I No Longtaem Bambae—Olgeta Disasta Oli Finis
“Ol pikinini mo ol smol bubu. !Yufala i harem! . . . Samtaem bambae faea i laet long hil ya. Be bifo long taem ya, bambae i gat noes olsem tanda mo graon bambae i seksek. Bambae hem i stat sakemaot smok, faea, mo laetning, win bambae i mufmuv, bambae i gat noes olsem tanda mo noes olsem we dog i krae. Yufala i mas ronwe bifo we i let tumas . . . Sipos yufala i ting nating long woning we hil ya i givim, sipos olting blong yufala oli moa impoten long yufala i bitim laef, bambae hil ya i panisim yufala, from we yufala i griri mo yufala i no lesin long woning blong hem. Yufala i no wari long haos blong yufala, yufala i mas ronwe hareap.”
WONING ya we i stap long buk blong Andrew Robinson (Earth Shock), oli katem long wan ston long yia 1631, mo oli stanemap ston ya olsem wan memori long taon ya Portici, long stamba blong hil ya Vesuvius long Itali. Oli mekem samting ya jes afta we volkeno i bosta mo i tekemaot laef blong 4,000 man. Robinson i talem se: “Volkeno ya we i bosta long 1631, i mekem wan samting we i no save kamaot sipos disasta ya i no hapen. . . . Hem i mekem se klosap olgeta man long wol oli save long hil ya Vesuvius.” ?From wanem? From we, taem oli wokem bakegen taon ya Portici, oli digimaot ol ston blong tufala taon ya blong bifo, Herculaneum mo Pompeii. Bifo finis, long 79 K.T. Vesuvius i bosta mo i berem gud tufala taon ya.
Wan man Rom we i laef tru long disasta ya mo i kam hedgavman, nem blong hem Yangfala Pliny, i raetem se, ol man oli kasem woning taem graon i seksek narakaen. Hem, wetem mama blong hem, mo sam narafala, oli lesin long woning ya, mo from samting ya oli no ded.
Saen We i Olsem Woning Long Taem Blong Yumi
Tede, yumi stap kam klosap long en blong ol big bisnes blong wol ya, rabis fasin blong ol man, mo politik. ?Olsem wanem yumi save samting ya? Yumi save, from we Jisas Kraes i talemaot plante samting we bambae oli hapen long wol, olsem wan saen blong soem se dei blong God blong givimbak long ol rabis man i klosap. Olsem we volkeno i faerap, i smok, mo i sakemaot faea blong givim woning, ale saen we i givim woning long yumi, hemia ol bigfala faet, etkwek, hanggri, mo sik. Ol samting ya oli stap spolem ol man blong wol ya bitim mak, stat long yia 1914 i kam.—Matiu 24:3-8; Luk 21:10, 11; Revelesen 6:1-8.
Be saen ya we Jisas i givim olsem woning, i gat wan gudfala haf blong hem tu we i givim hop long yumi. Jisas i se: “Gud nius ya blong Kingdom, bambae ol man oli talemaot long olgeta ples long wol, blong oli witnes long hem long fes blong olgeta man, nao biaen bambae en i save kam.” (Matiu 24:14, NW ) Jisas i talem se ol tok blong Kingdom i “gud nius.” Yes, makemgud samting ya. Hem i gud nius from we Kingdom blong God, wan gavman long heven we i stap long han blong Jisas Kraes, bambae i fiksimap wol ya we ol man oli stap spolem. Mo tu, Kingdom ya bambae i stopem ol disasta.—Luk 4:43; Revelesen 21:3, 4.
Taem Jisas i stap long wol, hem i soem se hem i gat paoa blong kontrolem weta. Hem i mekem wan bigfala win i godaon nao ples i kam kwaet. Ol disaepol blong hem oli sapraes mo oli fraet tu, oli talem se: “!Olgeta! ?Wanem man ya? Nating we win mo wota, be taem hem i tok long tufala, tufala i obei long hem.” (Luk 8:22-25) Tede, Jisas i no moa stap long wol ya, hem i wan spirit man we i gat bigfala paoa long heven. !Taswe, bambae i no had long hem blong kontrolem weta, blong i no spolem ol man we hem i rul long olgeta!—Ol Sam 2:6-9; Revelesen 11:15.
Maet samfala oli ting se hemia wan drim nomo. Be yu no mas fogetem se ol profet tok blong Baebol oli no olsem ol promes blong man. Ol profet tok blong Baebol oli no save mestem samtaem, oli stretgud olgeta. Hemia i tru long saed blong ol profet tok we oli stap kamtru long taem blong yumi tu, stat long yia 1914. (Aesea 46:10; 55:10, 11) Yes, yumi save bilif fulwan se wol bambae i kam wan ples blong pis long fiuja. Mo yumi wanwan, yumi save sua long fiuja blong yumi, sipos yumi tekem ol Tok blong God i go long hat blong yumi, mo sipos yumi obei long woning we hem i givim wetem lav, long saed blong ol bigbigfala samting we bambae oli seksekem wol ya i no longtaem.—Matiu 24:42, 44; Jon 17:3.
[Bokis/Foto blong pija long pej 11]
?OL FAMLE BLONG YUMI WE OLI DED FINIS OLI GAT WANEM HOP?
TAEM wan famle blong yumi i ded, yumi sore tumas mo yumi krae. Baebol i talem se Jisas tu i krae taem gudfala fren blong hem Lasaros i ded. Be smoltaem nomo biaen, Jisas i mekem wan merikel we ol man oli sapraes long hem—!hem i mekem Lasaros i laef bakegen! (Jon 11:32-44) Taem hem i mekem merikel ya, hem i givim pruf we i halpem yumi blong bilif strong long nambawan promes we hem i mekem bifo long taem ya, se: “I gat taem i stap kam we ol dedman bambae oli harem voes blong mi, nao bambae oli aot long beregraon blong olgeta.” (Jon 5:28, 29) I gud se olgeta we oli lusum sam fren mo famle we oli laekem tumas, oli haremgud long nambawan hop ya blong laef bakegen long paradaes long wol ya.—Ol Wok 24:15.
[Tok blong pija long pej 10]
?Yu yu stap lesin long woning ya se yumi stap long ol las dei blong wol ya?
[Foto Credit Line long pej 10]
USGS, David A. Johnston, Cascades Volcano Observatory