Halpem Ol Narafala Blong Lukluk i Go Oltaem Long Jisas Blong Folem Hem
1 Man We i Hae Moa Long Olgeta Man i wan buk we i nambawan tumas. Ol 133 japta blong hem oli save halpem ol man we oli ridim blong lukluk i go oltaem long Jisas mo i pusum olgeta blong folem eksampel blong hem. Oli makemgud se olgeta king we oli rul samtaem, sipos oli putum olgeta wanples, be olgeta evriwan oli no save gat paoa long laef blong olgeta man long wol olsem Jisas Kraes i mekem. Olgeta we oli lukluk i go oltaem long Jisas blong folem hem oli save kasem blesing.
2 Jisas i bin tijim ol disaepol blong hem long saed blong Papa blong hem mo hem i soem ol gudfala fasin blong God long eksampel blong hem. Taem yumi luk nambawan fasin blong Jisas olsem wan gudfala tija, fasin no fraet we hem i gat blong lidim man, mo fasin blong hem blong tingbaot narafala, samting ya i mekem hat blong yumi i glad. !Taem yumi tingbaot soa we hem i kasem taem hem i givim laef blong hem olsem wan ransom from yumi, yumi tangkyu bigwan from! Buk ya Man We i Hae Moa Long Olgeta Man bambae i halpem ol man blong luk Jisas long fasin ya nao.
3 Mekem Reregud: Yu mas mekem reregud blong wan storeyan blong Baebol we i save halpem ol narafala man blong lukluk i go long Jisas mo folem hem. Grup blong famle mo ol narafala oli save mekemrere tugeta. Traehad blong wekemap intres mo pulum ol man blong ridim buk ya Man We i Hae Moa. Samtaem i tekem wan no moa taem blong storeyan long Baebol wetem man blong kasem mak ya. Sipos man i no intres tumas, yumi save livim wan traket no maet wan buklet no wan magasin long hem.
4 Storeyan blong yumi long ol haos wanwan long manis Desemba bambae i stanap long Jisas mo i blong leftemap tingting blong ol man blong kasem save moa long hem. Taem yumi soemaot ol tingting we oli stap long buk ya Man We i Hae Moa, yumi save halpem ol man blong luk Jisas, i no olsem wan man we histri i tokbaot nomo, be olsem Pikinini blong God mo King we i rul long gavman ya we bambae i finisim olgeta trabol blong ol man.
5 Yumi mas glad tumas blong seremaot buk ya. Long manis olsem long yia plante kwestin oli stanap long saed long laef blong Jisas. Sipos yumi savegud ol haf insaed long buk ya, bambae yumi gat jans blong wekemap intres blong ol man raonabaot long yumi. I gud yumi soem fasin tangkyu blong yumi from kakae ya long saed blong speret taem yumi wok strong long wok ya.
6 Wan man we oltaem i no glad blong stap rid i talemaot glad blong hem long buk ya Man We i Hae Moa, hem i talem se buk ya i mekem se fasin blong rid i kam wan samting we hem i mekem long evri en blong dei. Yumi wantem halpem ol narafala blong harem olsem tu, taem yumi traehad blong halpem olgeta blong oli lukluk i go oltaem long Jisas mo folem hem taem oli rili intres blong ridim Man We i Hae Moa Long Olgeta Man.