli gobak long ples blong ol spirit man.
Baebol i talem klia se stat long taem ya, ol stronghed enjel ya oli gat bigfala paoa long ol man. (Efesas 6:12) Baebol i talem se lida blong olgeta, Setan, hem i faswan “man blong kilim man.” (Jon 8:44) Taswe, ol fasin blong faet we oli kamaot long wol ya, yumi save talem se ol rabis enjel no Setan i stamba blong olgeta.
Baebol i givim woning se raf fasin i gat paoa blong pulum yumi. Ol Proveb 16:29 i talem se: “Man blong faet, oltaem hem i stap trikim ol fren blong hem blong pulum olgeta i go long rod we i no stret.” Plante man tede oli letem fasin ya i pulum olgeta blong agri long ol faet, leftemap faet, no blong joen long faet. Mo tu, plante milian man oli letem ol sinema mo pleplei oli pulum olgeta, nao oli haremgud blong lukluk ol raf fasin. Ol Sam 73:6 i tru long saed blong ol man tede, i se: “Fasin ya blong praod blong olgeta i olsem jen we oli stap hangem long nek blong olgeta, mo fasin blong olgeta blong faet i olsem klos blong olgeta.”
God i No Laekem Nating Ol Faet
?Ol Kristin we oli stap long wol ya we i fulap long faet, oli mas gat wanem fasin? Stori blong Baebol long saed blong Simeon mo Livae, tufala boe blong Jekob, i givim gudfala advaes long yumi. Sista blong tufala, Daena, i stap kampani wetem ol man Sekem we oli stap slip olbaot. From samting ya, wan man Sekem i fosem hem blong slip wetem hem. Nao Simeon mo Livae tufala i kros tumas, tufala i wantem givimbak long man ya. Ale, tufala i go kilim i ded olgeta man long taon ya Sekem. Biaen, God i pulum Jekob blong talemaot ol tok panis long tufala boe ya blong hem from kros we tufala i no blokem. Hem i se: “Simeon mo Livae. Yutufala i wan brata. Yutufala i stap yusum ol samting blong faet blong yutufala blong mekem ol fasin blong spolem man nomo. Mi mi no save go joen long ol tok haed blong yutufala. Mi mi no wantem nating blong go joen wetem yutufala.”—Jenesis 49:5, 6.
Folem ol tok ya, ol Kristin oli no joen long kampani blong ol man we oli leftemap fasin blong faet mo we oli mekem faet. I klia se God i no glad nating long ol man we oli laekem ol faet. Baebol i talem se: “God i stap skelem laef blong olgeta man, ol gudfala man wetem ol man nogud. Mo hem i no laekem nating olgeta we oli laekem tumas blong mekem faet.” (Ol Sam 11:5) Advaes i go long olgeta Kristin, se oli no mas letem kros blong olgeta i kam antap bitim mak, mo oli no mas spolem man wetem ol tok blong olgeta.—Galesia 5:19-21; Efesas 4:31.
?Ol Faet Bambae Oli Finis Samtaem?
Profet Habakuk bifo i askem long Jeova God se: “Hae God. Naoia, long ples blong mifala, ol man oli stap faet, oli stap kilkilim olgeta oli ded. . . . ?Be wetaem bambae yu harem mi, yu tekemaot mifala long ol trabol ya?” (Habakuk 1:2) Maet yu tu yu bin askem kwestin ya. God i ansa long prea blong Habakuk, i mekem promes blong spolem “ol man nogud.” (Habakuk 3:13) Profet tok blong Aesea tu i mekem wan promes we i leftemap tingting blong yumi. Long ples ya, God i talem se: “Noes blong faet bambae i no moa save kamaot long kantri blong yufala. Bambae ol enemi oli no moa save kam blong spolem ples blong yufala.”—Aesea 60:18.
Ol Witnes blong Jeova oli trastem promes ya se klosap nao, God bambae i finisim olgeta fasin blong faet long wol wetem ol man we oli laekem blong faet. Long taem ya, bambae i no moa gat ol faet long wol, be “olgeta man bambae oli luksave bigfala paoa blong Hae God mo hae nem blong hem. Tingting ya bambae i kasem olgeta ples long wol, olsem solwota we i kavremap olgeta ples blong hem.”—Habakuk 2:14.
[Tok blong pija long pej 12]
Fasin blong faet i stat taem Ken i kilim Ebel i ded