3 God i Stap Givimbak Evri Nogud Fasin We Man i Mekem—?Hemia i Tru?
?Yu yu harem tok ya finis?: “God i stap makem evri sin we man i mekem mo bambae i panisim hem long helfaea.”
“God i mekem ol disasta i kasem ol man blong panisim olgeta from ol sin blong olgeta.”
?Baebol i tijim wanem?: Seken Pita 3:9 i talem se Jehova i “no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” God i no tingting tumas long ol mastik we yumi mekem, be hem i putum tingting blong hem i stap long ol gudfala fasin blong yumi. “Hae God i stap luklukgud long olgeta samting long wol ya, blong i save givim paoa long ol man we oli ona long hem long olgeta tingting blong olgeta.”—2 Kronikel 16:9.
Helfaea i no wan tijing we i kamaot long Baebol. God i no gat tingting ya nating blong bonem man long faea gogo i no save finis. Panis blong man we i mekem nogud samting, hemia se man ya i mas ded. (Jeremaea 7:31; Rom 6:7) Ol disasta oli kilim i ded enikaen man nomo, gud man wetem rabis man. Taswe yumi no save talem se God nao i mekem ol disasta ya. Be ol disasta oli stap kamaot enitaem nomo, mo oli save kasem eniman.—Prija 8:7.
?Trutok ya i save givhan long yu olsem wanem?: Yumi save kam klosap long God taem yumi save se hem i “stap fogivim” ol man mo hem i no kwik blong panisim ol man. (Ol Sam 86:5) Yumi no mas mekem wok blong God from we yumi fraet se God bambae i panisim yumi. Yumi mas lavem Jehova God. Lav ya nao bambae i mekem bilif blong yumi long God i kam strong moa. Mo tu, lav ya bambae i pusum yumi blong yumi wantem tumas blong mekem Jehova i glad.—Matiu 22:36-38; 1 Jon 5:3.
God i wantem we olgeta man oli mas tanem tingting blong olgeta from ol sin blong olgeta. Be hem i save se plante man bambae oli no wantem mekem olsem. ?Yu ting se i stret sipos wan lida blong wan kantri i stanemap ol loa, be taem ol man oli brekem ol loa ya, hem i no panisim olgeta from? Nogat. Samting ya bambae i mekem we rabis fasin i gohed oltaem nomo, mo bambae i mekem we ol gudfala man oli safa. Long sem fasin, sipos God i neva panisim ol man we oli stronghed, rabis fasin bambae i gohed olwe. (Prija 8:11) Be God i no olsem. Hem i no save letem rabis fasin i gohed blong olwe. From we yumi save samting ya, yumi gat gudfala tingting long saed blong fiuja. God i promes se ol man we oli gohed blong mekem ol rabis fasin bambae oli mas lus, nao “ol man we tingting blong olgeta i stap daon” bambae oli save stap gud long wol ya gogo i no save finis. Hemia nao stamba tingting we God i gat taem hem i mekem wol mo ol man fastaem.—Ol Sam 37:10, 11, 29.a
[Futnot]
a Sipos yu wantem save long saed blong wol ya we God bambae i mekem i kam paradaes, lukluk japta 3 mo japta 8 blong buk ya ?Wanem Samting We Baebol i Rili Tijim?
[Tok blong makem poen long pej 6]
?Yu ting se God i glad sipos yu mekem wok blong hem nomo from we yu fraet se bambae hem i panisim yu?
[Foto Credit Line long pej 6]
Engravings by Doré