Tijimgud Ol Man Taem Yumi Prij Long Ol Haos Wanwan

¹ Ol man oli save se Jisas i stap talemaot gud nius. (Luk 8:1) Be plante taem ol man we oli kam blong luk hem, oli kolem hem tija. (Mat. 8:19; 9:11) Baebol i talem se “ol man oli sapraes tumas long tok [‘long tijing,’ NW] blong hem,” mo taem “Jisas i stap wokbaot, i stap pas long ol vilej raonabaot long ples ya, [hem] i stap tijim ol man.”​—Mat. 7:28; Mak 6:6.

² Ol aposol tu, oli tija. Oltaem, Pol i “mekem ol man oli tingtinggud long ol vas blong Baebol, hem i eksplenem mo hem i pruvum wetem sam vas” ol samting we hem i tijim long ol man. (Wok 17:2, 3, NW) Hem i no haedem wan samting long saed blong Kingdom blong God. Taswe, taem hem i tokbaot Jisas hem i pulum ol man. (Wok 28:23) ?Olsem wanem long yumi? ?Yumi save tijimgud ol man taem yumi prij long ol haos wanwan?

³ Yusum Tok We i Stret Long Man: Taem yumi prij long ol haos wanwan, yumi luk se ol man oli no sem mak, evriwan i gat prapa wari blong hem. Sam oli bilif long Baebol, sam narafala nogat. From samting ya, yumi mas jusum ol tok we oli stret mo we oli laenapgud wetem laef blong ol man we yumi prij long olgeta. ?Yufala i save wanem rod we Jisas i yusum blong storeyan wetem wan “tija blong Loa”? Man ya i askem long Jisas se: “Tija. ?Bambae mi mas mekem olsem wanem blong kasem laef ya we i no save finis?” Nao, Jisas i askem kwestin ya long hem se: “?Baebol i talem olsem wanem? ?Taem yu ridim ol tok blong Loa ya, yu harem olsem wanem?” (Luk 10:25-28) Ansa blong Jisas i soemaot se hem i luksave we man ya i wan “tija blong Loa.” Jisas i tingbaot samting ya taem hem i tijim man ya.

⁴ Taem Pol i prij long Ereopagas, hem i luksave se hem i stap toktok wetem ol hiten man we oli no gat save nating long saed blong Hibru haf blong Baebol, mo long saed blong Jisas Kraes. Pol i toktok long olgeta long fasin we oli naf blong kasem save long mesej blong hem. (Wok 17:22-34) Taswe, olsem Pol, yumi mas tingbaot bilif mo filing blong ol man we yumi tijim olgeta. Sipos yumi storeyan wetem wan yangfala, i gud we yumi traem blong kasem save tingting blong hem. Sipos yumi mitim wan man we i ridim Baebol, yumi mas tingbaot se hem i gat save long sam samting. Jisas i mekem sem samting wetem “tija blong Loa.” From we ol man oli defren, ating samtaem yumi mas jenisim ol tok blong yumi. Be, ?wanem ol narafala samting we oli save mekem tijing blong yumi i kamgud moa, taem yumi prij long ol haos wanwan?

⁵ Mekem Man i Tingting: Taem yumi mekem man i tingting hemia i min se taem yumi prij long man ya yumi traem givhan long hem blong kasem save long mesej blong yumi mo blong agri long tijing blong yumi. Blong mekem olsem, yumi mas eksplenemgud long hem wanem we yumi stap talem. Olsem nao, bambae hem i save lesin long yumi, mo tu bambae hem i luksave se ol tok blong yumi oli no olbaot. ?Olsem wanem blong mekem se tijing blong yumi i kam moa klia?

⁶ Tok ya from wanem i mekem se yumi mas eksplenem ol samting. Yes, taem yumi visitim ol man, ating oli wantem save from wanem yumi kam luk olgeta, from wanem mesej blong yumi i impoten tumas, mo from wanem oli mas lesin long mesej ya. I gud we yu tingbaot ol kwestin ya, bifo we yu prij long ol haos wanwan. Long manis ya, yumi seremaot Save buk. Sipos yumi soem japta 8, we i tokbaot from wanem God i letem ol man oli stap safa, maet yumi save askem long yumi wan se: ?From wanem bambae yumi tokbaot kwestin ya long ol man? ?From wanem oli nidim blong save samting we Baebol i talem long saed ya? ?Olsem wanem samting ya i save gat paoa long laef blong olgeta? Mo sipos yumi yusum sam vas blong Baebol, ?from wanem yumi jusum ol vas ya?

⁷ Afta we yumi tingbaot ol kwestin ya, bambae yumi traehad blong toktok klia, nao i isi moa long ol man blong kasem mesej blong yumi. Yufala i no mas fogetem se, aposol Pol i yusum “sam vas” blong givhan long ol man blong kasem save long Baebol.​—Wok 17:​3, NW.

⁸ I gud blong yusum sam pijatok mo ol kwestin we oli stret. Tufala samting ya i mekem se ol man oli tingting dip long ol trutok we yumi stap talem long olgeta, mo oli laekem ol trutok ya wetem ful hat blong olgeta. Yumi save makemgud ol stamba poen blong ol vas we yumi ridim, taem i stret blong mekem olsem. Samting ya bambae i halpem ol man blong oli lesingud long samting we yumi ridim long olgeta. Bambae yu faenem plante narafala advaes long buk ya Reasoning From the Scriptures. Tekem taem blong lukluk bakegen ol poen long buk ya mo traem yusum olgeta taem yu prij long ol haos wanwan.

⁹ Yumi gat responsabiliti blong tijim ol man long ol rul we Jisas i askem yumi blong folem. Samting ya i pulum yumi blong tinghae long advaes ya se yumi mas ‘lukaot gud long ol tok we yumi stap tijim ol man long hem.’ (1 Tim. 4:16) I gud yumi tektaem mo yumi traehad blong gat gudhan long fasin blong yumi blong tijim narafala. Pol i talem long Timoti se, yumi “mas ona gud long olgeta” we oli “stap hadwok blong prij mo blong tijim ol man.” (1 Tim. 5:17) Taswe, yu no mas fraet blong askem long ol elda no long olgeta we oli talemaot gud nius longtaem finis, blong oli givhan long yumi. Yumi mas prea oltaem long Jeova blong i blesem yumi. Long semtaem, yumi mas gohed blong ‘mekem se wok ya blong prij i kam nambawan wok blong yumi.’​—1 Tim. 4:13.