Gohed Blong Talemaot Ol Samting We Yufala i Luk Mo Yufala i Harem
1 Nating se oli mekem i nogud long olgeta mo oli satem olgeta long kalabus, ol aposol oli talem long ol man we oli stap agensem olgeta se: “Be mifala i no save stap kwaet. Mifala i mas gohed blong talemaot ol samting ya we mifala i luk long ae blong mifala, mo we mifala i harem long sora blong mifala.” (Wok 4:20) Oli gat fasin tangkyu long wok mo tijing blong Jisas.
2 Gud nyus long saed blong Jisas mo Kingdom blong hem i impoten tumas long man tede olsem long taem bifo. Taswe, yumi mas holem evri jans blong talemaot wanem we yumi luk mo harem long Tok blong God. Oltaem ol man oli gat gud tingting blong tokbaot ol samting long saed blong skul long taem blong holidei, mo samting ya i openem moa jans blong givim wetnes.
3 Ol Yangfala, Storeyan Wetem Ol Fren: Plante yangfala Wetnes bambae oli tekem jans long taem blong spel blong givim wetnes long ol fren mo ol tija we oli skul wetem olgeta. Sam oli plan blong mekem haftaem paenia long manis ya. I gud blong mekem sam spesel plan blong visitim ol skulfren mo tija we oli bin skul wetem yu blong wekemap intres blong olgeta long saed blong buk ya. !Wan yangfala Wetnes we oltaem i tekem jans blong toktok wetem ol tija mo ol skulfren blong hem, i seremaot 35 buk long wan dei nomo! From we plante man oli tingbaot Jisas Kraes mo tingbaot pis long manis olsem long yia, ?yu no ting se hem i wan gud taem blong mekem olgeta oli save olsem wanem Jisas we i stap rul finis olsem King bambae i stretem trabol long wol?—Skelem wetem Luk 2:14.
4 Sipos man i askem from wanem yu no joen long ol lafet blong skul we i joen long Krismas, yu save talem se:
◼ “Mi no stap joen long lafet blong Krismas from lafet ya i no ona long Jisas we i rod ya nomo blong sevem yumi mo hem nomo we bambae i mekem ol faet mo trabol blong man oli finis. [Tokbaot no ridim Ol Wok 4:12.] Jisas i no moa stap olsem wan bebi be wan king we i stap rul finis. Buk ya, Man We i Hae Moa Long Olgeta Man, i tokbaot ol tijing mo merikel blong Jisas mo i soem olsem wanem hem bambae i finisim ol trabol blong man.” Nao soem pija long japta 133, mo ridim namba tu (2) haf long nekis pej. Soem ol narafala poen we yu ting se oli stret long man. Sipos hem i soem se hem i intres, eksplenem olsem wanem buk ya i save givhan long hem.
5 Storeyan Long Ol Wokfren: Wan brata i seremaot 63 buk taem hem i jes putum wan kopi blong Man We i Hae Moa long desk blong hem blong man i luk. Gudfala kala blong hem i pulum ae mo taetel blong hem i mekem plante kwestin oli stanap. Yu jes save askem long wokfren se: “?Hu i man we hae moa long olgeta man?” Afta, yu save gohed se: “Buk ya i tokbaotgud olgeta laef blong Jisas, i tokbaot olgeta tok we hem i bin givim, i ansa long plante kwestin we ol man oli askem long saed long ol merikel blong hem, mo ol narafala samting we oli intres tumas. Hemia wan nambawan fasin blong tingtingbak long wanem Baebol i talem long saed blong Jisas mo i pruvum se Jisas Kraes i man ya we i hae moa long olgeta man.” Nao yu save tokbaot ol tok we Napoléon i talem long saed long Jisas we i stap long haf tri (3) long fastok blong buk ya.
6 Yumi save holem sam jans olsem blong givim wetnes long ol man raonabaot long haos blong yumi no long ol famle blong yumi we oli no bilif. Prea long Jeova se bambae hem i givim strong tingting long yu mo gudhan long yu blong tok long stret taem. (Wok 4: 29, 31) Wanem we yumi mas talem long saed long Jisas bambae i mekem hat blong ol man we oli stret oli haremgud blong lesin. ?I gat wan ekspiryens we i gud moa bitim hemia we yumi gat blong halpem wan skulfren, wan wokfren, no wan famle blong wokbaot long rod ya blong laef we i no save finis?—Jon 14:6.