Talem Long Olgeta Blong Oli Kam Man Blong Hem
1 Long 1 Korin 3:6, NW, Pol i raetem se: “Mi planem sid, Apolos i putum wora long hem, be God i stap mekem i gru.” Pol i yusum tok ya blong givhan long ol brata blong hem, blong oli luk se i impoten blong joengud tugeta long wok, aninit long rul blong Kraes. Olsemia, hem i givhan long olgeta tu, blong oli glad long nambawan wok we oli mekem blong planem mo putum wora long hem.
2 Wok ya we i blong sevem laef, hem i mas finis kolosap nomo. From we yumi kristin we i givim laef blong yumi long Jeova, yumi mas givhan long ol narafala blong oli kam man blong Jisas. (Wok 13:48) ?Olsem wanem yu yu save givhan long ol man, we fastaem oli intres long buk ya Man We i Hae Moa Long Olgeta Man?
3 Sipos yu go visitim bakegen wan man we i tekem buk ya, ating yu save talem se:
◼ “Lastaem, yumi bin storeyan se Jisas i wanem kaen man. Mi glad tumas blong givim buk ya Man We i Hae Moa Long Olgeta Man long yu. ?Wanem samting we yu yu laekem moa long saed blong ol tijing mo laef blong Jisas?” Letem hem i ansa. Go long japta 113, mo tokbaot nambawan fasin blong Jisas we tingting blong hem i stap daon. Ridim Filipae 2:8 blong soem tingting blong aposol Pol long fasin daon blong Jisas. Afta, yu yu save soem olsem wanem yumi save lanem moa samting taem yumi stadi Baebol oltaem.
4 Maet yu laekem moa fastok ya:
◼ “Mifala i storeyan long ol samting we Jisas i mekem taem hem i stap long wol, we i soem se hem i rili kea long yumi. Long tingting blong yu, ?Wanem samting bae Jisas i mekem blong givhan long olgeta we oli harem nogud tumas?” Wet long ansa. Go long japta 133, mo lukluk bakegen ol tok we i stap long haf namba faef. Soem pija long nekis pej, mo eksplenem ol samting we bambae oli kamaot, taem God i mekem wil blong hem i kam tru long wol, olsem i kamaot finis long heven. Tokbaot ol blesing we yumi save kasem sipos yumi go moa long stadi.
5 Sipos man blong haos i no tekem buk fastaem, ating yu save stat toktok olsemia:
◼ “Mi mi ting se yumi tufala i agri long samting ya se: Tede, plante man oli folem fasin blong man we oli ting se hem i wan hae man. Jisas Kraes i nambawan eksampel we yumi evriwan i save folem. Mi mi wantem toktok wetem yu long wan impoten samting we mi lanem, taem mi stadi long eksampel we Jisas i soemaot. [Go long japta 40 long buk ya Man We i Hae Moa, mo pulum tingting long fasin sore we Jisas i soemaot.] Samting ya i rili mekem mi tingtinggud long rod blong gat fasin sore.” Ridim Matyu 5:7. Givimaot buk no buklet ya God i Rili Kea Long Yumi?
6 No maet yu save traem fasin ya blong talem stret ol tok:
◼ “Lastaem mi kam, yumi tokbaot impoten samting ya blong kasem ol save long saed blong Jisas. Jon 17:3 i talem se ‘laef we i no save finis i min’ yumi mas kasem save ya. Olsem wanem yumi save mekem samting ya?” Letem hem i ansa. Eksplenem rod we yumi folem blong stadi wetem ol man mo wanem hem wan i save mekem long saed ya.
7 Pol i talem se wan man we i wok long taem blong karem kakae long garen, “bambae God i givim pei long hem, stret long ol wok we hem i mekem.” (1 Kor. 3:8) Sipos yumi wok had blong halpem ol narafala blong oli kam disaepol blong Jisas, bambae God i blesem yumi bigwan.