Tu Nambawan Sil We Oli Protektem Wol

TAEM yu aot long wol mo yu go long ples we ol sta oli stap long hem, i gat plante samting we i save kilim man i ded, olsem ol bigbigfala ston we oli stap flae olbaot. Nating se i olsem, wol blong yumi i stap folem rod blong hem we i no gat plante tumas samting i kilim hem no bangem hem. ?From wanem i olsem? From we i gat tu samting i stap raon long wol we tufala i olsem sil blong blokemgud wol. Tufala samting ya, i gat wan kaen paoa we oli kolem magnetic field, mo narawan hemia win we i stap raonem wol we oli kolem atmosphere.

Magnetic field Paoa ya i stat dip insaed long graon mo i go antap olgeta i bitim win we i raonem wol. Taem paoa ya i kasem antap olgeta, hem i wokem wan kaen sil we yumi no save luk wetem ae blong yumi, sil ya i raonem wol blong yumi mo nem blong hem magnetosphere (yu save luk long pija long raetsaed). Samting ya we i olsem sil, i blokem sam strongfala paoa blong ol samting long yunives blong oli no kasem wol, mo i blokem wol tu long sam narafala nogud samting we oli kamaot long san. Sam long ol samting ya we i kamaot long san, hemia wan kaen hot win we i fulap long ol smosmol samting we oli olsem lektrik. Mo tu, i gat strong faea we i kamaot long san, we i olsem plante bilian bom we oli bosta wantaem. Mo wan narafala samting we i kamaot long san hemia plante bilian tan blong gas we i hot we i hot. Ol samting ya we san i stap sakem, oli mekem se ol narakaen kala oli kamaot long skae (olsem pija long raetsaed daon i soem) we man i save luk long not blong wol olgeta mo long saot blong wol olgeta.

Atmosphere Wan narafala samting we i stap protektem wol, hemia win ya we i stap raonem wol. Antap long win ya, i gat wan kaen oksijen we nem blong hem ozone. Taem strongfala laet blong san (ultraviolet no UV) i kasem ozone, ozone ya i holem klosap 99 pesen blong laet ya blong i no kasem wol. Taswe ozone ya i protektem ol laef samting long wol, hemia ol man mo ol smol nalumlum blong solwota tu, blong strong laet blong san i no kilim olgeta i ded. Wan samting tu we i gud blong tingbaot se ozone ya i save jenis folem hamas laet blong san we i kasem hem, sipos i plante ale hem tu bambae i kam plante. Taswe ozone ya i wok olsem wan sil we i protektem gud wol.

Win we i raonem wol i blokem wol ya long plante milian ston tu we evri dei oli stap flae i kam. Sam long ol ston ya oli smosmol nomo, be samfala oli bigbigwan tumas. Taem ol ston ya oli flae i kam kasem win ya we i raonem wol, win ya i kakae ol ston ya, i olsem we i bonem olgeta oli kam asis nomo. Taem samting ya i hapen, ol man oli save luk wan samting olsem wan strong laet i saen long skae no samting we i olsem wan sta we i stap muv. Oli kolem ol samting ya se ol meteor.

Tufala samting ya we i protektem wol blong yumi, oli no blokem hot we ol laef samting oli nidim, wetem laet tu we yumi nidim. Mo tu, atmosphere i givhan blong mekem we hot blong san i no stap long wan ples nomo long wol be i go olbaot long hem. Ale long naet, atmosphere i mekem wan narafala wok bakegen, hem i olsem wan blangket we i kavremap wol, i kipim wol i stap womgud from we hem i holem smol hot blong dei i stap.

Tru ya, atmosphere mo magnetic field, tufala i mekem wan nambawan wok we man i sapraes long hem, mo i no gat fulap save yet long hem. Wan narafala samting tu we man i sapraes long hem mo i no gat plante save long hem yet, hemia wota we i kavremap plante haf blong wol ya.