Man We i Hae Moa Long Olgeta Man
1 Taem yumi kasem nyufala buk ya, nem blong hem, Man We i Hae Moa Long Olgeta Man, i pulum tingting blong yumi bigwan. Blong makem wan man se hem i hae moa, man ya i mas bitim olgeta milyan man we oli bin laef long wol. Tok ya “hae moa” i minim “gud moa long fasin no prapa fasin blong hem.” !Man we i kasem mak ya i soemaot se hem i hae moa long olgeta narafala man!
2 Jisas Kraes, Pikinini blong God, i stret nomo blong ol man oli luk hem olsem. Ol samting we hem i mekem long wol ya i no joen nating wetem ol sas samting blong wol, wok no politik. From we hem i kamaot long wan famle we oli no gat plante samting hem i pasem bighaf blong laef blong hem long wan fasin we hem i no gat haenem nating. Taem hem i gat tate yia blong hem, hem i stap pulum tingting blong olgeta man Palestin long olgeta tok mo olgeta wok blong hem. Hem i soemaot ol fasin mo ol plan blong God long ol man long wan fasin we ol man oli no save long hem. Hem i mekem wan bigfala wok blong prij we neva wan man hem wan i mekem, hem i mekem ol merikel we i mekem ol man oli sapraes mo hem i putum faondesen blong wan sosaeti blong wan nyufala wol.
3 Wan Buk We Yumi Nidim: Pol i invaetem yumi ‘blong luk’ Jisas olsem wan eksampel we yumi save folem. (Hib. 12:2) Stat long yia 1985 go kasem 1991, Sosaeti i bin prentem insaed long Wajtaoa 149 haf we i folfolem olgeta long saed blong laef mo minista wok blong Jisas. Olgeta haf ya oli mekem yumi savegud long olgeta tok blong Jisas mo ol samting we hem i mekem blong givhan long yumi. Oli soemaot from wanem yumi mas folem eksampel blong hem. Olgeta haf ya oli bin mekem i sot moa mo naoia i kam olsem wan buk nomo. !Wan nambawan tul blong givhan long ol narafala man blong oli luk long Jisas nomo mo oli save kam man blong Hemia we Jeova i putum hem “i hae moa long nem blong olgeta enjel we oli haeman, mo lida, mo man blong paoa, mo jif long heven”!—Efes. 1:21.
4 Ol Samting We Yumi Save Makem: Taem yu seremaot buk ya, yu save askem long man se: “?From wanem Jisas i man ya we i hae moa long ol man blong wol? Blong givim ansa, yu save tokbaot sam long olgeta 133 japta blong buk ya we oli tokbaot laef, fasin, ol tijing mo ol wok blong Jisas. Long japta 24 hem i tokbaot klia from wanem Jisas i kam long wol. Japta 35 hem i tokbaot bakegen bigfala tok blong hem antap long hil. Japta 43 hem i stap tokbaot gudfala fasin we Jisas i gat blong yusum pijatok blong tijim ol man. Japta 133 hem i soemaot sam blesing we olgeta man long wol bambae oli save kasem taem Jisas i finisim wok blong hem. Yu save pulum man we i stap lesin blong joen long storeyan sipos yu askem olgeta kwestin we oli stap long en blong olgeta japta wanwan long hem; ol vas we oli givim olsem refrens oli soemaot weples long Baebol store ya i stap long hem. Yu save soemaot klia ol nambawan pijatok we oli makem gudfala fasin blong Jisas, blong tingbaot mo givhan long narafala mo fasin blong hem blong wok strong long wok blong prij we hem i no les nating.—Lukluk japta 44, 95, 117 mo 123.
5 Bambae yumi seremaot nyufala buk ya long manis Jun. Ol samting we yumi makem long buk ya oli givim gudfala risen long yumi blong yumi glad blong seremaot hem. Man we i wantem kasem laef we i no save finis hem i mas lanem blong kasem save long Jisas Kraes. (Jon 17:3) Tru long hadwok blong yumi blong seremaot buk ya, plante man we hat blong olgeta i stret bambae oli save jenisim laef blong olgeta tru long ‘man ya we i hae moa long olgeta man.’