Wok Blong Paenia i Karem Bigfala Frut
1 Jeova i wantem se yumi mas glad, mo haremgud long olgeta frut blong hadwok blong yumi. (Ekles. 5:18) Wan impoten wok we yumi save mekem hemia wok blong talemaot gud nyus blong Kingdom mo mekem disaepol. Pol i bin leftemap tingting blong Timote long ol tok ya se: “Yu mas mekem wok ya blong talemaot gud nyus blong Kraes, mo yu mas finisim olgeta wok ya we God i givim long yu blong mekem.” (2 Tim. 4:5) Olgeta tok ya blong Pol blong leftemap tingting blong Timote, oli save leftemap tingting blong yumi evriwan tu tede, blong yumi mekem minista wok blong yumi wetem olgeta sol blong yumi. Long plante blong yumi, samting ya i min se yumi kam fultaem paenia. I gud blong tokbaot olgeta samting long laef blong yumi naoia long prea, blong luk sipos yumi gat jans blong joen fultaem long wok blong prij.
2 Stat Naoia: Blong mekem wok blong paenia, yumi mas kasem sam mak we oli laenap wetem prea blong yumi. Wokem fasin blong laekem blong mekem wok blong Jeova, mo laekem ol narafala. Joen moa long wok blong prij, long ol nyufala visit mo ol Baebol stadi. Mekem wan program we i save wok mo we yu naf blong folem. Askem advaes long ol elda mo ol narafala paenia. Folem wan program blong prij we i rongud. Yumi mas stretem tingting blong yumi wan, yumi mas rere blong mekem wok ya mo yumi mas gat strong tingting blong mekem. (1 Kor. 9:23, 25, 27) Hemia nao sam long ol gudfala mak we olgeta we oli bin stat blong mekem wok blong paenia long olgeta manis we oli pas finis oli bin kasem.
3 I gud blong putum sam mak mo traehad blong kasem olgeta; bambae oli givhan long yumi blong gohed moa long wok blong prij mo yumi save gat gudhan long wok ya. ?Yumi traehad blong mekem ol fastok blong yumi oli kamgud moa no fasin blong yumi blong winim ol tok we ol man oli sakem blong blokem yumi? ?Yumi wantem yusumgud moa ol buk blong yumi? ?Yumi stap mekem wan Baebol stadi? ?Yumi wantem statem wok blong haftaem paenia blong kasem mak ya blong fultaem paenia? Yumi mas putum sam mak we oli save wok mo we yumi save kasem olgeta. Sipos yumi kasem ol mak ya, bambae yumi gat gudhan long wok ya mo bambae yumi haremgud from.—1 Tim. 4:15, 16.
4 Wan Fasin Blong Laef We i Rij: Sipos yumi mekem wok blong paenia wetem wan stret tingting mo wetem tingting blong wantem gru moa long saed blong speret, bambae yumi kasem plante blesing from. Bambae yumi gru moa long fasin blong trastem Jeova. Mo from we yumi yusum Tok blong God evritaem, bambae yumi gat gudhan moa blong yusum hem. Wok blong yumi bambae i gat paoa long ful kongregesen, mo fasin blong yumi blong wok strong bambae i leftemap tingting blong ol narafala blong oli save joen moa long wok blong prij. Wok blong paenia i givhan long yumi blong tingting oltaem long saed blong speret, i givhan long yumi blong blokem fasin blong wantem plante samting, mo blong no joen long ol rabis kampani blong wol.
5 Jisas i talem long ol disaepol blong hem se: “Tru, i gat plante kakae tumas i stap long garen, be smol man nomo oli stap blong karem i go. Yufala i mas askem strong long masta blong garen ya, blong hem i sanem sam moa man oli kam blong karem ol kakae ya blong hem.” (Mat. 9:37, 38) Tede yumi nidim moa man blong wok, bitim taem blong Jisas. Wok blong paenia i olsem wan jans blong joen moa long wok ya blong sevem man. I no gat tok blong talem filing mo glad we yumi kasem taem yumi yusum laef blong yumi blong mekem wok blong Bigfala Man ya we i Wokem yumi.—Prov. 10:22.