?I Gat Wan Man We i Wokem Samting Ya?
Feta Blong Hoknaet
◼ Ol man we oli wokem ol plen oli wantem tumas blong kopi ol hoknaet. ?From wanem? From we, taem hoknaet i stap flae, hem i no mekem wan noes nating. Long Intenet, web saet blong National Geographic i talem se: “I no gat wan narafala pijin we i save flae long fasin we i kwaet olsem hoknaet.” ?Olsem wanem hoknaet i save mekem samting ya?
Tingbaot: Taem bighaf blong ol pijin oli stap flae, nao win i kasem feta blong olgeta, hemia i mekem noes. Be long saed blong hoknaet, i no olsem. Long en blong ol feta blong hem biaen, i gat samting olsem ol tasel we oli hanghang. Taem hem i muvum wing blong hem i godaon, win we i glisim top blong wing i mekem noes, be taem win ya i pas long ol tasel, olgeta oli daonem noes ya. Eni noes we i stap, i go lus insaed long ol sofsof feta long ol narafala haf blong bodi blong hoknaet.
Ol man blong wokem plen oli wantem tumas blong kasem save long waes ya we i mekem se hoknaet i save flae kwaet nomo. Sipos oli save wokem ol plen we oli no mekem bigfala noes, ol epot we oli putum tabu long ol plen long naet, bambae oli letem olgeta oli flae let long naet mo eli long moning. Oli mekem plan finis blong jenisim sam samting long saed ya. Geoffrey Lilley we hem i bin stap olsem top saentis long saed blong fasin blong flae, long Yunivesiti blong Southampton long Inglan, hem i talem se: “Naoia, mifala i jes stat blong lanem olsem wanem blong daonem noes blong ol plen.” Be hem i talem tu se, ating plante yia i mas pas yet, bifo we oli naf blong wokem wan plen we i no mekem bigfala noes.
?Wanem tingting blong yu? ?Feta blong hoknaet we i save daonem noes, hem i kamaot olsem nomo? ?I gat wan Man we i wokem samting ya?
[Tok blong pija long pej 23]
Skelem feta blong hoknaet long lefsaed, wetem feta blong hok (dei) long raetsaed
[Foto Credit Lines blong pija long pej 23]
Long-eared owl: © Joe McDonald/Visuals Unlimited; barn owl sequence: © Andy Harmer/Photo Researchers, Inc.; feather comparison: Courtesy of Eike Wulfmeyer/Wikimedia/GFDL