Baebol i Talem Wanem

?I Stret Blong No Laekem Man Blong Narafala Laen?

TINGBAOT sipos wan man i no laekem yu, i stap talem se yu yu man blong giaman, man blong kilim man, yu no gat hed, mo yu stap mekem rabis fasin. ?Nao, sipos yu faenemaot se hem i stap talem ol tok agens ya from we yu yu blong wan narafala laen, bambae yu harem olsem wanem?a Bambae yu mas kros. Sore tumas, samting ya i hapen long plante milian man finis. Mo tu, long ol yia we oli pas finis, fulap man oli kasem bigfala fasin agens no narafala i kilim olgeta i ded, jes from we oli blong narafala laen no kantri. Yes, bighaf blong ol wo tede oli kamaot from we wan laen i no laekem nating narafala laen. Plante man we oli talem se oli bilif long God mo Baebol, be olgeta tu oli agri long ol wo ya. Mo samfala oli talem se yumi evriwan i bon wetem fasin ya blong no laekem man blong narafala laen, taswe fasin ya bambae i stap olwe.

?Olsem wanem? ?Baebol i agri long fasin ya blong no laekem man blong narafala laen? ?I gat sam samting we oli save hapen, we oli givim raet long yumi blong no laekem man blong narafala laen? ?Fasin ya i save finis samtaem? ?Baebol i talem wanem?

God i Jajem Man From Ol Fasin Blong Hem

Sipos yumi ridim hareap ol stori blong Baebol long saed blong wok we God i mekem long ol man long taem bifo, maet yumi kasem wan tingting we i no stret​—⁠hemia se, God i agri long fasin ya we wan laen i agensem narafala laen. I tru se i gat sam stori long Baebol we oli soem se God i kilimaot wan ful laen blong man no olgeta man long wan kantri. Be taem yumi stadigud long ol stori ya, yumi faenemaot se God i mekem jajmen ya i kamaot long ol man ya from we oli sakemaot loa blong hem mo oli mekem rabis fasin, i no from laen blong olgeta.

Tingbaot ol man Kenan. Jeova God i jajem olgeta from we oli mekem ol doti fasin long saed blong seks mo from ol kastom blong skul blong olgeta we oli joen wetem wok blong ol rabis spirit. !Oli bonem ol pikinini blong olgeta long faea tu, blong mekem sakrefaes long ol giaman god! (Dutronome 7⁠:5; 18:​9-​12) Be, sam man Kenan oli bilif long God, nao oli tanem tingting blong olgeta from ol sin blong olgeta. Ale, Jeova i letem olgeta oli stap laef mo hem i blesem olgeta. (Josua 9:​3, 25-​27; Hibrus 11⁠:31) Wan woman Kenan we nem blong hem Rehab, hem i kam wan bubu woman blong Mesaea Jisas Kraes we God i promes blong sanem hem i kam.​—⁠Matiu 1⁠:⁠5.

Loa we God i givim long ol man Isrel i soem se hem i stap mekem i sem mak long olgeta man. Hem i tingbaot olgeta kaen man. Long Levitikas 19⁠:​33, 34, yumi luk fasin sore blong God long ol tok we hem i talem long ol man Isrel se: “Yufala i no mas spolem ol narafala man we oli kam stap long kantri blong yufala. Yufala i mas tingbaot taem ya we yufala i stap long Ijip, we yufala i strenja nomo long ples ya. Nao from samting ya, yufala i mas lavem ol narafala man olsem we yufala i stap lavem yufala, mo yufala i mas lukaot gud long olgeta, sem mak olsem we yufala i stap lukaot gud long ol laen blong yufala nomo. Mi mi Hae God, mi God blong yufala.” Ol tok we i klosap sem mak long hemia, yumi faenem long buk blong Eksodas mo Dutronome tu. I klia se Jeova i agensem fasin ya blong no laekem man blong narafala laen. Hem i talem se olgeta laen blong man oli mas joengud.

Jisas i Pulum Ol Man Blong Oli Laeklaekem Olgeta

Taem Jisas i stap long wol, ol man Jiu mo ol man Sameria oli no laeklaekem olgeta. Wan taem, ol man long wan vilej long Sameria oli no wantem tekem Jisas i kam insaed long ples blong olgeta, from we hem i wan man Jiu we i stap go long Jerusalem. ?Sipos sam man oli mekem samting ya long yu, bambae yu mekem wanem? Ating sam disaepol blong Jisas oli gat tingting olsem plante man long taem ya we oli no laekem ol man Sameria. Taswe, oli askem long Jisas se: “Masta. ?Yu wantem mitufala i singaot faea i aot long heven, i kamdaon, i kakae olgeta?” (Luk 9:​51-​56) ?Olsem wanem? ?Jisas i letem nogud tingting blong ol disaepol ya i gat paoa long hem? Nogat. Hem i tok strong long olgeta, mo long kwaet fasin, hem i go lukaot wan ples blong slip long wan narafala vilej. Smoltaem biaen, Jisas i talem parabol blong gudfala man Sameria. Parabol ya i soemaot klia se man blong narafala laen i no enemi blong yumi. !Wan dei, maet wan man blong narafala laen bambae i mekem i gud tumas long yumi!

Ol Man Blong Narafala Laen Long Kristin Kongregesen

Taem Jisas i stap prij, hem i tijim moa ol man long laen blong hem blong oli kam disaepol blong hem. Be hem i talem se, sloslo plante man blong ol narafala laen tu bambae oli folem hem. (Matiu 28⁠:19) ?Bambae oli kamaot long olgeta laen? !Yes! Aposol Pita i talem se: “Mi mi luk we God i stap mekem i sem mak nomo long olgeta man. Hemia wan trutok ya. Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Ol Wok 10⁠:​34, 35) Biaen, aposol Pol i soem se hem i agri long tingting ya, taem hem i talem klia se, long Kristin kongregesen, yumi no makem wanem laen we man i kamaot long hem.​—⁠Kolosi 3:​11.

Long buk blong Revelesen long Baebol, yumi faenem sam tok we i pruvum bakegen se God i glad long olgeta laen. Long vison ya we God i givim long aposol Jon, hem i luk “wan bigfala kampani blong man . . . [we] oli kamaot long olgeta nesen, mo long olgeta laen, mo long olgeta kantri, mo long olgeta lanwis.” Hemia ol man we God bambae i sevem olgeta. (Revelesen 7:​9, 10, NW ) “Bigfala kampani blong man” ya, bambae oli laef i stap gogo niufala wol i kamtru. Long taem ya, ol man blong olgeta laen bambae oli stap tugeta long pis, mo bambae oli joengud from we oli lavem God.

Go kasem taem ya, i gud we ol Kristin oli traehad blong no jajem ol narafala from laen blong olgeta. I gud we yumi traem tingting long fasin blong ol man wanwan, olsem we God i stap mekem, i bitim we yumi tingbaot wanem laen oli kamaot long hem. Olsem nao, bambae yumi mekem fasin we i stret mo yumi soem lav. Jisas i givim advaes we i stret long bisnes ya i se: “Yufala i mas mekem i gud long ol narafala man, olsem we yufala i wantem blong olgeta oli mekem long yufala.” (Matiu 7:​12) Yumi haremgud long laef taem yumi no gat tingting blong agensem ol narafala laen blong man. Yumi gat pis long tingting blong yumi mo pis wetem ol narafala man. Samting we i moa impoten, se yumi gat sem tingting olsem Man we i Wokem yumi, Jeova God. Hem i stap mekem i sem mak long olgeta man. !Hemia wan bigfala risen blong sakemaot fasin ya blong no laekem man blong narafala laen!

[Futnot]