“Oltaem Yufala i Mas Stap Talem Tangkyu”
1 Taem yumi pikinini, bighaf blong yumi i kasem trening blong talem “plis” mo “tangkyu,” taem narafala i mekem i gud no soem kaen fasin long yumi. Pol i talem se ‘oltaem yumi mas stap talem tangkyu.’ Mo yumi mas talem tangkyu moa long Jeova. (Kol. 3:15, 16) Be, ?olsem wanem yumi save soem tangkyu long Bigfala Man ya we i Wokem yumi? ?Mo wanem sam spesel risen we yumi gat blong talem tangkyu long hem?
2 Aposol Pol i raetem se: “Yumi stap talem tangkyu long God, from we hem i joenem yumi long Jisas Kraes, Masta blong yumi.” (1 Kor. 15:57) Evri yia long taem blong Memoriol, yumi harem tok we i pulum yumi blong tingbaot bigfala lav we God mo Kraes tufala i bin soemaot, taem tufala i givim ransom we i mekem se yumi gat hop blong laef olwe. (Jon 3:16) Kolosap yumi evriwan i bin lusum wan we yumi laekem hem tumas long ded. !Taswe, yumi talem tangkyu from promes blong Jisas long saed blong laef bakegen long ded! Hat blong yumi i fulapgud wetem tangkyu taem yumi tingbaot se yumi gat hop blong laef tru long en blong wol ya we yumi no ded samtaem. (Jon 11:25, 26) I hadwok blong faenem ol tok we oli naf blong soem tangkyu from ol nambawan blesing we bambae yumi kasem yet long Jeova, taem Paradaes bambae i kamtru long wol ya. (Rev. 21:4) ?I gat wan risen we i moagud blong “stap talem tangkyu” long God?
3 Ol Rod Blong Talem Tangkyu Long God: Oltaem i stret blong talem tangkyu long Jeova long prea, from ol gudfala samting we hem i mekem. (Sam 136:1-3) Mo tu, yumi wantem soem tangkyu long hem long sam narafala rod. Eksampel, bambae yumi stap long Memoriol blong ded blong Kraes long Sande, Maj 23. Blong givhan long saed blong ol samting we kongregesen blong yumi i nidim, mo blong givhan long wok blong prij long olgeta ples blong wol, yumi glad blong ‘ona long Jeova wetem ol sas samting blong yumi.’ (Prov. 3:9) Yumi sapotem fulwan ol elda mo wokgud wetem olgeta. Long rod ya, yumi soem tangkyu long Jeova from help we hem i givim tru long ol elda ya. (1 Tes. 5:12, 13) Evri dei, yumi traehad blong folem ol stret fasin we oli givim ona long nem blong God. (1 Pita 2:12) Jeova i glad tumas blong luk ol samting ya we oli soemaot tangkyu blong yumi.—1 Tes. 5:18.
4 Nambawan Fasin Blong Talem Tangkyu: Sam long ol nambawan fasin blong soemaot tangkyu wetem fulhat blong yumi, from ol samting we Man we i Wokem yumi i mekem blong yumi, hemia: Joen wetem ful paoa blong yumi long wok blong talemaot Kingdom, ona long nem blong Jeova, talem tangkyu long prea, mo no fraet blong ansa taem man i tok agensem trutok. Jeova i glad tumas blong luk we yumi stap mekem tabu wok blong hem blong givhan long saed blong samting we hem i wantem, hemia se ‘olgeta kaen man bambae oli kasem laef.’ (1 Tim. 2:3, 4) Hemia nao from wanem plante pablisa we oli save mekem plan, oli folem tok we i stap long Kingdom Wok Blong Yumi blong Febuwari, ale oli fulumap pepa blong kam haftaem paenia long wan manis no bitim wan manis long Maj, Epril mo Mei. Sipos yumi traem mekem moa long wok blong prij, hemia wan nambawan rod blong “talem tangkyu” long God. ?Bambae yu yu mekem wok blong paenia long Epril? long Mei?
5 Yumi gat wan hop we i sua, hemia blong kasem laef we i no save finis. Taem yumi luk samting ya i kamtru, bambae yumi gat plante moa risen blong gohed evri dei blong talem tangkyu long Jeova wetem glad.—Sam 79:13.