Holem Stret Tingting Long Saed Blong Ol Teknik Blong Kompyuta

¹ Aposol Pol i talem long ol Kristin long faswan handred yia, se oli no mas letem ol narafala samting oli pulum tingting blong olgeta tumas, from we i “no gat plante taem i stap.” (1 Kor. 7:29) !En blong olfala fasin blong wol ya i stap kam kolosap moa, taswe i impoten tumas we yumi ‘lukaotem Kingdom blong God mo stret fasin blong hem fastaem,’ mo ‘tekem evri jans we yumi gat blong wokem i gud’! Taem i wan sas samting.​—⁠Mat. 6:⁠33; Efes. 5:⁠15, 16.

² Ol man oli leftemap ol nyufala teknik se oli stap sevem plante taem blong yumi. Wan eksampel, yumi save tajem wan smol samting nomo long wan kompyuta, ale kwiktaem nomo, bambae hem i givim fulap save long yumi. Plante taem, ol komyputa oli tekem sam seken nomo blong mekem samting we i save tekem plante haoa no wik blong mekem long wan narafala rod. Taem yumi yusum olgeta long stret fasin, oli givhan gud long yumi.

³ ?Oli Sevem Taem Blong Yumi Tru?: Be, yumi save kasem ol nyufala teknik ya nomo taem yumi pem wan bigfala praes​—⁠long saed blong mane mo taem tu. Maet yumi nidim plante haoa blong lanem olsem wanem blong mekem wan wok wetem kompyuta. Mo tu, sipos wan man i intres tumas long ol teknik blong kompyuta, hem i save westem plante taem, hemia taem we hem i save yusum long wan narafala rod we i moagud. Yumi mas skelemgud samting ya, mo tingbaot advaes blong Pol blong ‘mekem fasin blong man we i waes, mo yusum evri jans we yumi kasem blong wokem i gud.’​—⁠Ridim 1 Korin 7:⁠31.

⁴ Samfala we oli ting se oli stap mekem wan gudfala samting, oli bin wokem sam program blong kompyuta blong putum ol rekod blong kongregesen long olgeta. I tru, hem i bisnes blong wanwan man olsem wanem hem i yusum kompyuta blong hem. Be, ol rekod blong kongregesen we Sosaeti i prentem ol fom blong olgeta finis, oli no mas stap insaed long kompyuta, from we ol pikinini mo samfala we oli no gat raet blong luk olgeta, oli save luk. Olgeta rekod blong kongregesen​—⁠ol kaon, ol Kad Blong Pablisa, mo ol narafala samting olsem​—⁠oli mas stap long ol fom we Sosaeti i prentem, mo ol save long ol fom ya blong kongregesen i no mas stap insaed long wan kompyuta. Fasin ya i save lukaotgud long ol rekod blong kongregesen, we ol man olbaot oli no gat raet blong save long olgeta.

⁵ Ol elda oli mas yusum fasin luksave blong olgeta taem oli givimaot ol tok long Tiokratik Skul mo Miting blong Kingdom Wok. Oli mas tingbaot ol save insaed long ol wanwan tok ya. Wan eksampel, long Tiokratik Skul, maet i gat sam save we i no stret blong samfala oli givim tok long hem. Elda ya i mas tingbaot risen blong tok ya, ol fasin blong hemia we bambae i givim tok ya, mo wanem poen we tok ya i stap tokbaot. Hem i no mas letem wan kompyuta i mekem disisen ya.

⁶ Wan brata we i kasem wan tok long miting blong kongregesen, i no mas dipen long ol save we narafala i mekemrere, antap moa wan we hem i no save hem. Hemia ol save we hem i save kasem long isi rod, tru long wan netwok blong ol kompyuta. Ol Kristin we oli bigman long saed blong speret, oli no mekem flas fasin ya, we oli mekemrere ol tok long Baebol mo ol haf long miting, mo putum olgeta long netwok blong ol kompyuta blong ol narafala oli yusum. I tru se wan kompyuta mo Watchtower Library long CD-ROM we Sosaeti i mekemrere, oli ol gudfala tul we wanwan brata i save yusum, mo oli save givhan long olgeta blong kasem plante save long smoltaem we oli gat.

⁷ Long saed blong fasin blong mekem kopi mo givimaot ol program, lis, mo ol narafala save long ol brata tru long kompyuta, mo fasin blong mekemrere mo givimaot ol haf blong Miting Blong Kingdom Wok mo Tiokratik Skul tru long kompyuta no long ol narafala rod, kolosap oltaem i moa gud we ol brata wanwan oli mekemrere ol save we oli wantem yusum. Olsem nao, oli save mekem tok blong olgeta i stret long nid blong ol brata long kongregesen blong olgeta. (1 Tim. 4:​13, 15) Wan brata i neva mas yusum fasin joen blong hem wetem kongregesen blong winim mane from.

⁸ ?Olsem wanem sipos samfala oli givimaot ol pej we oli prentem long kompyuta, we oli gat ol vas blong Wajtaoa Stadi no Buk Stadi long olgeta? Maet i moa gud sipos wanwan pablisa i makem ol poen we hem i wantem makem stret long Baebol blong hem, mo long buk we hem i stap yusum blong stadi long hem. Sipos yumi yusum ol vas blong Baebol we kompyuta i prentem, samting ya i save daonem fasin blong yusum Baebol hem wan blong lukluk ol vas. Fasin blong jekem ol vas long Baebol taem yumi mekem wan Baebol stadi no long wan miting blong kongregesen, i haf long trening we yumi stap kasem, blong mekem yumi kam moa gud long fasin blong yusum Baebol long wok blong prij. Plante taem, ol vas oli gat moa paoa taem yumi ridim olgeta stret long Baebol, antap moa ol vas we oli longfala. Samting ya i tru moa taem brata i pulum olgeta evriwan we oli stap long miting blong folem ol vas long Baebol blong olgeta.

⁹ Sam Narafala Trap: Olsem Wajtaoa blong Ogis 1, 1993, pej 17, i talem, fasin blong joenem kompyuta blong yumi long wan program we i mekem se yumi save kasem mo sanem save long ol narafala, i save lidim yumi long bigfala denja long saed blong speret. Wan man nogud i save putum wan vaeras long program ya, maet hem i putum wan program we hem nomo i wokem, from we hem i wantem jenisim mo spolem sam fael long kompyuta. Long sem fasin, ol man blong apostasi, ol lida blong skul, mo olgeta we oli wantem spolem ol gudfala fasin blong narafala, oli save putum ol tingting blong olgeta, we oli olsem posen, long ol program ya. Samtaem ol brata oli putum nem ya “JW Nomo” long program ya. Nating se oli mekem olsem, be sipos i no gat wan we i kontrolem gud program ya, mo sipos oli no letem nomo ol man blong Jeova we oli bigman long saed blong speret mo oli strong long bilif, oli yusum, i olsem se ol Kristin we oli yusum hem oli stap kampani wetem ol ‘nogud fren.’ (1 Kor. 15:33) Sosaeti i bin kasem sam ripot se long ol netwok olsem, we ol man oli talem se oli blong olgeta nomo, samfala oli stap talem prapa tingting blong olgeta long ol samting long saed blong speret. Mo antap long hemia, oli yusum program ya blong givim ol nogud advaes, toktok long nogud fasin blong daonem narafala, talem ol gyaman tok, talem ol negatif tingting, stanemap sam kwestin mo givim sam tingting we oli save mekem bilif blong narafala i hafhaf, mo talemaot mining blong sam vas blong Baebol folem prapa tingting blong olgeta nomo. Fastaem, maet i luk olsem we sam save i gud, mo maet i pulum intres blong yumi. Be taem yumi luklukgud, maet i gat ol samting olsem posen insaed long hem. Ol Kristin oli stap lukluk i go nomo long “slef ya we i stret mo waes” blong kasem kakae long saed blong speret long stret taem, mo blong mekem ol trutok oli kam klia. (Lukluk Wajtaoa blong Julae 1, 1994, pej 9 kasem 11.) Ol Kristin oli gat wan hevi responsabiliti blong lukaotgud long bilif blong olgeta, blong i no gat samting i kam spolem. Blong mekem olsem, oli mas save oltaem ol man we oli stap kampani wetem olgeta.​—⁠Mat. 24:​45-47, NW; 2 Jon 10, 11.

¹⁰ Sem haf ya blong Wajtaoa i makem se i impoten we yumi respektem ol loa long saed blong kopiraet. Plante kampani we oli mekem mo salem ol program blong kompyuta oli gat kopiraet blong olgeta, mo oli givim wan laesens long man we i pem, blong talem olsem wanem man ya i save yusum ol program ya long fasin we i stret folem loa. Kolosap oltaem, laesens ya i talem se man we i pem wan program, i no save givim kopi blong program ya long wan narafala. Intanasanal loa long saed blong kopiraet, hem tu i talem se i agensem loa blong mekem samting ya. Plante man we oli gat griri fasin, oli no kea sipos oli brekem loa. Be, ol Kristin oli mas lukaotgud blong no brekem loa, oli mas givimbak long Sisa ol samting we i blong Sisa.​—⁠Mat. 22:21; Rom 13:⁠1.

¹¹ Sam bigfala kampani, oli salem ol kompyuta we oli gat ol program i stap finis insaed long olgeta, mo ol program we i gat laesens wetem olgeta. Be, sam stoa blong salem kompyuta, oli no givim ol laesens. Hemia from we ol program we oli putum insaed long ol kompyuta we oli stap salem, oli no stret folem loa. Samting ya i min se man we i pem wan long ol kompyuta ya mo yusum program insaed long hem, hem i brekem loa. Wan narafala poen we i joen wetem samting ya se, ol Kristin oli no mas sanem no kasem long program blong kompyuta, ol save we i gat kopiraet long hem (olsem ol buk blong Sosaeti). Ol save ya, ol narafala man oli save mekem kopi blong hem be oli no gat raet, from we oli no bin askem long hemia we i holem kopiraet blong hem.​—⁠Hib. 13:18.

¹² Yumi mas skelemgud ol gudfala samting we i save kamaot from fasin blong yusum ol nyufala teknik ya, wetem ol denja we oli save kamaot tu. Olsem televisin, yumi save yusum olgeta long wan gudfala fasin. Be bigfala paoa we televisin i gat long ol man tede we i pulum olgeta blong mekem nogud, i mekem ol man blong wol tu oli wari tumas. Sam netwok blong ol kompyuta oli go kasem olgeta ples blong wol, mo oli save karem fulap gudfala save i kam long haos no long ples blong wok. Oli givhan bigwan long ol bisnes mo ol ogenaesesen mo long ol wanwan man tu, we oli nidim blong savegud long olgeta samting we i stap hapen long saed blong bisnes no laef blong olgeta, long wol ya we i stap ron kwik tumas. Be tu, ol netwok blong kompyuta oli leftemap plante nogud fasin, olsem ol foto long saed blong seks, ol toktok blong mekem man i no laekem nating narafala, mo ol klia save olsem wanem blong mekem ol rabis wok mo nogud fasin.

¹³ From samting ya, i gat plante impoten risen blong ol Kristin oli holem stret tingting long saed blong ol teknik blong kompyuta. Plante oli glad tumas long New World Translation, tufala buk blong Insight mo program blong GetVerse we Sosaeti i mekemrere long ol disk blong kompyuta. Sam narafala oli kasem plante gudfala frut from fasin blong yusum Watchtower Library long CD-ROM we Sosaeti i mekemrere, we i gat sam narafala samting i stap wetem, blong halpem ol man blong stadi dip. Yumi luksave se sam teknik oli gud. Be taem yumi yusum ol nyufala teknik ya blong halpem yumi, yumi mas lukaotgud tu blong blokem ol nogud samting long saed blong olgeta ya, we i save spolem yumi mo narafala. Yumi mas gat fasin blong skelemgud samting ya. Olsem nao, fasin blong yusum ol teknik, nating se oli gud nomo, bambae i no kakae tumas taem we yumi givim finis i go long God. Mo bambae oli no pulum tingting blong yumi i gowe long bigfala wok blong yumi mo mak we yumi wantem kasem.​—⁠Mat. 6:22; 28:​19, 20.