Mekem Wok—Bitim We Yumi Lesin Nomo
1 Ol trufala Kristin tede oli folem advaes blong Baebol blong mekem ol samting we Tok blong God i talem, bitim we oli jes lesin long hem nomo. (Jem. 1:22) Samting ya i mekem se oli defren olgeta long ol man we oli stap talem se oli Kristin, be oli ona long God wetem ol toktok blong olgeta nomo. (Aes. 29:13) Jisas i talem klia se, God bambae i sevem olgeta ya nomo we oli stap mekem ol samting we Hem i wantem.—Mat. 7:21.
2 Wosip we i no joen wetem ol wok blong soem fasin obei long God, i no gat mining. (Jem. 2:26) Taswe, yumi mas tingbaot se: ‘?Long wanem rod nao ol wok blong mi oli soemaot se mi rili bilif tru? ?Wanem samting long laef blong mi i soemaot se mi rili stap folem ol samting we mi bilivim? ?Olsem wanem mi save folem Jisas moa?’ Sipos yumi ansa tru long ol kwestin ya, samting ya bambae i givhan long yumi blong luksave wanem samting long saed blong wok blong God we yumi kamgud finis long hem, mo wanem samting yumi nidim blong kamgud moa long hem yet.
3 Bigfala samting long laef blong yumi, ol man blong Jisas, i mas sem samting we man blong raetem Sam i tokbaot, se: ‘Bambae mifala i stap presem yu olwe nomo, stat long moning, gogo kasem sapa. Bambae mifala i stap talem tangkyu long yu oltaem, gogo i no save finis.’ (Sam 44:8) Kristin skul i wan fasin blong laef we yumi mas folem evri dei mo long evri samting we yumi mekem. !Yumi haremgud tumas taem yumi soemaot se yumi wantem presem Jeova long olgeta samting we yumi mekem!—Fil. 1:11.
4 Blong Presem Jeova, i Minim Moa Bitim We Yumi Mekem Stret Fasin: Sipos God i wantem nomo we yumi mekem ol gudfala fasin, yumi save traehad nomo blong mekem prapa fasin blong yumi i kamgud moa. !Be, long wosip blong yumi, yumi mas talemaot long ol man ol nambawan wok blong Jeova mo nem blong hem tu!—Hib. 13:15; 1 Pita 2:9.
5 Wok we i impoten moa blong yumi mekem, hemia wok blong talemaot gud nyus long ol man. Jisas i yusum ful laef blong hem long wok ya, from we hem i save se olgeta we oli lesin, bambae oli kasem laef we i no save finis. (Jon 17:3) Tede, ‘wok ya blong talemaot tok blong God’ i impoten sem mak. Long rod ya nomo, man i save kasem laef. (Wok 6:4; Rom 10:13) Taem yumi tingbaot ol gudfala blesing we ol man oli save kasem from wok ya, yumi luksave from wanem Pol i givim advaes ya blong ‘talemaot tok blong God,’ mo blong ‘strong oltaem blong talemaot.’—2 Tim. 4:2.
6 ?Yumi mas spenem hamas taem long laef blong yumi blong presem Jeova? Man blong raetem Sam i talem se hem i stap mekem olwe nomo, stat long moning gogo kasem sapa. ?Yu yu gat sem filing? Yes. Bambae yumi luk evri man we yumi mitim long dei olsem wan jans blong talemaot nem blong Jeova. Bambae yumi lukaot jans blong jenisim storeyan i go long ol samting long saed blong speret. Mo tu, bambae yumi traehad blong joen oltaem long wok blong prij folem ol plan blong kongregesen. Olgeta we oli gat jans, oli save tingbaot wok blong paenia, from we samting ya i givhan long yumi blong putum wok blong prij long fasples long laef blong yumi evri dei. Tok blong God i promes long yumi se sipos yumi gohed oltaem blong mekem ol samting we God i wantem, bambae yumi haremgud.—Jem. 1:25.