Talemaot Gud Nyus—Wetem Buk Ya Man We i Hae Moa Long Olgeta Man
1 Long olgeta yia we i pas finis, kolosap olgeta buk blong yumi oli stap tokbaot laef mo minista wok blong Jisas. Samting ya i stret nomo, from “i no gat wan narafala man nating we i save sevem yumi. From we olbaot long wol ya, be God i no givim nem blong wan narafala man nating long yumi, we hem i stap yusum blong sevem yumi.” (Wok 4:12) Nyufala buk ya i spesel, from hem i faswan long ol buk we yumi gat we hem i tokbaot laef blong Jisas nomo.
2 Yumi Seremaot Hem: ?Wanem sam samting we yumi makem long buk ya we yumi save yusum? Japta 5 i stanemap wan bigfala kwestin we yumi askem samtaem: “?Jisas i Bon Weples mo Wetaem?” Yu save pulum intres blong wan yangfala sipos yu tokbaot store blong japta 44 long hem: “Jisas i Blokem Wan Bigfala Win.” Ol man we oli sik no oli handikap oli save haremgud long ol gudfala toktok long japta 57, “Jisas i Sore Long Ol Sikman.” Japta 90, we i tokbaot “Laef Bakegen Long Ded”, bambae i pulum bigwan intres blong ol man we oli lusum wan blong ol famle blong olgeta we oli laekem hem tumas. Storeyan long japta 111, “Saen Blong Ol Las Dei” i save givhan blong tokbaot olgeta samting we oli stap hapen long wol tede.
3 Taem yu stap long doa, yu save talem se: “?Wanem samting God i askem long yumi, ol Kristin man? Baebol i pulum yumi blong folem eksampel blong man ya we i hae moa long olgeta man, Jisas Kraes. [Ridim 1 Pita 2:21.] Hem i tijim ol disaepol blong hem blong oli laekem ol man we oli stap raonabaot long olgeta, blong stap klin long saed blong tingting mo blong prea from Kingdom blong God. Yumi save kasem sef sipos yumi luksave Jisas olsem Man blong Sevem yumi mo sipos yumi obei long hem. [Ridim Jon 14:6.] Jisas i no wan man olsem ol narafala. Buk ya i soem se hem i man we i hae moa long olgeta man. Long japta 59 blong buk ya oli kolem hem ‘Mesaea, Pikinini blong God ya we i laef.’ From we fasin blong yumi blong kasem sef i stanap long hem nomo, ?yu no ting se i stret blong yumi lanem plante samting long saed blong ol wok blong hem mo long ol tijing blong hem? Oli wokem buk ya i stret nomo blong givhan long yumi long poen ya, mo mi mi glad blong livim wetem yu blong 300 vatu nomo.”
4 Ating bambae yufala i save faenem plante man we hat blong olgeta i stret we bambae oli glad blong karem buk ya mo ridim hem. I gud blong yufala i gobak blong visitim olgeta man ya bakegen. Ating samtaem, bambae yufala i save statem wan Baebol stadi wetem nyufala buk ya. I stret nomo blong yusum buk ya blong mekem stadi wetem wan famle no wetem ol yangfala. Bambae yu givhan long plante man blong oli faenem rod blong kasem laef we i no save finis sipos yu seremaot buk ya Man We i Hae Moa Long Olgeta Man.