Invaetem Ol Narafala Blong Folem Man We i Hae Moa
1 Long Matyu 5:14, Jisas i talem long ol disaepol blong hem: “Yufala i olsem laet long ol man long wol.” Ol disaepol blong Jisas oli mas talemaot long ol man Kingdom blong Jeova mo ol samting blong oli save sef from Jisas. Yes yumi tingbaot wok ya, nao long manis desemba yumi glad blong givimaot buk ya Man We i Hae Moa Long Olgeta Man. Hemia sam rod we yu yu save yusum.
2 Afta we yu talem halo long man blong haos, ating yu save yusum ol tok ya biaen, long prapa fasin blong yu:
◼ “Plante man oli wantem save se Jisas i olsem wanem taem hem i stap long wol. ?Long wanem rod yu ting se Jisas i defren long ol narawan? [Letem hem i ansa.] Nambawan buk ya, Man We i Hae Moa Long Olgeta Man, i tokbaot ol impoten taem long laef mo long minista wok blong hem, mo i givhan long yumi blong luksave se hem i wanem kaen man. Taem we oli ridim buk ya finis, plante oli harem se i olsem oli bin fren wetem Jisas stret. I olsem se oli kasem ol nogud taem wetem hem. Mo tu, olsem we oli lukluk stret ol minista wok blong hem.” Soem faswan pija long buk ya, we i eksplenem stampa tok blong hem. Biaen go long fastok mo ridim namba tu haf aninit long smol stampa tok “Stadi Long Laef Blong Hem i Save Givhan Long Yumi.” Givimaot buk ya long 300 VT.
3 No ating, yu laekem talem samting olsem:
◼ “Long taem blong krismas, ol man oli stap tingbaot Jisas. Be, from we plante nogud samting oli stap hapen long olgeta ples long wol, ating sam oli save askem sipos Jisas i rili kea long yumi. ?Yu yu harem olsem wanem long samting ya?” Wet long ansa. Go long japta 24 blong buk ya Man We i Hae Moa, mo storeyan sot taem long risen blong wanem Jisas i kam daon long wol. Biaen ridim Jon 15:13, mo yu yu tokbaot dip lav we Jisas i gat long ol narafala. No foget blong gat ol laswan magasin, wan buklet, no wan traket we i stret we yu save givimaot sipos oli no akseptem buk ya.
4 Hemia wan narafala rod:
◼ “Plante yangfala oli lukluk long sam haeman. Oli wantem folem rod blong ol man ya. Be i hadwok blong faenem sam gud man. Jisas kraes i soem gudfala rod long evriwan. [Ridim 1 Pita 2:21.] Ful laef blong hem i stanap long wosip blong Papa blong hem long heven. ?Yu yu ting bae i olsem wanem sipos moa man oli traem folem rod blong hem?” Letem hem i ansa. Tokbaot namba tri haf long pej we i stap bifo laswan, we i soem ol spesel fasin blong hem. Eksplenem olsem wanem buk ya Man We i Hae Moa i save givhan long yumi ol kristin, blong kam gud moa.
5 Ating yu wantem yusum ol tok olsem:
◼ “Taem wan man i tokbaot Jisas, plante oli tingbaot hem olsem wan bebi, no olsem wan man, we i harem i soa, kolosap i ded. Oli jes tingbaot dei we Jisas i bon no i ded long hem. Oli no makemgud ol nambawan samting we hem i talem no no hem i mekem long laef blong hem. Ol samting we hem i mekem i kasem laef blong evri man long wol. Taswe i impoten tumas blong lanemgud, ol nambawan samting we hem i mekem long bighaf blong yumi.” Ridim Jon 17:3. Openem buk ya Man We i Hae Moa long fas pej blong fastok, mo ridim haf namba fo. Askem man blong i tekem buk ya mo soem long hem olsem wanem hem i save yusum blong stadi.
6 Tingbaot blong raetem adres blong ol man we oli soem intres mo oli karem buk; nao biaen, yu save visitim olgeta bakegen. From we i gat taem we i stap yet, yumi mas lukaot long olgeta we hat blong olgeta i stret mo yumi mas givhan long olgeta blong kam man we oli folem Sevya blong yumi, Jisas Kraes.—Mat. 16:24.