Kwestin Blong Olgeta We Oli Ridim Magasin Ya
?I Tru Se God i Tekem Ol Pikinini Blong Oli Kam Ol Enjel Long Heven?
Taem wan pikinini i ded, ol fren blong famle we i lusum pikinini ya, oli traem leftemap tingting blong olgeta wetem toktok olsem se: “Ating God i nidim wan narafala enjel long heven.” ?Olsem wanem? ?Yu harem se wan tok olsem i stret?
Sipos i tru we God i mekem ol pikinini i ded from we hem i nidim plante moa enjel long heven, samting ya i minim se God i no gat filing, mo hem i wantem mekem man i harem nogud nomo. Be Baebol i talem samting we i defren olgeta. (Job 34:10) Wan papa we i gat sore bambae i no save tekemaot wan pikinini long papa mama blong hem wantaem nomo, blong mekem famle blong hem i kam bigwan. I no gat wan papa mama long wol ya we i gat bigfala sore moa i bitim Jeova, we bigfala fasin blong hem hemia lav. (1 Jon 4:8) Bigfala lav blong Jeova bambae i no save letem hem i mekem wan samting we i nogud olsemia.
Traem tingbaot, ‘?God i rili nidim moa enjel long heven?’ Baebol i talem se olgeta wok blong God oli stret gud olgeta. (Dutronome 32:4) Wok we hem i mekem blong wokem plante milian enjel i stret gud olgeta, mo hem i no sot long enjel nating. (Daniel 7:10) ?Olsem wanem? ?God i no kaontem gud namba blong ol enjel we hem i nidim? !Nogat! I sua se God ya we i gat Olgeta Paoa i no save mekem wan mastik olsemia. I tru we God i jusumaot sam man long wol ya blong oli kam ol spirit man we oli save rul wetem Kraes long Kingdom long heven, be ol man ya bambae oli no ol smol pikinini we oli ded.—Revelesen 5:9, 10.
Wan narafala risen from wanem God i no save tekem ol pikinini long wol ya blong oli kam ol enjel long heven, hemia from we samting ya bambae i no laenap nating wetem stamba tingting we hem i gat fastaem long saed blong ol pikinini. Long garen blong Iden, God i talem long Adam mo Iv, se: “I gud yutufala i gat plante pikinini blong yutufala, blong olgeta we bambae oli kamaot biaen long yutufala, bambae oli save go stap long olgeta ples long wol. Nao bambae yufala i save mekem evri samting long wol ya oli stap aninit long han blong yufala.” (Jenesis 1:28) Ol pikinini oli ol presen we i kam long God. God i mekem se ol man mo ol woman oli save gat pikinini, from we long rod ya, stamba tingting we hem i gat fastaem, hemia se wol ya bambae i fulap wetem wan famle we i stret gud olgeta, bambae i kamtru. God i neva plan blong mekem ol pikinini oli ded mo biaen oli kam ol spirit man. Baebol i talem klia se ol pikinini oli “wan presen we Hae God i givim.” (Ol Sam 127:3) ?I stret we Jeova, God ya blong lav, i tekembak wan presen we hem i givim finis long ol papa mama? !Nogat!
Taem wan pikinini i ded, samting ya i mekem papa mama blong hem i harem nogud tumas long hat blong tufala. ?Ol papa mama we oli harem nogud olsem, oli gat wanem hop? Baebol i promes se God bambae i mekem plante milian man oli laef bakegen long paradaes long wol ya. Traem tingbaot ol pikinini we oli laef bakegen wetem wan bodi we i strong gud, mo oli joen bakegen wetem olgeta we oli lavem olgeta tumas. (Jon 5:28, 29) God i wantem se ol pikinini oli gru i kam bigman, oli haremgud long laef, mo oli lanem plante samting long saed blong hem mo stamba tingting blong hem long saed blong wol ya. Taswe, ol pikinini we oli ded oli no kam ol enjel long heven be oli stap wet blong oli laef bakegen long wol ya we bambae i kam wan paradaes. Long taem ya, aninit long han blong Man we i Wokem yumi, ol pikinini mo ol olfala bambae oli glad tumas blong wosipim Jeova God blong olwe.